"გენიალური ბიჭი საქართველოდან" - "გლოსთერის" მწვრთნელი კვესელაძეზე

"გლოსთერის" თავკაცმა ჯორჯ სკივინგტონმა 2020 წლის დეკემბერში შემოდგომის ერთა თასზე ირლანდიასთან გატანილი ლელოს შემდეგ ფსონი უცნობ ქართველ მოთამაშეზე, გიორგი კვესელაძეზე გააკეთა. მაშინ ის მარნეულის "არმაზის" 23 წლის ნახევრად პროფესიონალი იყო და ყურადღება იმით მიიპყრო, რომ ბრაიან ო’დრისკოლმა "თვითერზე" დითირამბებით შეამკო.

"მე რომ ევროპული კლუბი ვიყო, რომელიც ცენტრს ეძებს, სერიოზულად დავაკვირდებოდი ქართველ 13 ნომერ გიორგი კვესელაძეს. შესანიშნავი ლელოს გარდა, ის გამოირჩა დაცვაში საიმედო თამაშით. განათლებული და შრომისმოყვარეა", - დაწერა მაშინ ო’დრისკოლმა.

იმ დღეს კვესელაძე მატჩის საუკეთესო მოთამაშე არ გამხდარა, თუმცა მისი შედეგები საუკეთესო იყო შემოდგომის ერთა თასზე და მალე "გლოსთერმა" უხმო. 16 თვის შემდეგ ის ინგლისურ კლუბში, პრემიერლიგის ნახევარფინალში თავისი მე-15 მატჩისთვის ემზადება.

"გლოსთერში" თამაშის პარალელურად, ის საერთაშორისო კარიერას აგრძელებდა და ნოემბერში საფრანგეთის წინააღმდეგ ითამაშა, მერე კი საქართველოს 2023 წლის მსოფლიო თასზე გასვლაში დაეხმარა. სკივინგტონი ქართველ მორაგბეზე ამბობს:

"ის ხარისხიანი მოთამაშეა. ირლანდიას მან მართლაც გამორჩეული ლელო გაუტანა. ახლა მას პრემიერლიგის ინტენსივობასთან შეგუების პერიოდი უდგას და მუხლჩაუხრელად შრომობს საკუთარი თამაშის დასახვეწად და ინგლისური ენის შესასწავლად. მას სურს ჩვენი გუნდის ნაწილი იყოს და აშკარაა, ნათელი მომავალი აქვს. ამ სეზონში მას არ ჰქონდა საკმარისი სათამაშო დრო და რამდენჯერმე გაემგაზვრა საქართველოს ნაკრებში, რის გამოც სასურველი ბალანსი ვერ დავიცავით, თუმცა ის შესანიშნავი ადამიანი და მორაგბეა და დიდი პოტენციალი აქვს.

საქართველოს ნაკრებში თამაშისას ის შთამბეჭდავი იყო დაზღვევისას, თუმცა ჩვენ გვსურს, ენერგია საჭირო დროს გამოიყენოს და ჩაჯდეს სისტემაში. "ბრისტოლთან" მან ეს შესანიშნავად მოახერხა და "ვუსტერთან" 12 ნომრის პოზიციასაც კარგად გაართვა თავი. გიორგიმ თამაშის მერე მითხრა, რომ მოსწონს 12 ნომრად თამაში. მას მუდმივი პროგრესი აქვს და მას უფრო მეტო სათამაშო დრო ექნება, ვიდრე გასულ სეზონში. მჯერა, ის ძალიან კარგი მოთამაშე გახდება.