პიტერ დრუიტი რაგბის კავშირის მაღალი სპორტული მიღწევების მენეჯერად დაინიშნა

AutoSharing Option
ინგლისელი სპეციალისტი პიტერ დრუიტი საქართველოს რაგბის კავშირის მაღალი სპორტული მიღწევების მენეჯერად დაინიშნა.

61 წლის სპეციალისტი ექსეთერში დაიბადა და რაგბის ცხოვრების უდიდესი ნაწილი დაუთმო. ის 9 ნომრის პოზიციაზე "ექსეთერსა" და "ლონდონ უელსში" თამაშობდა, მოთამაშის კარიერის დასრულების შემდეგ კი მწვრთნელობას მიჰყო ხელი და სახელი მთელი მსოფლიოს მასშტაბით გაითქვა.

1978-82 და 1988-96 წლებში ის ექსეთერის უნივერსიტეტსა და სარაგბო აკადემიაში ფიზმომზადების ედუკატორად მუშაობდა, ლექციებს კითხულობდა და ახალგაზრდებთან მუშაობის უდიდესი გამოცდილება შეიძინა.

პარალელურად, 1992-2006 წლებში პიტერი ინგლისის 21-წლამდელთა ნაკრების მთავარი მწვრთნელი იყო და პრაქტიკულად, მის
ხელში გაიარა ყველა იმ მორაგბემ, რომლებიც 2003 წელს ინგლისის ეროვნულ ნაკრებს მსოფლიო თასის მოპოვებაში დაეხმარნენ. ამ პერიოდში ის იყო ინგლისის რაგბის კავშირის განვითარებადი მორაგბეების მენეჯერი და კლაივ ვუდვორდთან ერთად, უშუალოდ მონაწილეობდა ავსტრალიაში წამსვლელი მორაგბეების შერჩევაში.

2006-09 წლებში დრუიტი იყო "ექსეთერ ჩიფსის" მთავარი მწვრთნელი და გუნდი მთელი ევროპის მასშტაბით ანგარიშგასაწევ ძალად აქცია. 2009 წლიდან მან მოიპოვა უმაღლესი დონის მწვრთნელთა ედუკატორის ლიცენზია და დღემდე მუშაობს მწვრთნელთა გადამზადების ყველა დონეზე. პიტერის საქართველოში დასაქმებით, ქართველ მწვრთნელებს ექნებათ შესაძლებლობა, რომ პირველი და მეორე დონის გარდა, ქვეყნიდან გაუსვლელად გაიარონ და მიიღონ საერთაშორისო მესამე დონის ლიცენზიები.

2014 წლიდან დღემდე, პიტერი ჰონგკონგის რაგბის კავშირის კონსულტანტია. ამავდროულად, მან სამუშაოდ გადაინაცვლა უელსის რაგბის კავშირში და 2017 წელს, უელსის 20-წლამდელთა ნაკრების მენეჯერის რანგში, ამავე წლის ახალგაზრდულ მსოფლიო თასზე საქართველოში იმყოფებოდა. სწორედ მაშინ გაიცნო და მოიხიბლა საქართველოთი, რის შედეგადაც ჩვენს ქვეყანაში მუშაობაზე დათანხმდა.

პიტერ დრუიტი საქართველოში უახლოეს დღეებში ჩამოვა, მოივლის ჩვენი ქვეყნის ყველა რეგიონს, ადგილზე გაეცნობა ყველა კლუბში, მათ შორის ბავშვთა რაგბიში არსებულ სიტუაციას, რისიც დიდი გამოცდილება აქვს და ქართველ სპეციალისტებთან ერთად შეიმუშავებს გრძელვადიან პროგრამას ქართული რაგბის მომავალი განვითარებისთვის.

მომზადებულია rugby.ge-ს მიხედვით
მკითხველის კომენტარები / 1 /
წარმატებას ვუსურვებ!
gujakakhadze
11:19 24-01-2020
0

სიახლეები პოპულარული