7-კაცა | უკეთ, მაგრამ არასაკმარისად

საქართველოს 7-კაცამ მსოფლიო რაგბის ჩელენჯერის სერიის მეორე ეტაპზე პირველზე უკეთესი შედეგი აჩვენა და მე-8 ადგილი დაიკავა (პირველ ეტაპზე მე-11), მაგრამ ჯამში 8 საუკეთესოს შორის ვერ მოხვდა და შესაბამისად, აპრილში კრაკოვში (პოლონეთი) ვერ ითამაშებს.

კეიპტაუნის მეორე ეტაპზე ჯგუფში მადაგასკარის დამარცხების შემდეგ, ბესიკ ხამაშურიძისა და გია ლაბაძის შეგირდებს გადამწყვეტი ჯახი მე-5 ადგილის ნახევარფინალში, ტონგასთან ჰქონდა. გამარჯვებული კრაკოვის საგზურს იღებდა, დამარცხებული კი წლევანდელ ჩელენჯერის სერიას ემშვიდობებოდა.

ასეთი წნეხის ფონზე ტონგასთან მატჩის პირველ ტაიმში სამი შეცდომა დავუშვით და კუნძულელებისგან სამი ლელო მივიღეთ, მეორე ტაიმის დასაწყისში კი სულაც 0:26 ჩამოვრჩით. საქართველომ ბოლომდე იბრძოლა და ლევან ნარიმანიძემ და თემურ კოხოძემ ორი ლელო გაქვითეს, რომელთაგან ერთი სერგი ჩხაიძემ გარდასახა, თუმცა მოსაგებად ეს საკმარისი არ იყო - 12:26.

მე-7 ადგილისთვის პირველი ეტაპის გამარჯვებულ ჩილეს შევხვდით და კოხოძემ ლელოთი ანგარიში გაათანაბრა. ტაიმის მოგებაც შეიძლებოდა, მაგრამ არცთუ ცუდი პოზიციიდან გარდასახვა არაზუსტი იყო, მატჩის მიწურულს კიდევ ორი ლელო მივიღეთ და საბოლოოდ მეტოქემ 15:5 გაიმარჯვა.

ამრიგად, ორი ეტაპის ჯამში დავიკავეთ მე-10 ადგილი და ახლა გუნდი რაგბი ევროპის ჩემპიონატისთვის მოემზადება, რომელიც ივნისში გაიმართება.

სამხრეთ აფრიკის ჩელენჯერის მეორე ეტაპზე ითამაშეს