საქართველოს მორაგბეთა ნაკრები, ორდღიანი მომქანცველი მგაზვრობის შემდეგ ახალ ზელანდიაში ჩავიდა. პირველი ქალაქი, რომელიც "ბორჯღალოსნებს" უმასპინძლებს, ქვინზთაუნია. ამ ქალაქის მოსახლეობამ საქართველოს ნაკრებს საკმაოდ ემოციური, თბილი დახვედრა მოუწყო. ქომაგები ჩვენს ბიჭებს აეროპორტის შენობაშიც და მის მახლობლად ბლომად დახვდნენ და შეძახილებით ამხნევებდნენ. ახალ ზელანდიელმა მაორებმა ტრადიციული საბრძოლო სიმღერა შეასრულეს.
ქვინზთაუნითა და მისი მცხოვრებლებით ქართველი მორაგბეები აღფრთოვანებულნი დარჩნენ. დაღლილიბა წამში გაქრა და ბიჭებს, კარგი, საბრძოლო განწყობა დაუბრუნდათ.
ვიდეო
ილია ზედგინიძე: "ქვინზთაუნელებმა არაჩვეულებრივი დახვედრა მოგვიწყვეს, არაჩვეულებრივი გარემოა, ყოველი მხრიდან ქალაქს მთები აკრავს. ძალიან სასიამოვნო ღონისძიება
გიორგი ნიჟარაძე: "ორი დღის მგზავრობის შემდეგ ჩამოვედით ამ პატარა ქალაქში, სადაც არაჩვეულებრივი დახვედრა მოგვწყვეს. ჩვენი ახალ ზელანდიაში სტუმრობა ძალიან კარგად დაიწყო, შესანიშნავი განწყობა შეგვექმნა და იმედი გვაქვს, მსოფლიოს თასი რომ დამთავრდება, ასეთივე კარგ ხასიათზე ვიქნებით."
საქართველოს ნაკრები ერთი დღე დაისვენებს და მერე, პირველი თამაშისთვის მზადებას განაგრძობს. მატჩი 14 სექტემბერს ინვერქარგილში შოტლანდიის ნაკრებთან გაიმართება.
გაზეთ "ლელოს" სპეციალური კორესპონდენტი ახალი ზელანდიიდან ბესიკ ჯანგავაძე
