სენსაციურად დასრულდა ელიტურ, მეორე დივიზიონში მოასპარეზე გურამ კავთიძის "ლიონისა" და ფრანგული რაგბის გრანდის "სტად ფრანსეს" შეხვედრა. მეორედივიზიონელები მრისხანე მეტოქეს არ შეეპუენ და მინიმალური სხვაობით - 13:12 მოუგეს.
პარიზელებმა გაკადნიერებულ მეტოქეს ორი ლელო გაუტანეს, რაზეც ლიონელებმა მხოლოდ ერთით უპასუხეს, თუმცა ჩვენებურის გუნდმა მოწინააღმდეგის უდისციპლინობა კარგად გამოიყენა და ორი საჯარიმოც
დავით ქუბრიაშვილის "ტულონმა", რომელიც მომავალ სეზონს საჩემპიონო ამბიციებით ხვდება, საკონტროლო მატჩი სავარაუდო კონკურენტთან პარიზულ "მეტრო რასინგთან" გამართა და დამაჯერებლად მოუგო - 39:10.
მართალია, ლელო არ გაუტანია, მაგრამ ბრწყინვალედ ითამაშა ქუბრიაშვილმა. "ქუბრიმ", როგორც მას თანაგუნდელები და "ტულონის" ერთგული ქომაგები ეძახიან, შერკინებაში მოწინააღმდეგეებს დიდი პრობლემები შეუქმნა. იმდენად, რომ მის წინააღმდეგ მხოლოდ წესების დარღვევით ახერხებდნენ თამაშს. ინგლისელ მგეზავ ჯონი ვილკინსონს, აბა სხვა რა უნდოდა - საჯარიმოების დარტყმებით გული იჯერა.
ქუბრიაშვილი ძირითად შემადგენლობაში იყო და მეორე ტაიმში შეცვალეს, როცა "ტულონს" საქმე, ფაქტობრივად, მოთავებული ჰქონდა.
კიდევ ერთი მოულოდნელი შედეგი დაფიქსირდა ბრივში, სადაც დავით ხინჩაგიშვილის გუნდმა ელიტურ, პირველ დივიზიონში აღზევებულ ბექა შეყლაშვილის "აჟენს" უმასპინძლა და 12:17 დამარცხდა. ქართველი მორაგბეები თამაშში მეორე ნახევრიდან ჩაერთნენ.
საფრანგეთის ჩემპიონმა, დავით ზირაქაშვილის "კლერმონმა", რომელიც საწვრთნელ შეკრებაზე შვეიცარიაში, ჟენევის ტბის პირას, ქალაქ ნიონში იმყოფება, პირველი საკონტროლო შეხვედრა თანადივიზიონელ "ბურგუენთან" გამართა და 40:20 მოუგო.
კლერმონელებმა მეტოქეს ექვსი ლელო გაუტანეს და საპასუხოდ ორი მიიღეს. ზირაქაშვილმა, რომელიც სეზონს ბრწყინვალე ფორმაში ხვდება, სრულად ითამაშა.
ყველაზე "ქართულმა" ფრანგულმა კლუბმა, მამუკა გორგოძის, გოდერძი შველიძის, გიორგი ჟღენტის, გიორგი ჩხაიძისა და მიხეილ ნარიაშვილის "მონპელიემ" პეზენასში ელიტური, მეორე დივიზიონის დებიუტანტ "კარკასონს" და დიდი ანგარიშით - 56:17 მოუგო.
მონპელიელებისთვის თამაში კარგი ვარჯიში გამოდგა, მათ მეტოქეს რვა ლელო გაუტანეს. ქართველთაგან გორგოძემ, ჩხაიძემ, ჟღენტმა და შველიძემ ითამაშეს.
მორიგ შეხევდრას "მონპელიე" 4 აგვისტოს ანტონ ფეიქრიშვილისა და აქვსენტი გიორგაძის "კასტრათან" გამართავს. სამი დღის შემდეგ კი ბოლო საწვრთნელ მატჩში მეორედივიზიონელ "ორიაკს" დაუპირისპირდება.
"კასტრმა", თავის მხრივ, კიდევ ერთ მეორედივიზიონელს "პოს" უმასპინძლა და, მეტოქის დიდი წინააღმდეგობის მიუხედავად 33:28 მოუგო. ქართველ მორაგბეებს თამაშში მონაწილეობა არ მიუღიათ.
საკონტროლო მატჩები
ლიონი-სტად ფრანსე 13:12, ლა როშელი-ტულუზი 10:29, ბრივი-აჟენი 12:17, კლერმონი-ბურგუენი 40:20, ტულონი-მეტრო რასინგი 39:10, კასტრი-პო 33:28, მონპელიე-კარკასონი 56:17, პერპინიანი-ნარბონი 32:21.
რუმინეთის ჩემპიონატში მეორე ჯგუფური ეტაპის პირველი ტურის მატჩები გაიმართა. ირაკლი ნატრიაშვილის, ბიძინა სამხარაძის, კახაბერ უჩავას, ოთარ ტურაშვილისა და ლაშა თავართქილაძის "ფარული", რომელიც ჩემპიონობისთვის იბრძვის, სტუმრად "ტიმიშოარას" ეთამაშა და 44:13 მოუგო. ამ გამარჯვების შემდეგ ჩვენებურთა გუნდმა სატურნირო ცხრილში ერთი საფეხურით წაიწია და ახლა მესამე ადგილზეა.
აღსანიშნავია, რომ ქართველთა გუნდში პირველად ითამაშეს სამოელმა ახალწვეულებმა, რომლებსაც რუმინელები, სავარაუდოდ, გარუმინელებას უპირებენ. თუმცა ამას ისინი, IღB-ს წესდების თანახმად, მხოლოდ სამი წლის შემდეგ შეძლებენ.
"შავი ზღვის თასის" გათამაშებაში ქართული გუნდების მეტოქე "არადმა" სტუმრად წააგო რუმინეთის ჩემპიონ "ბაია მარესთან" - 13:54 და ახლა 27 ქულით მეხუთე ადგილზეა.
ამავე ტურნირის მონაწილე კიდევ ერთმა კლუბმა, "ბუქარესტმა", რომელიც უმაღლეს დივიზიონში ადგილის შენარჩუნებისთვის იბრძვის, შინ დიდი ანგარიშით დაამარცხა "ბარლადი" - 51:9. "ბუქარესტი" გასავარდნთა დავაში 33 ქულით პირველ ადგილზეა.
რუმინეთი
პლეი ოფი
ბაია მარე-არადი 54:13, სტიაუა-დინამო 32:25, ტიმიშოარა-ფარული 13:44
სატურნირო მდგომარეობა
1. ბაია მარე - 59 ქულა, 2. სტიაუა - 57, 3. ფარული - 45, 4. დინამო - 43, 5. არადი - 27, 6. ტიმიშოარა - 23.
პლეი აუტი
ბუქარესტი-ბარლადი 51:9, იაში-კლუჟი 17:14, შუკეავა-პეტროშანი 22:18.
სატურნირო მდგომარეობა
1. ბუქარესტი - 33 ქულა, 2. იაში - 22, 3. კლუჟი - 16, 4. პეტროშანი - 13, 5. ბარლადი - 10, 6. შუკეავა - 5.
ყოველდღიური სპორტული გაზეთი "ლელო"
