ლიდერთა შორის დიდი სიმჭიდროვეა. პირველ ადგილზე 28 ქულით "მეტრო რასინგია". მართალია, პარიზელებმა "ტულუზთან" წააგეს, მაგრამ ერთი საპრემიო ქულის მოპოვება შეძლეს. ლიდერობაც სწორედ ამის ხარჯზე იგდეს ხელთ. 27-27 ქულა ერთბაშად სამ გუნდს აქვს, "ტულუზს", "ტულონსა" და "მონპელიეს". ამათ ერთი ქულით ჩამორჩება
"სტად ფრანსეს" ყოფილი მწვრთნელის ფაბიენ გალტიეს დამოძღვრილი მამუკა გორგოძის, გიორგი ჟღენტის, გოდერძი შველიძის, გიორგი ჩხაიძისა და მიხეილ ნარიაშვილის "მონპელიე" პარიზში თავის თავს არ ჰგავდა. ჩვენებურთა გუნდი, რომელიც სრულიად დამსხურებულად ლიდერობდა გათამაშებას, მე-20 წუთისთვის 0:17-ს აგებდა. ტაიმი კი სულაც ოცდაოთხქულიანი სხვაობით - 3:27 წააგო.
შესვენების შემდეგ მონპელიელები ოდნავ გამოცოცხლდნენ და ორი ლელოს გატანა შეძლეს. აქედან ერთი, 64-ე წუთზე გორგოძემ მიითვალა. გუნდის სუსტი თამაშის მიუხედავად "გულივერა" ისევ გამორჩეული იყო. ის 75-ე წუთზე პორტუგალიელემა გონსალო უვამ შეცვალა. აღსანიშნავია, რომ გორგოძემ წლევანდელ სეზონში მეორე ლელო გაიტანა და ამ მაჩვნებლითაც გუნდის წამყვან მოთამაშეებს შორისაა.
ჟღენტი ძირითად შემადგენლობაში იყო და 57-ე წუთზე შეცვალეს. შველიძე თამაშში 66-ე წუთიდან ჩაერთო. ჩხაიძეს და ნარიაშვილს არ უთამაშიათ.
ზედიზედ მეოთხე შეხვედრა მოიგო დავით ქუბრიაშვილის "ტულონმა". "სტად დე მაიოლის" ბინადრებმა ამჯერად აქვსენტი გიორგაძისა და ანტონ ფეიქრიშვილის "კასტრი" დაამარცხეს - 22:15. ტულონელთაგან ისევ საუკეთესო იყო მგეზავი ჯონი ვილკინსონი, რომელმაც ოთხი საჯარიმო, ერთი არეკნი და ერთი გარდასახვა გაიტანა (17 ქულა).
ქუბრიაშვილი სათადარიგოთა შორის იყო და თამაშში 76-ე წუთიდან ჩაერთო. გიორგაძეს და ფეიქრიშვილს არ უთამაშიათ.
საფრანგეთის ჩემპიონმა, დავით ზირაქაშვილის "კლერმონმა" იოლად დაამარცხა აუტსაიდერი, ბექა შეყლაშვილის "აჟენი" - 45:19. "ვულკანებმა" მეტოქეს შვიდი ლელო გაუტანეს, აქედან ორი გარემარბ ჟულიენ მალზიოს ანგარიშზეა.
ზირაქაშვილი ძირითად შემადგენლობაში იყო და 69-ე წუთზე შეცვალეს. შეყლაშვილი განაცხადში იყო, თუმცა არ უთამაშია.
დავით ხინჩაგიშვილისა და ვასილ კაკოვინის "ბრივმა" სტუმრად წააგო ერთ-ერთ აუტსაიდერ "ბურგუენთან" - 3:18. აღსანიშნავია, რომ ბრიველებმა, რომლებიც მესამე ტურია ვერ იგებენ, პირველი ტაიმი რაგბისთვის უჩვეულო ანგარიშით 3:0 მოიგეს. მეორე ტაიმში კი მთლიანად მასპინძლები დომინირებდნენ და ჩვენებურთა გუნდმა მონაგარის გაზრდა ვერაფრით შეძლო. "ბრივს" 17 ქულა დაუგრვდა და სახიფათო ზონაში, მე-11 ადგილზეაა.
ხინჩაგიშვილი სათადარიგოთა შორის იყო და მოედანზე 57-ე წუთიდან გამოჩნდა. კაკოვინს არ უთამაშია.
კიდევ ერთხელ გაიბრწყინა საფრანგეთის ნაკრების ქართული წარმოშობის ცხრა ნომერმა დიმიტრი იაშვილმა. ბასკურ დერბიში "იაშიმ" "ბიარიცს" სტუმრად "ბაიონთან" მოაგებინა - 22:19. ოცდაორივე ქულა გუნდს იაშვილმა მოუტანა (ერთი ლელო, ერთი გარდასახვა და ხუთი საჯარიმო).
საფრანგეთის ჩემპიონატში ახლა სამკვირიანი შესვენებაა. მომავალი უქმეებიდან ელიტური, პირველი დივიზიონის გუნდები ევროთასების გათამაშებაში ჩაებმებიან. "ჰეინეკენის" თასზე სამი "ქართული გუნდი"- "კასტრი", კლერმონი" და "ტულონი" ითამაშებს. "მონპელიე", "აჟენი" და "ბრივი" კი "ემლინ ჩელენჯ კაპისთვის" იბრძოლებენ.
გასულ უქმეებზე შესვენება იყო ელიტურ, მეორე დივიზიონში. მე-6 ტურის შეხვედრები აქ 9 ოქტომბერს გაიმართება.
დასრულდა რუმინეთის სარაგბო ჩემპიონატი, სადაც ქართველი მორაგბეების, ბიძინა სამხარაძის, ლაშა თავართქილაძის, ირაკლი ნატრიაშვილის, ოთარ ტურაშვილის და კახაბერ უჩავას "ფარულმა" ისევ მესამე ადგილი დაიკავა. ბრინჯაოს მედლებისთვის მატჩში კონსტანცელებმა ბუქარესტის "დინამო" 28:19 დაამარცხეს. უჩავას გარდა ყველა ძირითად შემადგენლობაში იყო, ტურაშვილი და თავართქილაძე მეორე ტაიმში შეცვალეს.
ჩემპიონი კი ისევ "ბაია მარე" გახდა, რომელმაც ფინალში "სტიაუას" მოუგო - 28:21.
საფრანგეთი. I დივიზიონი
IX ტური
ტულონი-კასტრი 22:15, პერპინიანი-ლა როშელი 21:16, კლერმონი-აჟენი 45:19, სტად ფრანსე-მონპელიე 30:13, ბურგუენი-ბრივი 18:3, ტულუზი-მეტრო რასინგი 28:23, ბაიონი-ბიარიცი 19:22.
სატურნირო მდგომარეობა
1. მეტრო რასინგი - 28 ქულა, 2. ტულუზი - 27, 3. ტულონი - 27, 4. მონპელიე - 27, 5. პერპინიანი - 26, 6. კლერმონი - 24, 7. სტად ფრანსე - 23, 8. ბაიონი - 23, 9. ბიარიცი - 23, 10. კასტრი - 19, 11. ბრივი - 17, 12. ლა როშელი - 13. ბურგუნი - 10, 14. აჟენი - 7.
X ტური. 23 ოქტომბერი
კასტრი-აჟენი, მეტრო რასინგი-ბაიონი, ბიარცი-კლერმონი, მონპელიე-ბურგუენი, ლა როშელი-ბრივი, ტულუზი-პერპინიანი, სტად ფრანსე-ტულონი
ყოველდღიური სპორტული გაზეთი
"ლელო"
