"ჰაინეკენის თასის" გათამაშების ჯგუფური ეტაპი დასრულდა. მეოთხედფინალში გასული რვა გუნდიდან ორი ირლანდიურია, სამი ფრანგული და ამდენივე ინგლისური. მოწინავეთა შორის ვერ მოხვდნენ უელსური, შოტლანდიური და იტალიური კლუბები. ცხადია, ზემოთ მოყვანილი სტატისტიკა გარკვეული ტენდენციის მაჩვენებელია. შარშან ამავე ეტაპზე უელსური და შოტლანდიური კლუბებიც თამაშობდნენ. მეტიც, მაშინ "ედინბურგმა", რომელსაც საქართველოს ნაკრების ყოფილი დამრიგებელი მაიკ ბრედლი წვრთნის, კლუბის ისტორიაში პირველად ნახევარფინალში გააღწია.
წლეულს ასევე პირველად გავიდა პლეი ოფში ფრანგული "მონპელიეც", რომელშიც სამი ქართველი მორაგბე: მამუკა გორგოძე, მიხეილ ნარიაშვილი და გიორგი ჟღენტი თამაშობს.
აღსანიშნავია, რომ მეოთხედფინალში
"კლერმონმა", სადაც დავით ზირაქაშვილი და ვიქტორ კოლელიშვილი ირჯება, ექვსი თამაშიდან ექვსივეში გაიმარჯვა და ჯგუფური ტურნირი დამაჯერებლად მოიგო.
არადა ჯგუფი, რომელშიც "ვულკანები" წილისყრის შედეგად მოხვდნენ, ყველაზე ძლიერად ითვლებოდა. ფრანგული კლუბის მეტოქეები "ჰაინეკენის თასის" ამჟამინდელი მფლობელი ირლანდიური "ლენსტერი", უელსური "ჰლანეჰლი" და ინგლისური "ექსეტერი" იყვნენ.
კლერმონელებმა ყველა მეტოქეს ერთი ამოსუნთქვით "გადაუარეს" და ტურნირის პირველი ეტაპი საუკეთესო მაჩვენებლებით დაასრულეს.
მათი მეტოქე მეოთხედფინალში ასევე ფრანგული "მონპელიე" იქნება, რომელმაც E ჯგუფში ბოლომდე იბრძოლა და, როგორც საუკეთესო მეორე ადგილის მფლობელი, პლეი ოფში გავიდა.
"კლერმონი" მონპელიელებს შინ მიიღებს და, რადგან საკუთარ კედლებში "ვულკანები", ფაქტობრივად, უძლეველნი არიან, გამარჯვებულის ვინაობის გამოცნობა ძნელი არ უნდა იყოს.
მოდით, ნუ ვიჩქარებთ. მეოთხედფინალი, რომელიც ერთი მატჩისგან შედგება, აპრილის პირველ დეკადაშია დანიშნული და იქამდე ყველაფერი შეიძლება რადიკალურად შეიცვალოს.
ასეა თუ ისე, ფაქტია, რომ "კლერმონი" წლევანდელი გათამაშების ფავორიტია. ყოველ შემთხვევაში, ფინალში გასვლა ახალზელანდიელი თავკაცის, ვერნ კოტერის სამწყსოს არ უნდა გაუჭირდეს. მით უფრო, რომ "მონპელიესთან" გამარჯვების შემთხვევაში, "ვულკანები" ნახევარფინალში ისევ შინ ითამაშებენ. მეტოქე აქ ინგლისურ "ჰარლიქვინზსა" და ირლანდიურ "მანსტერს" შორის გამარჯვებული იქნება.
ცხადია, იოლი არც ერთი მეტოქის დამარცხებაა. ისიც გასათვალისწინებელია, რომ "ჰარლიქვინზი" ერთადერთი გუნდია, რომელმაც "კლერმონის" მსგავსად, ჯგუფური ეტაპი დაუმარცხებლად განვლო. თუმცა ფრანგულ კლუბს უფრო მეტად გაუმართლა, რადგან ფინალამდე სულ შინ უწევს თამაში.
ამ თვალსაზრისით, "კლერმონთან" ერთად პრივილეგირებულ მდგომარეობაშია A ჯგუფის გამარჯვებული ინგლისური "სარასენზი", რომელიც ქვეყნის მოქმედი ჩემპიონია. ეს კლუბი მეოთხედფინალში შინ ირლანდიურ "ალსტერს" დაუპირისპირდება, რომელიც წლეულს შესანიშნავ ფორმაშია და "კელტთა ლიგაში" დამაჯერებლად ლიდერობს.
ირლანდიელებმა "ჰაინეკენის თასის" გათამაშების ჯგუფურ ტურნირშიც შესანიშნავად იასპარეზეს, ექვსი თამაშიდან ხუთი მოიგეს და D ჯგუფში პირველ ადგილზე გავიდნენ.
"სარასენზი" საკუთარ მოედანზე "ალსტერის" დამარცხების შემდეგ ფრანგულ "ტულონსა" და ინგლისურ "ლესტერ ტაიგერზს" შორის გამარჯვებულს ისევ შინ დაუხვდება და, ცხადია, "კლერმონის" მსგავსად, ყველაზე მეტი შანსი აქვს, ფინალში გააღწიოს.
თავის მხრივ, დიდი ამბიციები აქვთ ტულონელებსაც. ამ კლუბის მულტიმილიონერმა პრეზიდენტმა მურად ბურჯელალმა გუნდში საპენსიო ასაკის ყველა ვარსკვლავს მოუყარა თავი და საფრანგეთის ჩემპიონობასთან ერთად, ევროთასებზე ტრიუმფალურად ასპარეზობაც დაუსახავს მიზნად.
ერთი სიტყვით, ფინალი 18 მაისს დუბლინში, "ავივა სთედიუმზე" გაიმართება და იქ გაირკვევა, რომელი ქვეყნის საკლუბო რაგბია უკეთესი.
1/4-ფინალი
ჰარლიქვინზი-მანსტერი
კლერმონი-მონპელიე
ტულონი-ლესტერ ტაიგერსზი
სარასენზი-ალსტერი
(იბეჭდება მცირე ცვლილებით)
ყოველდღიური სპორტული გაზეთი "ლელო"
