სხვა საკითხია, რამდენად გამართლებული იყო მასპინძელთა მხრიდან ახალ ზელანდიასთან გახსნილი თამაში. "კივები" ის გუნდია, რომელთანაც პირიქით, თამაში უნდა შეკრა, დაცვა გაუვალი კედელივით აღმართო და ეცადო, მეტოქეს ბურთი არაფრით დაუთმო. "ვოლაბები" ასე არ მოიქცნენ. რობი დინსი შეეცადა,
ანგარიში "ვოლაბებმა" მე-3 წუთზე მეთ გიტოს საჯარიმოთი გახსნეს, რაზეც ახალზელანდიელთა მგეზავმა დენ კარტერმა სამ წუთში საჯარიმოთივე უპასუხა - 3:3.
მომდევნო ექვს წუთში თავბრუდამხვევი მოვლენები განვითარდა, გუნდებმა ორ-ორი წუთის ინტერვალით სამი ლელო გაიტანეს. მე-7 წუთზე ანგარიშში ავსტრალიელები დაწინაურდნენ. კარტერი საკუთარი ოცდაორმეტრიანი ზონიდან ბურთის ფეხით გამოტანას ცდილობდა, მაგრამ "ვოლაბების" გარემარბმა დრიუ მიტჩელმა დაუფარა. ბურთი "ოლ ბლექსის" ლელოსკენ გაგორდა. მიტჩელი დროულად გაერკვა ვითარებაში, ბურთი აიტაცა, ლელოსკენ სწრაფად დაიძრა, ისე, რომ "ოლ ბლექსის" გარემარბმა ჯო როკოთოკომ და კარტერმა მისი შეჩერება ერთობლივადაც ვეღარ შეძლეს. გიტომ გარდასახვა ვერ გაიტანა - 8:3.
კარტერმა დანაშაული ორ წუთში გამოისყიდა. ამჯერად საკუთარი ოცდაორმეტრიანი ზონიდან ბურთის ფეხით გამოტანა ავსტრალიელთა შუამარბმა ბერიკ ბარნსმა სცადა. კარტერმა დაუფარა და მასაც გაუმართლა, ბურთი პირდაპირ ლელოსკენ გაგორდა. კარტერი მას ზედ ხაზთან წამოეწია და ჩათვლის მოედნში შეიტანა. გარდასხვაც თვითონ გაიტანა - 10:8.
აი, კიდევ ორ წუთში ახალზელანდიელების მიერ გატანილი ლელო კი ნამდვილი შედევრი იყო. "კივებმა" მოედნის საკუთარი ნახევრიდან ბურთი ხელდახელ გამოათამაშეს. ორი რაკის შემდეგ მოედნის ცენტრი გადმოკვეთეს და მარჯვენა ფრთიდან შეუტიეს. გარემარბი კორი ჯეინი ორი მოწინააღმდეგისგან გათავისუფლებას ცდილობდა, მაგრამ ავსტრალიელებმა იძალეს და ის იყო, ახალზელანდიელი გვერდით ხაზს მიღმა უნდა გადაეყვანათ, რომ ჯეინმა მოასწრო და ბურთი ფეხით "ვოლაბების" ლელოსკენ გადაჰკიდა. აქ კი ყველას უკნიდან შეტევაში ჩართულმა ფულბეკმა მალილი მულიაინამ დაასწრო და ლელო ისე გაიტანა, წინააღმდეგობა არ შეხვედრია. კარტერმა გარდასახვა არაზუსტად დაარტყა - 15:8.
ამას შვიდ წუთში გიტომ საჯარიმოთი გასცა პასუხი და ანგარიშში სხვაობა ოთხ ქულამდე შეამცირა - 11:15. ავსტრალიელებს დაწინაურებაც შეეძლოთ, მაგრამ პირიქით კი მოხდა. 25-ე წუთზე უხეშად შეცდა "ვოლაბების" ფულბეკი ადამ ეშლი-კუპერმი. მან კარტერის მიერ ფეხით დარტყმული ბურთი საკუთარ ოცდაორმეტრიან ზონაში დაიჭირა. ახალზელანდიელებმა ხაზი სწრაფად ამოსწიეს, ჩახურვაზე ბრწყინვალედ ითამაშეს, ისე რომ ეშლი-კუპერმა ვერც თვითონ შეძლო შეტევაზე გადასვლა და არც იმის საშუალება მიეცა, ბურთი ფეხით თუნდაც აუტში გადაეტანა.
ეშლი-კუპერი იქვე შებოჭეს, მას რაკში ბურთი წინ გაუვარდა, რომელიც იქვე მიმყოლმა "კივების" კაპიტანმა რიჩი მაკქოუმ აიტაცა და მეტოქის ლელოსკენ დაუცველი, მოკლე ფრთიდან დაიძრა. მისი დაჭერა მასპინძლებმა ვეღარ შეძლეს. კარტერმა ამჯერად გარდასხვა ზუსტად დაარტყა - 22:11.
გიტომ ამ ლელოსაც სამ წუთში საჯარიმოთი უპასუხა - 14:22, რასაც კარტერის კიდევ ერთი საჯარიმო და გარემარბ კორი ჯეინის ლელო მოჰყვა - 32:14.
18-ქულიანი ჩამორჩენის აღმოფხვრა ახალ ზელანდიის ნაკრებთან, ურთულესი, თითქმის შეუძლებელი საქმეა. თუმცა "ვოლაბებს" საამისოდ ცდა არ დაუკლიათ. მას შემდეგაც კი, როცა 44-ე წუთზე არბიტრმა დრიუ მიტჩელს მეორედ უჩვენა ყვითელი ბარათი და მოედანი მატჩის ბოლომდე დაატოვებინა. მასპინძლები 36 წუთის განმავლობაში კაცნაკლულნი თამაშობდნენ, თუმცა გუნდის საბრძოლო, შემტევ განწყობას ეს ოდნავაც არ დასტყობია.
47-ე წუთზე სტუმრებმა შეტევისას კარგად ისარგებლეს მარჯვენა, გრძელ ფრთაზე მიღებული რიცხობრივი უპირატესობით და იუბილარმა მულიაინამ, რომელსაც იმ დღეს 30 წელი შეუსრულდა, მეროე ლელო მიითვალა. კარტერმა გარდასახა და ანგარიშში სხვაობა 25 ქულამდე გაიზარდა - 39:14.
სასწაული უნდა მომხდარიყო, ახალ ზელანდიას ეს მატჩი რომ წაეგო. ალბათ, სწორედ ამიტომ იყო, რომ "კივებმა" ტაქტიკა შეცვალეს და მატჩის დასრულებამდე დარჩენილი დრო, ფაქტობრივად, დაცვაში თამაშის ვარჯიშს დაუთმეს. "ვოლაბებმა" რიცხობრივ უმცირესობაში ყოფნის მიუხედავად, მაინც შეძლეს ორი ელოს გატანა, რაზეც კონტრშეტევაზე მოთამაშე ახალზელანდიელებმაც ორით უპასუხეს - 49:28.
სამი ერის მომდევნო შეხვედრა ისევ ამ გუნდებს შორის 7 აგვისტოს ახალ ზელანდიაში, ქრაისთჩერჩში გაიმართება, სტადიონზე, სადაც მომავალი წლის 18 სექტემბერს საქართველოს ნაკრები მსოფლიო თასის ჯგუფურ ეტაპზე ინგლისის ნაკრებს დაუპირისპირდება.
სატურნირო მდგომარეობა
თ მ ფ წ ბ ქ
1. ახ.ზელანდია 3 3 0 0 +55 15
2. ავსტრალია 2 1 0 1 -4 4
3. ს.აფრიკა 3 0 0 3 -51 0
სამი ერი
7 აგვისტო
ახალი ზელანდია-ავსტრალია
21 აგვისტო
სამხრეთ აფრიკა-ახალი ზელანდია
28 აგვისტო
სამხრეთ აფრიკა-ავსტრალია
4 სექტემბერი
სამხრეთ აფრიკა-ავსტრალია
11 სექტემბერი
ავსტრალია-ახალი ზელანდია
ავსტრალია-ახალი ზელანდია 28:49
ავსტრალია (15-9) ეშლი-კუპერი, ოკონორი, ჰორნი (ბეილი 56), ბარნსი, მიტჩელი, გიტო (ე.ფაინგაა 77), გენია (ბარჯესი 76). (1-8) რობინსონი, მური (ს.ფაინგაა 48), მააფუ (სლიპერი 60), მამი, შარპი (საიმონსი 48), ელსომი, პოკოქი, ბრაუნი.
3ლ: ელსომი, მიტჩელი, ეშლი-კუპერი. 3ს,2გ: გიტო.
გაძევება: მიტჩელი
ახალი ზელანდია (15-9) მულიაინა, ჯეინი (დაგი 76), სმითი, ნონუ (კრადენი 71), როკოთოკო, კარტერი, ქოუანი (ვიპუ 33). (1-8) ვუდკოქი, მეალამუ (ფლინი 71), ო.ფრენქსი (ბ.ფრენქსი 43), თორნი (ვაითლოქი 58), დონელი (ვიტო 76), კაინო, მაკქოუ, რიდი.
7ლ: მულიაინა (2), კარტერი, მაკქოუ, როკოთოკო, ჯეინი, ფლინი. 4გ,2ს: კარტერი.
მსაჯი: კრეიგ იუბერი (ს.აფრიკა)
ყოველდღიური სპორტული გაზეთი "ლელო"
