ქარის თასი - ფინალი ნახევარფინალში

ქარის თასის რეგულარული გათამაშება რამდენი ტურით ადრე მოიგო დურბანის "ნატალ შარქსმა". გასარკვევი მხოლოდ პლეი ოფის მონაწილეთა ვინაობა იყო. ბოლო ტურის წინ ნახევარფინალში გასვლის თეორიულ შანსს იოჰანესბურგის "ლაიონზი" ინარჩუნებდა, მაგრამ "ლომებმა" შინ სენსაციურად წააგეს ერთ-ერთ აუტსაიდერ "პუმასთან" - 27:34 და მეხუთე ადგილს დასჯერდნენ.

დიდ ინტერესს იწვევდა ორი ლიდერის, "ვესტერნ პროვანსისა" და "ნატალ შარქსის" დაპირისპირება კეიპთაუნში. დასავლელებს აუცილებლად უნდა მოეგოთ, მეორე ადგილი რომ დაეკავებინათ და ნახევარფინალში ისევ "ნატალ შარქსს" არ შეხვედროდნენ. მასპინძლებს უმოტივაციო "ზვიგენების" დამარცხება დიდად არ გასჭირვებიათ - 33:21.

კვლავ ასპროცენტიანი მაჩვენებელი ჰქონდა "ვესტერნ პროვანსის" მგეზავ ვილემ დე ფაალს, მან სამი გარდასახვა და ოთხი საჯარიმო გაიტანა (18 ქულა).

ამ გუნდების მეტოქეები დარჩენილ ორ შეხვედრას უნდა გაერკვია. ბლუმფონტეინის "ჩიტაზმა" სტუმრად აუტსაიდერი "ლეოპარდსი" გაანადგურა - 78:7 და მესამე ადგილი შეინარჩუნა. ჩიტაზელებმა 12 ლელო გაიტანეს, აქედან ორ-ორი ფილ სნიმანის, იოზეფ დანიერის და კორნი იუისის ანგარიშზეა. ამრიგად, "ჩიტაზის" მეტოქე ნხევარფინალში "ვესტერნ პროვანსი" იქნება.

მეორე ნახევარფინალში კი შარშანდელი ფინალისტები დაწყვილდნენ. ჩემპიონი "ბლუ ბულზი" პირველადგილოსან "ნატალ შარქსს" დაუპირისპირდება. პრეტორიელებმა სტუმრად "გრიკასს" მოუგეს - 48:36. გუნდებმა 12 ლელო გაიტანეს, აქედან შვიდი "ლურჯი ხარების" ანგარიშზეა.

XIV ტური

ლეოპარდსი-ჩიტაზი 7:78, ლაიონზი-პუმასი 27:34, გრიკასი-ბლუ ბულზი 36:48, ვეტერნ პროვანსი-ნატალ შარქსი 33:21

საბოლოო მდგომარეობა
1. ნატალ შარქსი - 52 ქულა, 2. ვესტერნ პროვანსი - 48, 3. ჩიტაზი - 47, 4. ბლუ ბულზი - 47, 5. ლაიონზი - 39, 6. გრიკასი - 37, 7. პუმასი - 23, 8. ლეოპარდსი - 5

პლეი ოფი
16 ოქტომბერი
ნატალ შარქსი-ბლუ ბულზი, ვესტერნ პროვანსი-ჩიტაზი

ფინალი. 30 ოქტომბერი