მასპინძლები უპირატესობას თავიდანვე დაეუფლნენ და პირველი ტაიმი მშრალი ანგარიშით - 16:0 მოიგეს. ერთი ლელო ალექს ბრედლიმ გაიტანა, გარდასხვა რენატა ტრენტის ანგარიშზეა, რასაც კიდევ სამი საჯარიმო მიუმატა.
შესვენების შემდეგ ქენთერბერელთა მგეზავმა კოლინ სლეიდმა ორი საჯარიმოთი სხვაობა ათ ქულამდე შეამცირა, თუმცა ვაიკატოელი ფულბეკის ანესი სოსენის ლელომ მატჩის ბედი საბოლოოდ გადაწყვიტა.
"ქენთერბერი" 45 ქულით პირველ
პლეი ოფში მოსახვედრად "ოკლენდმა" აუცილებლად უნდა მოიგოს. როგორც ოკლენდელთა მთავრმა მწვრთნელმა მარკ ანსკომბემ თქვა:
"ჩათვალეთ, რომ "ტასმანთან" მატჩი მეოთხედფინალური შეხვედრაა. ძალიან გაგვიმართლა, შინ რომ ვთამაშობთ, მაგრამ ეს საკმარისი არ არის. მეტოქის დასამარცხებლად ყველაფერი უნდა ვიღონოთ".
"ოკლენდს" ტრავმების გამო ექვსი წამყვანი მოთამაშე აკლია, თუმცა გუნდმა თითქმის მთელი სეზონი მათ გარეშეც ძალიან მაღალ დონეზე ჩაატარა.
მართალია, "ტასმანი" მე-11 ადგილზეა, მაგრამ გუნდმა ბოლო ორი შეხვედრა მოიგო და ეცდება, რეგულარული გათამაშება ამაღლებულ ნოტაზე დაასრულოს.
პლანეტრაგბის პროგნოზით, "ოკლენდი" პლეი ოფში გასვლის შანსს ხელიდან არ გაუშვებს და მეტოქეს მინიმუმ შვიდი ქულით მოუგებს.
პლეი ოფში ვერ მოხვდა "ბეი ოფ პლენტი", რომელიც ბოლო ტურში სტუმრად დამარცხდა უმოტივაციო, მეათეადგილოსან "ნორთლენდთან" - 24:36. პირველი ტაიმი გარდამავალი უპირატესობით წარიმართა, თუმცა მასპინძლებმა მაინც იძალეს და ტაიმი სამი ქულის სხვაობით მოიგეს - 17:14.
"ნორთლენდმა" გადამწყვეტ უპირატესობას ბოლო ოც წუთში მიაღწია, როცა ექვსწუთიანი შუალედებით მეტოქეს სამი ლელო გაუტანა.
პლეი ოფში მოხვედრის შანსს ინარჩუნებენ "ველინგტონი" და "ტარანაკი". ორივე რეგულარული გათამაშების ბოლო ტურის შეხვედრებს სტუმრად გამართავს.
"ველინგტონი", რომელსაც 38 ქულა აქვს და მე-4 ადგილზეა, სტუმრად ითამაშებს მეშვიდეადგილოსან "საუთლენდთან". სამხრეთელებს 34 ქულა აქვთ და პლეი ოფში მოხვედრის თეორიულ შანსს ინარჩუნებენ, ანუ "საუთლენდმა" მეტოქე ისე უნდა დაამარცხოს, რომ ოთხი ლელო გაუტანოს და ერთი საპრემიო ქულაც ირგუნოს. ამასთან, ყველამ, ვინც სატურნირო ცხრილში მის წინაა, უნდა წააგოს.
მოვლენათა ასეთი განვითარება ნაკლებად სავარაუდოა, რადგან "საუთლენდს" რთული დროება დაეწყო. ბოლო სამი თამაში წააგო და ტრავმის გამო მგეზავი პირი ვიპუც გამოაკლდა. თანაც, სტატისტიკაც "ველინგტონის" მხარესაა. "საუთლენდმა" მეტოქე ბოლოს 2002 წელს დაამარცხა შინ - 22:20.
პლეი ოფის კიდევ ერთი პრეტენდენტი "ტარანაკი", რომელიც 37 ქულით მე-6 ადგილზეა, სტუმრად ეთამაშება მეთორმეტეადგილოსან "ნორთ ჰარბორს". ტარანაკელებს აუცილებლად ხუთი ქულის აღება სჭირდებათ. საგულისხმოა, რომ "ტარანაკის" მეტოქე ისე არასდროს დაუმარცხებია, რომ საპრემიო ქულაც რგებოდა.
"პლეი ოფში გასვლის რეალური შანსი გვაქვს. საამისოდ "ნორთ ჰარბორთან" ხუთი ქულა უსიკვდილოდ უნდა ავიღოთ. ჩვენ ამის გაკეთება შეგვიძლია, მთავარია, პოტენციალი ბოლომდე გამოვიყენეოთ," - თქვა "ტარანაკის" მთავარი მვწრთნელის თანაშემწე ლეო კროულიმ.
XIII ტური
ნორთლენდი-ბეი ოფ პლენტი 36:24, ვაიკატო-ქენთერბერი 26:6, საუთლენდი-ველინგტონი, ნორთ ჰარბორი-ტარანაკი, ოტაგო-მანავატუ, მანუკაუ-ჰოუქს ბეი, ოკლენდი-ტასმანი.
სატურნირო მდგომარეობა
1. ქენთერბერი - 45 ქულა, 2. ვაიკატო - 44, 3. ოკლენდი - 40, 4. ველინგტონი - 38, 5. ბეი ოფ პლენტი - 37, 6. ტარანაკი - 37, 7. საუთლენდი - 34, 8. მანუკაუ - 29, 9. ჰოუქს ბეი - 28, 10. ნორთლენდი - 28, 11. ტასმანი - 20, 12. ნორთ ჰარბორი - 19, 13. მანავატუ - 13, 14. ოტაგო - 10.
29 ოქტომბერი, ნახევარფინალი
5 ნოემბერი, ფინალი
