45 ქულა და 32,7 ათასი $ - ბასილაშვილმა ცინცინატის მასტერსი მოგებით დაიწყო

საქართველოს პირველმა ჩოგანმა ნიკოლოზ ბასილაშვილმა (65) წარმატებით დაიწყო თამაში ცინცინატიში მასტერსის სერიის ტურნირ Western & Southern Open-ზე, რომლის საპრიზო ფონდი ვაჟთა შორის 4,97 მილიონი დოლარია.

ჩვენებური პირველ წრეში ხორვატ ბორნა ჩორიჩს (50) ხვდებოდა. ქართველმა თითქმის ორ საათში, ორ სეტში იმარჯვა - 6:3, 7:6 (5). პირველი სეტი ქულა-ქულაში მიმდინარეობდა, სანამ 4:3 გახდებოდა ნიკოლოზის სასარგებლოდ, აქ კი ხორვატმა საკუთარ მოწოდებაზე სუსტად ითამაშა და ბასილაშვილმაც მეოთხე ბრეიკ-პოინტით შეძლო გადამწყვეტი უპირატესობის მოპოვება.

კიდევ უფრო თანაბარი გამოდგა მეორე სეტი, რომელშიც საკუთარი მოწოდების მოგებას ორივე ახერხებდა, თუმცა ორივე გაჭირვებით. ბასილაშვილმა 6, ხოლო ჩორიჩმა 4 ბრეიკ-პოინტი ვერ გამოიყენა და ყველაფერი ტაი-ბრეიკში გადაწყდა, რომელშიც ჩვენებურმა უკეთესად ითამაშა და 7:5 იმარჯვა.

მაშ ასე, ნიკოლოზ ბასილაშვილი მეორე წრეში გავიდა, სადაც კიდევ უფრო გაუმართლა იმის გამო, რომ მე-6 ნომრად განთესილი მილოშ რაონიჩი ტურნირიდან მოიხსნა. წესით, სწორედ დასვენებული კანადელი უნდა შეხვედროდა ბასილაშვილი-ჩორიჩის წყვილის გამარჯვებულს. ახლა კი ბასილაშვილის მეტოქე ამერიკელი კრისტიან ჰარისონი (240) იქნება, როგორც საკვალიფიკაციო ბადეში იღბლიანი დამარცხებული. ქართველს და ამერიკელს ერთმანეთთან არასოდეს უთამაშიათ.

ამ მოგებით ქართველმა ჩოგბურთელმა 45 სარეიტინგო ქულა და 32,7 ათასი დოლარი გაინაღდა. თუ მეორე წრესაც გადალახავს, ბასილაშვილი 90 ქულასა და 62,1 ათას დოლარს შეიმატებს.

(იბეჭდება მცირე ცვლილებით)
ყოველდღიური სპორტული გაზეთი "ლელო"