ერთის მხრივ, ფინეთის რალი პროგნოზისამებრ დასრულდა - "ფორდის" მანქანით ფინელმა პილოტმა გაიმარჯვა, მაგრამ მეორეს მხრივ, ყველას იმედი ჰქონდა, რომ პირველ ადგილზე მიკო ჰირვონენს იხილავდა, მით უმეტეს, მსოფლიოს ვიცე-ჩემპიონმა ჩემპიონატის მერვე ეტაპი ძალიან დამაჯერებლად დაიწყო და უკვე მეორე სპეცმონაკვეთის შემდეგ ლიდერი გახდა, ცოტა ხანში კი უფრო გაზარდა კონკურენტებთან უპირატესობა.
სამწუხაროდ, ამით ფინელი პილოტისთვის ყველაფერი დასრულდა - მან ერთ ეპიზოდში წარუმატებელი ნახტომი შეასრულა და ჰირვონენის "ფორდი" რამდენჯერმე გადაბრუნდა. მიკომ ბრძოლის გაგრძელება სცადა, მაგრამ მექანიკოსებმა მისი მანქანის შეკეთება ვერ შეძლეს და ფინეთის რალის
სამაგიეროდ, ადგილობრივი პუბლიკა გაახარა იარი-მატი ლატვალამ. ამ შესანიშნავმა, მაგრამ არასტაბილურმა მრბოლელმა ამჯერად ყველაფერი უშეცდომოდ გააკეთა. რაც მთავარია, მან გაუძლო ჩემპიონატის ორი ლიდერის - სებასტიან ლოებისა და სებასტიან ოჟიეს ზეწოლას, რაც მის გამარჯვებას კიდევ უფრო ღირებულსა და მნიშვნელოვანს ხდის. ეს ტრიუმფი განსხვავდება იმისგან, რომელსაც ლატვალამ ახალ ზელანდიაში მიღწია. იქ მას ოჟიემ აჩუქა მოგება, რომელიც ფინიშამდე სამი მოსახვევით ადრე შეცდა, აქ კი ყველაფერი სხვანაირად იყო. მართალია, ლატვალა ჰირვონენის ავარიას უნდა უმადლოდეს, მაგრამ დანარჩენ შემთხვევაში ყველაფერი მისმა მაღალმა კლასმა გადაწყვიტა.
პოდიუმზე ორი სუპერ-ფრანგი ავიდა. ლოებმა და ოჟიემ შესანიშნავი რბოლა აჩვენეს მათთვის არამშობლიურ მხარეში, მაგრამ შთაბეჭდილება გააფუჭა პეტერ სოლბერგის სიტყვებმა. ნორვეგიელმა განაცხადა, რომ "სიტროენის" პილოტებმა გუნდური ტაქტიკა გამოიყენეს, თუმცა ეს ჩრდილს არ აყენებს ფრანგების გამოსვლას.
ამჯერად ვერ გაგვაკვირვა კიმი რაიკონენმა. მართალია, სპეცმონაკვეთებზე ის რეგულარულად ხვდებოდა ათეულში, მაგრამ გადამწყვეტი აღმოჩნდა ორი შეცდომა, რომელმაც ფინელს საშინაო ეტაპზე 12 წუთი დააკარგვინა და ქულათა ზონის მიღმა დატოვა.
VIII ეტაპი. ფინეთის რალი
1. იარი-მატი ლატვალა (ფინეთი, "ფორდი") - 2:31.29,6; 2. სებასტიან ოჟიე (საფრანგეთი, "სიტროენი") - +10,1; 3. სებასტიან ლოები (საფრანგეთი, "სიტროენი") - +26,0; 4. პეტერ სოლბერგი (ნორვეგია, "სიტროენი") - +30,7; 5. დანიელ სორდო (ესპანეთი, "სიტროენი") - +1.45,0; 6. მეტიუ უილსონი (ბრიტანეთი, "სიტროენი") - +5.43,7; 7. მადს ოსტბერგი (ნორვეგია, "სუბარუ") - +5.50,8; 8. იუჰა კანკუნენი (ფინეთი, "ფორდი") - +7.49,0; 9. იუჰო ჰანინენი (ფინეთი, "შკოდა") - +9.05,0; 10. პერ-გუნარ ანდერსონი (შვედეთი, "შკოდა") - +10.15,7...
საერთო ჩათვლა
1. სებასტიან ლოები (საფრანგეთი, "სიტროენი") - 166 ქულა; 2. სებასტიან ოჟიე (საფრანგეთი, "სიტროენი") - 118; 3. იარი-მატი ლატვალა (ფინეთი, "ფორდი") - 105; 4. პეტერ სოლბერგი (ნორვეგია, "სიტროენი") - 90; 5. მიკო ჰირვონენი (ფინეთი, "ფორდი") - 86; 6. დანიელ სორდო (ესპანეთი, "სიტროენი") - 77; 7. მეტიუ უილსონი (ბრიტანეთი, "სიტროენი") - 48; 8. ფედერიკო ვილაგრა (არგენტინა, "ფორდი") - 26; 9. ჰენინგ სოლბერგი (ნორვეგია, "ფორდი") - 25; 10. მადს ოსტბერგი (ნორვეგია, "სუბარუ") - 16...
