სამიოდე კვირაც და წყალბურთელ ვაჟთა 2012 წლის ევროპის ჩემპიონატის საკვალიფიკაციო ეტაპიც დამთავრდება. საქართველოს ნაკრები ზვიად დავითიანის ხელმძღვანელობით მონდომებით ემზადება გადამწყვეტი ორთაბრძოლისთვის, რომელიც 2 ივლისს მანჩესტერში დიდი ბრიტანეთის ნაკრებთან გაიმართება. ამჟამად ჩვენს ბიჭებს ორჯერადი ვარჯიშები აქვთ ოლიმპიკის აუზში. საწყლოსნო სახეობათა ეროვნული ფედერაციის პრეზიდენტმა ალექსანდრე ბითაძემ გვითხრა, რომ საქართველოს წყალბურთელები რეპეტიციებს 24-26 ივნისს თბილისის საერთაშორისო ტურნირზე გაივლიან. საასპარეზოდ აზიის წლევანდელი ჩემპიონები - ყაზახეთის ნაკრების წევრები (მათ უკვე მოიპოვეს 2012 წლის ლონდონის ოლიმპიადის საგზური) და ბელარუსები გვეწვევიან. უკრაინელებიც უნდა ჩამოსულიყვნენ, მაგრამ, ობიექტური მიზეზებით,
რაც შეეხება ევროპის ჩემპიონატის საკვალიფიკაციო ეტაპს, E ჯგუფში ორი შეხვედრაა გასამართავი. 18 ივნისს ბერძნები ბრიტანელებს მიიღებენ. 2012 წლის ოლიმპიადის მასპინძლებმა ელინებთან პირველი ორთაბრძოლა შინ 2:13 დათმეს და არა გვგონია, ჯგუფის ფავორიტებთან ათენში წარმატებას მიაღწიონ. კუნძულელებს შესარჩევი ტურნირის მეორე მატჩი თბილისში საქართველოს ნაკრებთან აქვთ წაგებული - 3:9, ამიტომ ჩვენს ბიჭებს მანჩესტერში 5-ბურთიანი სხვაობით წაგებაც ხელს აძლევთ მომდევნო ეტაპზე გასასვლელად. ჯგუფში მე-2 ადგილის დაკავების შემთხვევაშიც 1 და 29 ოქტომბერს პლეი ოფებში ვითამაშებთ კონტინენტის 12 საუკეთესო გუნდში მოსახვედრად.
დღეისთვის E ჯგუფში ასეთი ვითარებაა:
თ მ წ ბ ქ
საბერძნეთი 3 3 0 40:16 9
საქართველო 3 1 2 23:30 3
დ. ბრიტანეთი 2 0 2 5:22 0
