სამი ქართველი ჩოგბურთელი მონაწილეობდა ქალთა საერთაშორისო ტურნირებში, რომლებსაც საფრანგეთი, იტალია და უზბეკეთი მასპინძლობს. მარსელში (საპრიზო ფონდი 100.000 დოლარი) საკვალიფიკაციო ეტაპის წარმატებით გავლის შემდეგ ეკატერინე გორგოძე 7 ივნისს ძირითადი ბადის სტარტზე მე-5 ნომრად განთესილ დალილა იაკუპოვიჩთან (სლოვენია) არკვევდა ურთიერთობას. პირველი სეტი ქართველმა მოიგო - 6:4, მომდევნო ორი ხელი კი დათმო - 4:6, 3:6 და შეჯიბრებას გამოეთიშა.
წყვილებში გორგოძე ალონა ფომინასთან (უკრაინა) ერთად მეოთხედფინალში იყო, მაგრამ ქართულ-უკრაინულმა დუეტმა მეორე ბარიერის გადალახვა ვერ შეძლო - მესამე ნომრად განთესილ ნათელა ძალამიძისა და ვერონიკა კუდერმეტოვას
ბრეშას 60.000-იან ტურნირში ცდიდა ძალებს სოფიო შაფათავა. არგენტინელ კატალინა პელასთან პირველი წრის პირველი ხელი შაფათავამ მოიგო 6:2, მომდევნოში ოკენისგაღმელმა იმარჯვა - 6:4, მესამეში, როცა პელა 3:1 დაწინაურდა, შაფათავამ ტრავმის გამო პაექრობის გაგრძელება ვერ შეძლო.
ნამანგანში (საპრიზო ფონდი 25.000 დოლარი) რევანში ვერ აიღო მარიამ ბოლქვაძემ, რომელმაც ასპარეზობის პირველ დღეს წყვილებში ქსენია პალკინასთან (ყირგიზეთი) ერთად ასპარეზობის რეიტინგფავორიტებთან - ნიგინა აბდურაიმოვასა და ქსენია ლიკინასთან (რუსეთი) წააგო.
ერთეულთა თანრიგის მერვედფინალში ბოლქვაძე გუშინ მასპინძელ ნიგინა აბდურაიმოვასთან არკვევდა ურთიერთობას: პირველ სეტში წარმატებას მიაღწია - 6:4, მეორე დაძაბულ პაექრობაში წააგო - 6:7, მესამე ხელის დასრულება კი ვერ შეძლო - მეტოქე წინ იყო 3:2, ჩვენებურმა ტრავმა რომ მიიღო და ტურნირს დაემშვიდობა.
(იბეჭდება მცირე ცვლილებით)
ყოველდღიური სპორტული გაზეთი "ლელო"
