"პორშეს" ახალი მანქანების შეგროვებით არის დაკავებული რუსი მარია შარაპოვა. მან ზედიზედ მეორედ გაიმარჯვა შტუტგარტის ტურნირზე, რომელსაც "პორშეს გრანპრი" ჰქვია.ფინალში მარიას მეტოქე ჩინელი ნა ლი იყო, რომელთანაც რუსს რევანში ჰქონდა ასაღები წელს, ავსტრალიის ღია პირველობის ნახევარფინალში მარცხის გამო. შტუტგარტში ამ ჩოგბურთელთა ფინალამდე გზა რადიკალურად განსხვავებული აღმოჩნდა. ნა ლიმ ყველა შეხვედრა ორ სეტში მოიგო, შარაპოვას კი პირიქით, ყველა მატჩში სამ-სამი სეტის ჩატარება მოუწია, თანაც ფინალი მისთვის ბოლო ოთხ დღეში მეოთხე მატჩი იყო. ასე რომ, სათამაშო თვალსაზრისით, ფავორიტად ნა ლი მიიჩნეოდა.
მარიამ
მეორე სეტში მარიამ ვერ შეძლო თავიდანვე უპირატესობის მოპოვება. ნა ლი კარგად ატარებდა თავის გეიმებს, თუმცა ისიც აშკარად ჩანდა, რომ მას უჭირდა მეტოქის ძლიერი დარტყმებისთვის გამკლავება. სწორედ ამიტომაც მეორე სეტის შუაში თანდათან გამოიკვეთა შარაპოვას უპირატესობა. აზიელმა ბრეიკ-პოინტიდან ერთი გეიმის გადარჩენა შეძლო, მაგრამ თავის მომდევნო გეიმზე ვეღარაფერი გააწყო. ნა ლი ამ წარუმატებლობამ საბოლოოდ გატეხა და ბოლო გეიმში ორმაგი შეცდომით ჩააბარა სეტი და მატჩი მოწინააღმდეგეს - 4:6, 3:6.
მარიამ წელს მეორე და კარიერაში 29-ე ტიტული მოიგო, რითაც WTA-ს საჩემპიონო რბოლაში პირველ ადგილზე გადავიდა. შთამბეჭდავია რუსის შედეგები გრუნტზე, რომელზეც მან ზედიზედ მეოთხე ტურნირი მოიგო, ხოლო მოგებათა სერიამ 20 მატჩს მიაღწია. ბოლოს ამ საფარზე შარაპოვამ 2011 წლის როლან გაროსზე წააგო, როცა ნახევარფინალი დაუთმო ნა ლის.
იტალიელის ტრიუმფი
ქალებს შორის მეორე ტურნირი, რომელსაც მაროკოს ქალაქი მარაკეში მასპინძლობდა, ნაკლებად წარმომადგენლობითი იყო. აქ ნახევარფინალამდე მხოლოდ ერთმა განთესილმა - იტალიელმა ფრანჩესკა სკიავონემ გააღწია. რაც შეეხება ტურნირის მოქმედ ჩემპიონს კიკი ბერტენსს, ის მეოთხედფინალში დამარცხდა ლურდეს დომინგეს-ლინოსთან.
სრული მოულოდნელობა იყო ნახევარფინალში ლუქსემბურგელი მენდი მინელას გასვლა. მარაკეშში მან სამი სამსეტიანი მატჩი მოიგო, მაგრამ მაინც მოუწია კიდევ ერთ დაძაბულ მატჩში დომინგეს ლინოსთან დანებება - 6:2, 0:6, 1:6. მეორე ნახევარფინალში სკიავონემ კრისტინა მლადენოვიჩი დაამარცხა - 7:6(4), 6:1.
ფინალში სკიავონემ იოლად - 6:1, 6:3 მოუგო დომინგეს ლინოს, არადა, მატჩი საკმაოდ დაძაბული გამოვიდა - 16-დან ცხრა გეიმში დაფიქსირდა ანგარიში "თანაბარი". გამოცდილმა იტალიელმა ძალიან მნიშვნელოვან გამარჯვებას მიაღწია: მას შარშანდელი მაისის შემდეგ არ მიუღწევია სერიოზული წარმატებისთვის.
ყოველდღიური სპორტული გაზეთი "ლელო"
