ეგვიპტეში, შარმ ელ შეიხის ქალთა საერთაშორისო ტურნირში (საპრიზო ფონდი 10.000 დოლარი) შესანიშნავად ითამაშა თბილისელმა მარიამ ბოლქვაძემ, რომელიც მე-7 ნომრად იყო განთესილი. ქართველი ჩოგბურთელი რეიტინგით 702-ეა, მაგრამ კლასიფიკაციაში 357 საფეხურით წინ მდგომ მეტოქესაც მოუგო. მარიამმა ხუთ შეხვედრაში ისე გაიმარჯვა, რომ სეტიც არ დაუთმია.
ჩვენებურმა ზედიზედ სძლია ანგელინა ფიოდოროვას (რუსეთი) - 6:0, 6:0, ინდია მაჯენს (ბელგია, 792-ე) - 6:1, 6:1, რეიტინგფავორიტ მარგალიტა ლაზარევას (რუსეთი, 345-ე), მე-4 ნომერ ეკატერინა იაშინას (რუსეთი, 422-ე), გადამწყვეტ პაექრობაში კი მეორე ნომერ ლინა ჯორჩესკას (მაკედონია, 402-ე) აჯობა 6:1,
წყვილებში ბოლქვაძე იულია ბრიზგალოვასთან (რუსეთი) ერთად ცდიდა ძალებს. სტარტზე მათ ჩინენ ნდიდი (ნიგერია) და უშა სუჰალი (პაკისტანი) დაჯაბნეს - 6:2, 6:2, შემდეგ მესამე ნომრად განთესილ არაბელა ფერნანდეს რაბენერსა (ესპანეთი) და ადრიანა ლეკაჯს (ხორვატია) მოუგეს - 4:6, 6:4, 10:4. ნახევარფინალში ქართულ-რუსული ტანდემის წინსვლა ლინა ჯორჩესკამ (მაკედონია) და იულია ტერზისკამ (ბულგარეთი) შეაჩერეს - 7:5, 6:1. ფინალში ამ დუეტმა ვიქტორია კულიკი და კაროლინა სილვანოვიჩი (ორივე-პოლონეთი) მშრალზე დასვა - 6:0, 6:0.
კატოვიცეში (პოლონეთი) ჩოგბურთელ ქალთა 250.000-იანი ტურნირის საკვალიფიკაციო ეტაპში ჩაება თბილისელი ოქსანა კალაშნიკოვა, მაგრამ სტარტზევე შვედ სუსანა სელიკთან დამარცხდა - 5:7, 4:6.
წყვილებში კალაშნიკოვა კატალინა მაროშისთან (უნგრეთი) ერთად ტატიანა ბუას (არგენტინა) და დანიელა სეგუელას (ჩილე) დუეტს დაუპირისპირდება.
ყოველდღიური სპორტული გაზეთი "ლელო"
