პოლონურ ტურნირში სოფიო ქვაცაბაიამ მოიგო, ეკატერინე გორგოძე დამარცხდა

28 ივნისს პოლონურ ტორუნში დაიწყო ჩოგბურთელ ქალთა 25.000-იანი საერთაშორისო ტურნირი, რომელშიც ორი ქართველი ჩაება.

სოფიო ქვაცაბაიამ ბელორუს დარია ჩერნეცოვას აჯობა - 6:3, 7:5 და მერვედფინალში ტადეა მეჟირიჩსა (სლოვენია) და ვალერია სავინიხს (რუსეთი) შორის უძლიერესს დაუპირისპირდება.

ეკატერინე გორგოძე სტარტზე კვალიფიკაციიდან აღზევებულ ჩეხ ბარბორა მიკლოვასთან დამარცხდა და შეჯიბრებას გამოეთიშა, რადგან ჩვენებურები წყვილებში არ მონაწილეობენ.

რომში, ქალთა 50.000-იან ტურნირში წარმატებით აიღო სტარტი სოფიო შაფათავამ. ერთეულთა შეჯიბრების მეორე წრეში იგი ასპარეზობის რეიტინგფავორიტ სილვია სოლერ-ესპინოზას (ესპანეთი) გაუწევს მეტოქეობას, წყვილებში უნგრელ რეკა-ლუკა იანისთან ერთად გადალახა პირველი ბარიერი.

მეოთხედფინალში ისინი ურთიერთობას გაარკვევენ კრისტიანა ფერანდოსა (იტალია) და ვიქტორია როდრიგესის (მექსიკა) დუეტთან, რომელმაც გუშინ მასპინძლები - ჯორჯია მარჩეტი და მარია მასინი ჩამოიშორა გზიდან - 6:4, 6:3.

საქართველოს ჩოგბურთელ ვაჟთა ლიდერი ნიკოლოზ ბასილაშვილი გერმანული მარბურგის ჩელენჯერტურნირში (საპრიზო ფონდი 42.500 ევრო) ცდიდა ძალებს, მაგრამ მე-2 ნომრად განთესილი ჩვენებური პირველივე წრეში მიშა ზვერევთან (გერმანია) დამარცხდა - 2:6, 6:4, 6:7 და ტურნირს დაემშვიდობა.

(იბეჭდება მცირე ცვლილებით)
ყოველდღიური სპორტული გაზეთი "ლელო"