ქართველი ჩოგბურთელები: შაფათავა და გორგოძე ბურსაში წარმატებით გამოდიან

ქართველი ჩოგბურთელები - სოფიო შაფათავა და ეკატერინე გორგოძე წარმატებით თამაშობენ ბურსაში, ჩოგბურთელ ქალთა 50.000-იან საერთაშორისო ტურნირში.

14 ივლისს ერთეულთა თანრიგში მეორე წრის ორთაბრძოლები გაიმართა. მესამე ნომრად განთესილმა სოფიო შაფათავამ უზბეკ აკქულ ამანმურადოვას აჯობა - 6:3, 7:5 და მეოთხედფინალში ბოსნიელ დეა ნერძელასთან გაარკვევს ურთიერთობას.

ეს უკანასკნელი გუშინ მასპინძელ ბერთუ ჩენგიზს ხვდებოდა. პირველი სეტი ბოსნიელმა მშრალად მოიგო, მეორეში თურქმა ჩოგბურთელმა ტრავმის გამო კორტზე გასვლა ვერ შეძლო.

გაიმარჯვა ეკატერინე გორგოძემაც - ასპარეზობის მეოთხე ნომერ ვალერია სტრახოვას (უკრაინა) გადაუკეტა მეოთხედფინალისკენ მიმავალი გზა - 6:4, 6:3. ჩვენებურის მომდევნო მეტოქე იქნება რუსი ანასტასია კომარდინას მძლეველი (3:6, 6:1, 6:2) ლინა ჯორჩესკა (მაკედონია).

წყვილებში შაფათავა და გორგოძე, რომლებიც პირველ ნომრად არიან განთესილნი, ნახევარფინალში უბრძოლველად გავიდნენ: ჩვენებურთა წინააღმდეგ ბერთუ ჩენგიზსა (თურქეთი) და ანასტასია გასანოვას (რუსეთი) უნდა ეთამაშათ, მაგრამ ბერთუს ტრავმის გამო თურქულ-რუსული წყვილი შეჯიბრებას გამოეთიშა.

შაფათავა და გორგოძე ნახევარფინალში მესამე ნომრად განთესილ ანასტასია კომარდინას (რუსეთი) და ნინა სტოიანოვიჩს (სერბეთი) დაუპირისპირდებიან, რომლებმაც გუშინ თურქები - აილა აქსუ და მელის სეზერი ჩამოიშორეს გზიდან - 6:1, 6:4. მეორე ნახევარფინალში აკქულ ამანმურადოვა (უზბეკეთი), ნათელა ძალამიძე (რუსეთი) და ლინა ჯორჩესკა (მაკედონია), ვალერია სტრახოვა (უკრაინა) გაუწევენ ერთმანეთს მეტოქეობას.

რუმინეთის დედაქალაქ ბუქარესტში ჩოგბურთელ ქალთა საერთაშორისო ტურნირში (საპრიზო ფონდი 250.000 დოლარი) პირველი ბარიერის წარმატებით გადალახვის შემდეგ ასპარეზობის რეიტინგფავორიტები - თბილისელი ოქსანა კალაშნიკოვა და ყაზახი იაროსლავა შვედოვა ჩეხებთან - ლენკა კუნჩიკოვას და კაროლინა სტუხლასთან დამარცხდნენ - 1:6, 7:5, 4:10.

(იბეჭდება მცირე ცვლილებით)
ყოველდღიური სპორტული გაზეთი "ლელო"