ქართველი ჩოგბურთელები: სოფიო ქვაცაბაიამ პაპას ორჯერ აჯობა

AutoSharing Option
ანტალიაში ჩოგბურთელ ქალთა 10.000-იან საერთაშორისო ტურნირში პირველი ბარიერი მეორე ნომრად განთესილმა სოფიო ქვაცაბაიამ წარმატებით გადალახა. ერთეულებში მან ძალების დაუძაბავად აჯობა ბერძენ ვანესა პაპას - 6:0, 6:2.

ჩვენებური გუშინ ელინელის წინააღმდეგ მეორედაც გავიდა კორტზე, ამჯერად - წყვილებში. ქვაცაბაია აქ ბულგარელ დია ევტიმოვასთან ერთად ასპარეზობის რეიტინგფავორიტია. ქართულ-ბულგარულმა დუეტმა ვანესა პაპას და კატერინა რომანიუტას (რუსეთი) მოუგო - 6:0, 6:1 და მეოთხედფინალში ანი დონალდსონსა (ავსტრალია) და თეა ფაბერთან (ხორვატია) გაარკვევს ურთიერთობას.

ანიმ და თეამ სტარტზე რიო კატაგავა (იაპონია) და დიანა პოპესკუ (რუმინეთი) ჩამოიშორეს გზიდან
- 6:7, 6:2, 12:10.

ერთეულების მერვედფინალში ქვაცაბაია რუსი ანასტასია ტოკარევას მძლეველ (6:2, 6:1) ხორვატ თეა ფაბერს შეხვდება.

* * *
მოსკოვში "კრემლის თასს" (საპრიზო ფონდი 758.788 დოლარი) დაემშვიდობა თბილისელი ოქსანა კალაშნიკოვა. ლატვიელ ელენა ოსტაპენკოსთან შეამხანაგებული ჩვენებური მასპინძლებს - ნათელა ძალამიძესა და ვერონიკა კუდერმეტოვას დაუპირისპირდა. პაექრობა საათსა და 16 წუთს გაგრძელდა. ჩვენმა ჩრდილოელმა მეზობლებმა 6:1, 7:6 გაიმარჯვეს.

* * *
საქართველოს ჩოგბურთელ ქალთა ლიდერმა სოფიო შაფათავამ ჩინურ სუჟუნში (საპრიზო ფონდი 50.000 დოლარი) მასპინძელ რან ტიანთან პირველი ხელი 3:6 დათმო, მეორე მშრალი ანგარიშით მოიგო - 6:0, მესამე სეტს 0:2-ს რომ აგებდა, ტრავმის გამო შეჯიბრების გაგრძელება ვერ შეძლო.

* * *
საფრანგეთის ქალთა 50.000-იანი ტურნირის ძირითადი ბადის პირველ წრეში ეკატერინე გორგოძე მასპინძელ მანონ არკანგოლისთან საათსა და 20 წუთში დამარცხდა - 2:6, 3:6.

წყვილებში ლატვიელ დიანა მარცინკევიცასთან ერთად ტურნირზე ველური ბარათით მიწვეულ ფრანგებთან - ფიონა ფეროსა და მარგოტ ეროლიმოსთანაც ვერაფერს გახდა - 6:1, 2:6, 6:10.

(იბეჭდება მცირე ცვლილებით)
ყოველდღიური სპორტული გაზეთი "ლელო"
მკითხველის კომენტარები / 0 /
კომენტარი ჯერ არ გაკეთებულა.

სიახლეები პოპულარული