- ისე ვართ აღფრთოვანებული, საჯაროდ მადლობა რომ არ გვეთქვა, არ იქნებოდა, - გვითხრა მთავარმა მწვრთნელმა შტურბანინმა. - თავიდან ორი ობიექტი გვქონდა ამორჩეული - მედეო და ბაკურიანი. ყაზახები ახლა აზიის თამაშებისთვის ემზადებიან და ჩვენთვის არ ცხელათ. თანაც ისეთი პირობები შემოგვთავაზეს, ჩვენს
ბაკურიანზე ბევრი რამ გვსმენია ჯერ კიდევ საბჭოთა პერიოდში - ის ხომ საკავშირო ნაკრების საწვრთნელი ბაზა იყო. ნანახმა მაინც ყველა მოლოდინს გადააჭარბა - შესანიშნავი ჰაერი, ქათქათა თოვლი, ჩინებული სათხილამურო ტრასები, 2700 მეტრიდან დაშვება, სატრენაჟორო დარბაზი და საცურაო აუზი - ასეთ პირობებზე მხოლოდ ოცნება თუ შეგვეძლო. მერე მასპინძლებთან ურთიერთობას არ იკითხავთ? ქართველ კოლეგებთან დიდი ხნის მეგობრობა გვაკავშირებს და სხვაგვარად ვერც წარმოგვიდგენია.
ფრანგებმა შარშან მოფარიკავეთა მსოფლიოს ჩემპიონატი ერთი თვის დაგვიანებით, ანუ წლის მიწურულს ჩაატარეს, ამიტომ ახალი სეზონისთვის მოსამზადებლად ცოტა დრო რჩება. არადა, წლეულს სალიცენზიო ტურნირები მოგველის, ამიტომ ფორსირებულად გვიწევს სპორტულ ფორმაში შესვლა.
- ბაკურიანში მხოლოდ ახალგაზრდები იახლეთ?
- რას ბრძანებთ! მოხმალავეთა ეროვნული ნაკრები, თან 4 ახალგაზრდაც ჩამოვიყვანეთ, რომ უფროსებთან ერთად მოემზადონ წლევანდელი ორთაბრძოლებისთვის.
- ქართველ მოფარიკავეებზე რას იტყვით?
- იყო დრო, ქართული საფარიკაო სკოლის წარმომადგენელთა სახელი მთელ მსოფლიოში ქუხდა - ასათიანი, კოსტავა, აფციაური, ოსიპოვი, სახვაძე... რომელი ერთი ჩამოვთვალო. საბჭოეთის დაშლის შემდეგ ვითარება შეიცვალა. საბედნიეროდ, ბოლო დროს საქართველოში ფარიკაობისადმი დამოკიდებულება სასიკეთოდ შეიცვალა. ფედერაციისა და სპორტის მესვეურებთან ერთად მწვრთნელთა და სპორტსმენთა სურვილს, მონდომებას ნელ-ნელა შედეგებიც მოაქვს. ქართველი მოფარიკავის ჭაბუკთა მსოფლიო თასზე მესამე ადგილის დაკავება უკვე კარგის მომასწავებელია.
მახსოვს, ჩვენს გოგონებზეც ქირქილებდნენ უკრაინაში - ეს რა შეჯიბრება იყოო. მერე მსოფლიოს ჩემპიონატზე მე-5 ადგილსაც ცხვირის აბზუებით შეხვდნენ. 2007 წლის მსგავს შეჯიბრებაზე მეორე ადგილის დაკავებით პეკინის ოლიმპიადის საგზურები რომ მოვიპოვეთ, ჩვენდამი დამოკიდებულება შეიცვალა. მერე პეკინის თამაშებზე კვარცხლბეკის უმაღლეს საფეხურზეც ავედით. დრო და მოთმინებაა საჭირო. კარგი ბიჭები გყავთ, ტექნიკურებიც არიან, მაგრამ ტაქტიკაში მოიკოჭლებენ.
ბაკურიანში უმთავრესად საერთო ფიზიკური მომზადებისთვის ჩამოვედით. თქვენებიც ჩემს შეგირდებთან ერთად დარბოდნენ. თავიდან გაუჭირდათ დატვირთვებთან შეგუება, მერე გაუშინაურდნენ. ახალგაზრდები მალევე დაუახლოვდნენ ერთმანეთს.
მერწმუნეთ - ერთობლივი წვრთნების, ურთიერთგამოცდილების გაზიარების და ერთიანი მცდელობის გარეშე წარმატებას ვერ მივაღწევთ, დიდ სპორტსმენს ვერ გავზრდით. სპარინგია საჭირო, თანაც რაც შეიძლება მრავალმხრივი. ამიტომ ჩვენი ჩამოსვლა, თქვენი სპორტსმენების სტუმრობა კიევში ორივე ქვეყნის მოფარიკავეების ოსტატობის ამაღლებაზე დადებითად იმოქმედებს. საპასუხო ვიზიტისას ყველაფერს გავაკეთებთ, რომ ქართველ კოლეგებს ვალში არ დავრჩეთ.
- მეტ დროს კადეტებსა და ახალგაზრდებს ვუთმობ, მათთან ერთად დავდივარ შეჯიბრებებზე, - ჩაერია საუბარში ანატოლი შლიკარი. - იმ ტურნირებზე ქართველ მოფარიკავეებსაც ვხვდები. მომწონს მიხეილ მარდალეიშვილი და თეოდორა კახიანი.
მიზანმიმართული მუშაობით მათგან კარგი სპორტსმენები დადგება. 24 იანვარს კიევთან ახლოს ოლიმპიურ ბაზაზე შევიკრიბებით. იქ თქვენი ნაკრების მთავარი მწვრთელი მერაბ ბაზაძეც ჩამოვა ოთხ შეგირდთან ერთად. ახალი სეზონისთვის მზადებას განვაგრძობთ. ვფიქრობ, სასურველ შედეგსაც მოვიმკით.
მერაბ ბაზაძე: ქართველი ბიჭები კიევში ივარჯიშებენ უკრაინის მოხმალავეთა ნაკრების წევრებთან, რომლებიც რეგალიებით არიან დახუნძლული. ეს მათთვის პატივიცაა და პასუხსაგებიც. ბაკურიანში ჩვენები ფიზიკურად საკმაოდ მომძლავრდნენ. უკრაინაში კარგა ხანს დარჩებიან, შეჯიბრებებზეც იქიდან ივლიან. იმედია, წლეულს შარშანდელზე უკეთესი შედეგები გვექნება.
დავით სახვაძე, საქართველოს ფარიკაობის ფედერაციის გენერალური მდივანი: ბაკურიანში ერთობლივი საწვრთნელი შეკრებით კმაყოფილი ვარ. ტიტულოვან მოფარიკავეებთან სპარინგი ქართველ სპორტსმენებს წაადგებათ. ყველაფერს ვიღონებთ საიმისოდ, რომ ლონდონის ოლიმპიადაზე ერთი წარმომადგენელი მაინც გვყავდეს. მანამდე კი, თებერვლის მიწურულს, კადეტთა ევროპის პირველობაა. ამ შეჯიბრებაზე მიხეილ მარდალეიშვილმა თავისი სიტყვა უნდა თქვას.
.
