ფილიპინელი მენი პაკიაო ამა წლის შემოდგომაზე მეორე ნახევრადსაშუალო წონაში მსოფლიოს ყოფილ ჩემპიონ ანტონიო მარგარიტოს შეხვდება. მსოფლიოს საუკეთესო მოკრივემ ასეთი გადაწყვეტილება მას შემდეგ მიიღო, რაც საბოლოოდ ჩაიშალა მოლაპარაკებები ამერიკელ ფლოიდ მეივეზერთან.
პაკიაოსა და მარგარიტოს ბრძოლა 13 ნოემბერს გაიმართება, მაგრამ შეხვედრის ადგილი ჯერ უცნობია. ცნობილია, რომ მარგარიტოს ამერიკაში ბრძოლის ლიცენზია არ გააჩნია, ამიტომაც აშშ-ში ბრძოლის გამართვა გაჭირდება. ამ შემთხვევაში შეხვედრა მარგარიტოს სამშობლოში - მექსიკაში ჩატარდება.
48 წლის ვეტერანი ევანდერ ჰოლიფილდი არ აპირებს პროფესიული რინგის დატოვებას. ლეგენდარული მძიმეწონოსნის მენეჯერმა კენ სანდერსმა განაცხადა, რომ
"საბოლოო თარიღი ჯერ არ დაგვიდგენია, მაგრამ ბრძოლის ორგანიზებას დეტროიტში ვგეგმავთ. ჯერჯერობით მეტოქის ვინაობაც უცნობია. სხვადასხვა ვარიანტი არსებობს, მაგრამ ახლა არ გვინდა მათი დასახელება. სავარაუდო კანდიდატებთან ჯერ კონტაქტიც არ გვქონია. თუ ყველაფერი წარმატებით ჩაივლის, შემდეგ ბრძოლას 2011 წლის დასაწყისისთვის დავგეგმავთ.
ძალიან გვინდა ერთ-ერთ კლიჩკოსთან შეხვედრის ორგანიზება. სავარაუდოდ, არჩევანს ვიტალიზე შევაჩერებთ. უკვე ველაპარაკე WBC-ის პრეზიდენტ ხოსე სულეიმანს და მან მხარდაჭერა აღმითქვა", - განაცხადა თავისი კლიენტის გეგმებზე სონდერსმა.
საშუალო წონაში მსოფლიოს ყოფილმა ჩემპიონმა რიკი ჰატონმა, რომელიც ცოტა ხნის წინ კარიერის დასრულებას აპირებდა, დიდ ბრიტანეთში თავისი საკრივო ლიცენზია გაახანგრძლივა.
როგორც BoxingScene წერს, ბრიტანელ მოკრივეს ჯერ ოფიციალურად არ დაუსრულებია კარიერა. მას არც ის გაურკვევია, ვისთან სურს უახლოეს დროში ბრძოლის გამართვა, მაგრამ ყოველი შემთხვევისთვის, ლიცენზიის გაგრძელება გადაწყვიტა და ახლა მეტოქეთა სხვადასხვა ვარიანტს განიხილავს.
შესაძლოა, ჰატონის მომდევნო ბრძოლა ბოლო იყოს მის კარიერაში. უკანასკნელად რიკი რინგზე 2009 წლის მაისში გავიდა, როცა მეორე რაუნდში ნოკაუტით დამარცხდა მენი პაკიაოსთან.
