გასული უქმეების მთავარი ბრძოლა, რა თქმა უნდა, არგენტინელი მარკოს მაიდანასა (30-2, 27KO) და ლეგენდარული მექსიკელი ერიკ მორალესის (51-7, 35KO) დაპირისპირება იყო. ლას ვეგასის "MGM-გრანდის" რინგზე თამაშდებოდა სუპერმჩატე წონაში WBA-ის დროებითი ტიტული.პრაქტიკულად ყველა სპეციალისტის პროგნოზით ამ ბრძოლის შედეგი თავიდანვე ცნობილი იყო. არგენტინელი კარიერის ზენიტში იმყოფება, 34 წლის მორალესის საუკეთესო წლები კი დიდი ხანია უკან დარჩა. ვეტერანმა 2005-07 წლებში ოთხი მტკივნეული მარცხი განიცადა და კრივიდან თითქოს სამუდამოდ წავიდა. მაგრამ, როგორც ეს ხშირად ხდება ხოლმე, ყოფილმა ჩემპიონმა დაბრუნება გადაწყვიტა და ეს ნაბიჯი
მექსიკელმა დაბრუნების შემდეგ სამი მეტოქე დაამარცხა (ხოსე ალფარო, უილი ლიმონი და ფრანსისკო ლორენცო), მაგრამ კიდევ ერთხელ გავიმეორებთ, რომ მაიდანასთან ის თითქმის უშანსოდ იყო.
ბრძოლის წინ არგენტინელმა განაცხადა, რომ არ აპირებდა რინგზე 12 რაუნდის ჩატარებას და ნოკაუტი ჰქონდა დაგეგმილი. მაგრამ ნოკაუტი კი არა, მორალესმა კინაღამ დიდი სენსაცია შესთავაზა კრივის მოყვარულებს.
ყველაფერი იმით დაიწყო, რომ მაიდანამ პირველივე რაუნდში წარბი გაუხეთქა მორალესს. მიუხედავად ამისა, მექსიკელმა უკვე მეორე რაუნდში უპასუხა ფავორიტს, რის შემდეგაც თანდათან აღადგინა თანაფარდობა და მეხუთე რაუნდი საერთოდ თავის სასარგებლოდ დაასრულა.
მერვე რაუნდში მორალესმა ისევ განახორციელა რამდენიმე მტკივნეული დარტყმა, მაგრამ მაიდანამ მე-11 და მე-12 რაუნდებში უპირატესობა დაიბრუნა და გაჭირვებით მიიყვანა საქმე გამარჯვებამდე. სამი მსაჯიდან ერთმა ფრე დააფიქსირა, ორმა კი მცირე უპირატესობა არგენტინელს მიანიჭა- 114:114, 116:112, 116:112.
* * *
ერთი საინტერესო ბრძოლა გაიმართა სუპერმძიმე წონაში. ამერიკის ქალაქ ნიუარკის რინგზე სარეიტინგო შეხვედრაში ურთიერთობა გაარკვიეს პოლონელმა ტომაშ ადამეკმა (44-1, 28KO) და ამერიკელმა კევინ მაკბრაიდმა (35-9 -1, 29KO).
ბევრისთვის უცნაური იყო პოლონელის მხრიდან არაფრით გამორჩეულ ბრძოლაზე დათანხმება. ადამეკს სექტემბერში ვიტალი კლიჩკოსთან უწევს შეხვედრა და წესით, მთელი ყურადღება ამ უმნიშვნელოვანესი შეხვედრისკენ უნდა გადაეტანა, მაგრამ ადამეკმა ხანგრძლივი პაუზა ვერ აიტანა და რინგზე გასვლა გადაწყვიტა.
ისევე როგორც მაიდანასა და მორალესის შეხვედრაში, აქაც ბრძოლას გამოკვეთილი ფავორიტი ჰყავდა - ტომაშ ადამეკი. მაკბრაიდმა კრივის სამყაროში სახელი 2005 წელს გაითქვა, როცა მაიკ ტაისონი დაამარცხა, თუმცა მაშინ "რკინის მაიკი" სულაც აღარ იყო რკინის. ამით ამოიწურება კევინის დამსახურებები პროფესიულ კრივში. ბოლო ხუთ ბრძოლაში მაკბრაიდს მხოლოდ ერთი ჰქონდა მოგებული, ისიც სრულიად უცნობი მოკრივის წინააღმდეგ.
მაყურებელმა აქაც ვერ იხილა ნოკაუტი, თუმცა მსაჯების შეფასებით ადამეკს უდიდესი უპირატესობა მიანიჭეს. წარმოშობით ირლანდიელმა მაკბრაიდმა ვერაფერი დაუპირისპირა ადამეკის სისწრაფესა და ძლიერ დარტყმებს. მასპინძელმა 12 რაუნდი გაძლო, თუმცა მსაჯებმა მას შანსი არ დაუტოვეს: 120:107, 119:108, 119:108.
* * *
შაბათს კიდევ ორი საჩემპიონო ბრძოლა გაიმართა. მაიდანასა და მორალესის შეხვედრის ანდერკარდზე შედგა ამერიკელი რობერტო გეგეროსა (29-1-1, 18KO) და ავსტრალიელი მაიკლ კატსიდისის (27-4, 22) ბრძოლა, რომელშიც WBA-სა და WBO-ის დროებითი ტიტულები თამაშდებოდა.
აქაც ყველაფერი 12 რაუნდის შემდეგ გადაწყდა. ორივე მოკრივე აქტიურობდა, მაგრამ გეგეროს დარტყმები უფრო ზუსტი იყო, რაც მსაჯებმა ასე შეაფასეს: 117:108, 118:106, 118:107.
* * *
დაბოლოს, სუპერსაშუალო წონაში გერმანელმა რობერტ შტიგლიცმა (40-2, 23KO) WBO-ის ტიტული შეინარჩუნა სომეხ ჰორენ გევორთან (31-6, 16KO) ბრძოლაში.
მაგდებურგის რინგზე ბრძოლა შტიგლიცის უპირატესობით დაიწყო, რომელიც ზედიზედ ურტყამდა მოწინააღმდეგეს. გევორი მყარად იდგა ფეხზე და მართალია, მესამე რაუნდში წარბი გაუსკდა, მაგრამ მაინც ცდილობდა პასუხის გაცემას.
ყველაფერი მეცხრე რაუნდში გადაწყდა, როცა გევორმა წესები დაარღვია და შტიგლიცი რინგზე მოჭიდავის ილეთით დასცა. მსაჯმა სომეხს დისკვალიფიკაცია მისცა და გამარჯვება მასპინძელ მოკრივეს მიანიჭა. გევორი ვერ დაწყნარდა და ახლა მსაჯს ეცა, რიმ შემდეგაც პოლიციას მოუწია მისი რინგიდან გაყვანა [იხილეთ ვიდეო].
