აგვისტოს მიწურულიდან 3 სექტემბრის ჩათვლით სტამბოლშიტესტ-სემინარები გაიმართება. გამოცდების ჩაბარების შემდეგ სამი საკონტინენტო ზონიდან შეირჩევა 30 საუკეთესო მსაჯი, რომლებთანაც პროფესიული ლიგა ხელშეკრულებებს გააფორმებს. განსაზღვრულია რეზერვში 12 არბიტრის აყვანაც. სტამბოლის ტესტ-სემინარებზე მიწვეულია ქართველი სამვარსკვლავიანი საერთაშორისო მსაჯი ზურაბ ტიბუა, რომელსაც კრივის საერთაშორისო ასოციაციის სიახლეებზე ვესაუბრეთ:
_ პროფესიული ლიგის რეგულარული სეზონი 2010 წლის 19 ნოემბერს დაიწყება და 2011 წლის მარტამდე გასტანს. გუნდები
რეგულარული სეზონის ორთაბრძოლებისთვის მსოფლიოს 100-ზე მეტი ახალგაზრდა მოკრივე შეირჩა. მათგან 4 ქართველია. კობა ფხაკაძე (61) და ბექა ლობჟანიძე (+91) ბაქოს წარმომადგენლებმა შეიგულეს, გიორგი კილანავა (54) პარიზის ღირსებას დაიცავს, კახაბერ ჟვანია (73) სტამბოლის გუნდის რეზერვშია ჩარიცხული, საგულისხმოა, რომ ცალკე გაუფორმეს კონტრაქტი ნიკა იზორიას. მართალია მას ტრავმების გამო ორი წელიწადია, არ უასპარეზია, მაგრამ საკმაოდ მაღალი რეიტინგი აქვს. იგი კობა ფხაკაძესთან ერთად 61 კილოში გამოვა. სხვათა შორის, კობამ უკვე მოასწრო ერთი საჩვენებელი ბრძოლის ჩატარება. სამწუხაროდ, იგი უკრაინელ მეტოქესთან დამარცხდა.
პროფესიული ლიგის შექმნასთან დაკავშირებით აღსანიშნავია ისიც, რომ რეგულარული სეზონის ორთაბრძოლებით მოკრივეებს გაეზრდებათ ფინანსური შემოსავლის წყარო, ხოლო სეზონის განმავლობაში გამოვლენილი საუკეთესო მოკრივე 2012 წლის ლონდონის ოლიმპიური თამაშების ლიცენზიას მიიღებს.
_ წლის ბოლომდე ოთხ თვეზე მეტია დარჩენილი. ჩვენი მოკრივეები რომელ შეჯიბრებებში იასპარეზებენ?
_ ბარბადოსის ქალაქ ბრიჯთაუნში 5-19 სექტემბერს ქალთა მსოფლიოს ჩემპიონატი გაიმართება. ქართული კრივის ისტორიაში პირველად ოკეანის გაღმა შეჯიბრებაში მონაწილეობის მისაღებად გაემგზავრება ბათუმელი მარიკა ხორავა (57-61 კგ) მსაჯ ტარიელ გოგოჭურთან ერთად. ასპარეზობამდე მარიკა და მისი მწვრთნელი გოჩა აბაშიძე მსოფლიოს ჩემპიონატისთვის მოსამზადებლად საწვრთნელ შეკრებას გაივლიან.
ოქტომბერში მონღოლეთის დედაქალაქი ულანბატორი სტუდენტ მოკრივეთა მსოფლიოს ჩემპიონატს უმასპინძლებს, სადაც ქართველებიც მოსინჯავენ ძალებს.
მნიშვნელოვანია ისიც, რომ ორი თვის შემდეგ ყაზახეთის ქალაქ ალმათიში კონგრესი გაიმართება _ კრივის საერთაშორისო ფედერაციისა და სხვადასხვა კონფედერაციის პრეზიდენტებს აირჩევენ. ახალი ვადით კონგრესის მუშაობაში მონაწილეობას მიიღებენ ეროვნული ფედერაციის პრეზიდენტი პეტრე ცისკარიშვილი და გენერალური მდივანი ვლადიმერ ახალკაცი, რომლებიც ყველაფერს აკეთებენ საქართველოში კრივის ტრადიციების აღდგენისა და განვითარებისთვის. კონგრესზე ბატონი ვლადიმერი საერთაშორისო ფედერაციის ერთ-ერთი კომისიის წევრად არჩევის კანდიდატია, რაც მას თავად ვუმ შესთავაზა სპორტის ამ სახეობის განვითარებაში შეტანილი წვლილისთვის. ჩვენი გენერალური მდივანი ხომ კრივის სამყაროში ავტორიტეტითა და დიდი პატივისცემით სარგებლობს.
