რუსმა მოკრივემ ალექსანდრ პოვეტკინმა (23-0, KO16) ურთულეს ბრძოლაში დაამარცხა ბოსნიური წარმოშობის გერმანელი მარკო ჰუკი (34-1, KO25) და შეინარჩუნა სუპერმძიმე წონაში WBA-ის ვერსიით "რეგულარული" ჩემპიონის ტიტული. 12 რაუნდის შემდეგ ორმა მსაჯმა უპირატესობა რუსს მიანიჭა, მესამემ ფრე დააფიქსირა.საყოველთაო შეფასებით, მსაჯებმა არასწორი გადაწყვეტილება მიიღეს, რადგან ქულებით მოგება აშკარად გერმანელ მოკრივეს ეკუთვნოდა, რომელსაც დებიუტი ჰქონდა სუპერმძიმე წონით კატეგორიაში. ამ წაგების მიუხედავად, ჰუკს შეუნარჩუნეს WBO-ის ტიტული მძიმე წონაში.
ბრძოლის პირველი ნაწილი ჩემპიონს დარჩა, რომელიც მშვიდად და მეთოდურად მუშაობდა მეტოქის კორპუსზე, მაგრამ მეოთხე რაუნდიდან მოყოლებული,
ბრძოლის დარჩენილი ნაწილი თითქმის ერთნაირი სცენარით მიდიოდა - რაუნდების დასაწყისში პოვეტკინი აქტიურად გამოიყურებოდა, მაგრამ მალე დაღლილობა იჩენდა თავს. ამას კარგად იყენებდა გერმანელი და თითო რაუნდში მინიმუმ ორი-სამი წარმატებული შეტევა ჰქონდა.
მეშვიდე რაუნდშიც, პოვეტკინის რამდენიმე ზუსტ აპერკოტს ჰუკის ბრწყინვალე კონტრშეტევა და უძლიერესი დარტყმა მოჰყვა, რამაც ჩემპიონი კინაღამ ნოკაუტში ჩააგდო. რუსი მძიმედ სუნთქავდა და ძლივს გადაადგილდებოდა. მას სულზე მოუსწრო გონგმა.
შემდეგ ყველაფერი ძველი სცენარით გაგრძელდა, უფრო მეტიც, მე-11 რაუნდი აშკარად რუსმა მოკრივემ მოიგო, მაგრამ ბოლოსკენ ჰუკმა შეძლო ინიციატივის დაბრუნება.
ყველას ესმოდა, რომ ბრძოლას ქულებით მარკო იგებდა, ამიტომაც პოვეტკინს მე-12 რაუნდში ნოკაუტზე უნდა ეფიქრა, მაგრამ ბოლო რაუნდში ნოკაუტთან უფრო ახლოს ჰუკი იყო, რომელსაც, უბრალოდ, დარტყმის ძალა არ ეყო იმისთვის, რომ დაღლილი ჩემპიონისთვის ბოლო მოეღო.
პუბლიკა გაოგნებული დარჩა, როცა მსაჯებმა გამარჯვება რუს მოკრივეს მიანიჭეს - 114:114, 116:113, 116:112.
გამოცანად რჩება, როგორ აპირებს პოვეტკინი რინგზე ძმები კლიჩკოების გამკლავებას. ცუდი დაცვა და კომბინაციური მუშაობა, საშინელი ამტანობა... ოდესღაც მას აუცილებლად მოუწევს რომელიმე უკრაინელთან შეხვედრა და იქ მისი შანსები ნულის ტოლი იქნება.
რაც შეეხება ჰუკს, მის დარტყმას არასაკმარისი ძალა აქვს სუპერმძიმეწონოსნების დასამარცხებლად, სამაგიეროდ, თუ გერმანელმა ასე იჩხუბა თავის "მშობლიურ" მძიმე წონაში, იქ მას დიდი ხანი ვერავინ შეეცილება ლიდერობაში.
ყოველდღიური სპორტული გაზეთი "ლელო"
