5-9 თებერვალს ამერიკული აზარტული თამაშების დედაქალაქი ლას ვეგასი მშვილდოსანთა მსოფლიოს ჩემპიონატს უმასპინძლებს ზამთრის ანუ დარბაზის პირველობაში. მასში ჩვენგან მხოლოდ ქალთა ნაკრები მიიღებს მონაწილეობას უცვლელი შემადგენლობით - მსოფლიოს ვიცე-ჩემპიონი ქრისტინე ესებუა, ხათუნა ნარიმანიძე და ასმათ დიასამიძე.
ეს სამეული ახალგაზრდა გოგოებისა და ბიჭების ნაკრებთან ერთად ამჟამად ივანე ჯავახიშვილის სახელობის თბილისის სახელმწიფო უნივერსიტეტის დარბაზში გადის შეკრებას, ამერიკაში კი 2 თებერვალს გაფრინდება. კორეელი მწვრთნელი მათ ამერიკული დროით ავარჯიშებს, როცა იქ ჩასულებს მოუწევთ სროლა. მწვრთნელის მოთხოვნით, ჩვენები 15-19 თებერვალს ბანგკოგშიც აპირებენ გამოსვლას აზიის "დიდ პრიზზე".
შეგახსენებთ, რომ ჩვენები ევროპის ზამთრის პირველობებში ყოველთვის წარმატებით გამოდიან და შარშანდელი ჩემპიონებიც არიან, მსოფლიოს პირველობებში კი იშვიათად გამოდიან.
ყოველდღიური სპორტული გაზეთი "ლელო"
