ჩინურ შანხაიში 11 აპრილს მშვილდოსანთა მსოფლიოს თასის პირველი ტურნირი დაიწყო, რომელშიც საქართველოდან ქალებთან ერთად ვაჟებიც გამოდიან. ქალთა ნაკრებში ამჯერად 4 მსროლელია, რომელთაგანაც საკვალიფიკაციო ეტაპი ყველაზე უკეთ ხათუნა ნარიმანიძემ ჩაატარა - 627 ქულა დააგროვა და 35-ე ადგილზე გავიდა.
ალბათ, ბევრისთვის მოულოდნელად, ჩვენს გუნდში მეორე შედეგი ახალგაზრდა ნათია ცინცაძემ აჩვენა - 592 ქულა, რაც 71-ე მაჩვენებელი აღმოჩნდა.
თუმცა მისი წარმატება უფრო გუნდის ძველ ლიდერთა ცუდმა სტარტმა განაპირობა, თორემ ცინცაძის შედეგი არაა მაღალი.
ოღონდ ისიც უნდა ითქვას, რომ ადრინდელთან შედარებით პროგრესირებს. საკმაოდ სუსტად
გუნდურ ჩათვლაში (შეგახსენებთ - მასში სამი საუკეთესო შედეგი შედის) საქართველოს ნაკრებს 1810 ქულა მოუგროვდა. ეს კი მხოლოდ მე-19 მაჩვენებელი გამოდგა და პლეი ოფში ვერ გავიდა, რაც იშვიათად ხდება.
პირად პირველობაში პლეი ოფები დღეს გაიმართება. ესებუა პოლონელ პაულა ვიცზეჩოვსკას ხვდება, რომელიც ახალი სახეა იქაურთა გუნდში.
ვიმედოვნებთ, ესებუა ძველ შემართებას, საბრძოლო ჟინს დაიბრუნებს და გაიმარჯვებს. მით უფრო, ნერვების ისეთ თამაშში, როგორიც პლეი ოფია, ის ძლიერია. დიასამიძეს იტალიელი ელენა ტონეტა ერგო, რასაც საჩუქარს ნამდვილად ვერ დავარქმევთ.
ნარიმანიძე მოლდოველ ალეხანდრა მირცას ხვდება, რომელიც ასევე ახალი სახეა. ესებუასი არ იყოს, გადამწყვეტ მომენტში მტკიცე ხელი და ნერვები ნარიმანიძესაც ახასიათებს (თუნდაც 2003 წლის მსოფლიოს პირველობა გავიხსენოთ, როცა დამატებით სერიაში ჩინელს აჯობა და მერე მეხუთეზე გავიდა).
ამდენად, იმედი ნამდვილად უნდა გვქონდეს. აი, ცინცაძე კი თურქ ბეგულ ლუკლუოღლუსთან დაწყვილდა. თურქი არაა ძლიერი მოისარი, მაგრამ ჩვენებურზე ბევრად გამოცდილია.
ბარემ აქვე ტურნირში მონაწილე სხვა ქართველებზეც ვთქვათ. თურქეთის სახელით მოასპარეზე ნატო ნასარიძემ სულ რაღაც 594 ქულა დააგროვა და ცხრილში ცინცაძის წინ, 70-ე საფეხურზე დადგა. საკმაოდ კარგად ისროლა ამერიკელმა ხათუნა ლორიგმა (ქვრივიშვილი) - 639 ქულა და მე-19 ადგილი. ნასარიძისგან განსხვავებით, ლორიგი გუნდურშიც იასპარეზებს.
ვაჟთა ტურნირში სამი მონაწილე გვყავს, თუმცა ასაკით ყველა ბევრად პატარაა - ჯერ კიდევ ახალგაზრდულ ნაკრებში გამოდიან.
უბრალოდ, კორეელი მწვრთნელი კმაყოფილია მათი ბოლოდროინდელი პროგრესით და ეს გუნდი სალიცენზიო ტურნირებზეც კი მიჰყავს ჰოლანდიასა და ამერიკაში. ჩინეთში ირაკლი ქვლივიძე, ლაშა ფხაკაძე და თორნიკე რიჟამაძე გამოდიან. საკვალიფიკაციო ეტაპი ყველაზე უკეთ ფხაკაძემ ჩაატარა - 629 ქულა და 83-ე ადგილი. თუმცა მოვლენებს დავასწრებთ და გეტყვით, რომ პლეი ოფში ყველაზე მეტად მას არ გაუმართლა - პირველივე წრეში უკრაინელ ოლიმპიურ ჩემპიონ ვიქტორ რიბანის ხვდება.
ქვლივიძე 614 ქულით 95-ეზე გავიდა, რიჟამაძე 599-ით - 98-ეზე. ცხადია, გუნდურში პლეი ოფში ვერც ესენი მოხვდნენ - 1842 ქულით 23-ეზე გავიდნენ. პლეი ოფები პირადში აქაც ხვალ გაიმართება, სადაც რიჟამაძე ჩინელ იუ ჰინგს გაეჯიბრება, ქვლივიძე - მონღოლ იანტსან განტუგს.
ყოველდღიური სპორტული გაზეთი "ლელო"
