27 ივლისს ლონდონში მშვილდოსან ქალთა საკვალიფიკაციო შეჯიბრება გაიმართა, რომელიც ქრისტინე ესებუამ 642 ქულით და 34-ე ადგილით დაასრულა. ამ შედეგით ის 64-კაციანი სიის შუაში დამკვიდრდა და პლეი ოფის პირველივე წრეში - 1/32-ედფინალში საინტერესო წყვილი მივიღეთ - ესებუა ჩილელ მსოფლიოს ჩემპიონ დენისე ასტრიდ ვან ლემოენს ხვდება ანუ მსოფლიოს პირველობის ფინალი მეორდება.
შეგახსენებთ, რომ ჩვენებური მასთან შარშან მსოფლიოს პირველობის გადამწყვეტ შეხვედრაში დამარცხდა.
ჩვენებურს ლონდონში ძალიან მძიმე წილისყრა ერგო - ჩილელს თუ გასცდება, სავარაუდოდ, მომდევნო მეტოქე სამხრეთ კორეელი მსოფლიოსა და ოლიმპიური ჩემპიონი, შესარჩევ ეტაპში
ერთი სიტყვით, ესებუას მედლისთვის დიდი ბრძოლის გადატანა მოუწევს. ვფიქრობთ, ჩილელი ტრაგედია არაა - ის არც შარშანდლამდე მიიჩნეოდა ფავორიტად და მას მერეც ტიტული, თორემ ლიდერი არაა.
ვფიქრობთ, მან პიკი სწორედ მსოფლიოზე გადაიარა და ვიქონიოთ იმედი, ესებუა თავისი ჟინიანი, მებრძოლი ხასიათით რევანშს შეძლებს. ჩილელზე ბევრად უფრო ძლიერი კორეელი გვგონია, რომელიც ოლიმპიურ ციკლში ნაკლებად ჩანდა. ის საკმაოდ ახალგაზრდაა - 27 წლისა, თუმცა კარიერის პიკზე სულ მთლად ბავშვი ავიდა.
ის ათენის ოლიმპიადაზე 18 წლისა გუნდურში ჩემპიონი გახდა, პირადში კი მხოლოდ ფინალში დამარცხდა იმხანად მსოფლიოს ჩემპიონ თანაგუნდელ სუნგ ჰიუნ პარკთან. მას რევანში მომდევნო წელს მადრიდში გამართულ მსოფლიოს პირველობაზე აუღო, სადაც მერე ფინალიც მოიგო და გუნდურშიც გაიმარჯვა.
უდაოა, მისი სახით ესებუას ძლიერი მეტოქე ელოდება (ცხადია, ჯერ იქამდე უნდა გავიდეს), მაგრამ გავიხსენოთ მსოფლიოს შარშანდელი პირველობა, სადაც ჩვენებურმა სამხრეთ და ცრდილო კორეელი, ჩინელი, ინდოელი, ბრიტანელი მეტოქეები დაამარცხა. ვიქონიოთ იმედი, რომ ესებუა ამჯერადაც შემოგვთავაზებს სიურპრიზს, თუმცა ეს მისი მხრიდან უკვე მოულოდნელობა არ იქნება.
გუშინ ქართველმა ასპარეზობა 10-იანით დაიწყო - პირველივე ისარი ფარის შუაგულს დაასვა, თუმცა მთლიანად ტურნირზე უმაღლესი ქულა საკმაოდ ცოტა ჰქონდა - 72-დან მხოლოდ 15. საინტერესოა, რომ 12 სერიიდან 9-ში პირველი ისარი 10-იანს გაარტყა, თუმცა მერე ამის გაკეთება უჭირდა.
სტატისტიკისთვის გეტყვით, რომ 3 სერიაში 60-დან 50 ქულა დააგროვა, 2-ში - 53, ერთხელ - 54, 4-ჯერ - 55 და 2-ჯერ - 56.
პლეი ოფის ორი წინასწარი ეტაპი სამ დღეზეა გათვლილი, თუმცა ესებუა შეხვედრებს ჩილელთან და, თუ მოუგო, კორეელთანაც 31 ივლისს გამართავს, დანარჩენი ორთაბრძოლებს კი 2 აგვისტოს გამართავს. ცხადია, ამდენ ეტაპს თუ გაივლის.
აქვე გეტყვით, რომ ესებუამ პეკინის ოლიმპიადაზეც ლამის ასეთი შედეგი აჩვენა - საკვალიფიკაციო ეტაპი 643 ქულით დაასრულა. კიდევ ერთი საინტერესო პარალელი ჩინურ თამაშებთან - იქ შესარჩევში მეოთხე შედეგი ხათუნა ნარიმანიძემ აჩვენა, ახლაც მეოთხე შედეგზე ისევ ქართველი და ისევ ხათუნა, ოღონდ უკვე ამერიკის სახელით მოასპარეზე ხათუნა ლორიგია (ქვრივიშვილი).
პეკინისგან განსხვავება ისაა, რომ მაშინ შესარჩევი სამხრეთ კორეელებმა მოიგეს - პირველ სამ ადგილზე ისინი იყვნენ, ახლა კი ორია ლიდერებში - ბო ბაე კი პირველია, ლეე - მეორე. მესამე პოზიციაზე ტაივანელი ია-ტინგ ტანია, რომელსაც ლორიგი მოსდევს, ხუთეულს კი ისევ ტაივანელი ჩია-ენ ლინი აგვირგვინებს.
მესამე კორეელი 21-ეა, ჩინელები კი საკმაოდ სუსტად გამოვიდნენ - მათი საუკეთესო შედეგი 20-ე ადგილია. აღსანიშნავია, რომ სამეულში სამივეს ერთნაირი ქულა - 671 აქვთ. ქალთა გუნდურ ტურნირშიც ის მოწინავე ქვეყნები ლიდერობენ - კორეა 1993 ქულით პირველია, აშშ - მეორე 1979-ით, ტაივანი კი - მესამე 1976-ით.
კორეელები ლიდერობენ ვაჟთა შორისაც - მოწინავე სამეულში მხოლოდ ისინი შედიან. სუსტად გამოვიდა უკრაინელი ოლიმპიური ჩემპიონი ვიქტორ რიბანი - 43-ეა 660-ით, ამაზე მეტს კი უკვე ჩვენი მშვილდოსნები აკეთებენ. ვაჟთა გუნდურ ტურნირს კორეელები ლიდერობენ 2087 ქულით, მეორეზე ფრანგები არიან 2021-ით, მესამეზე - ჩინეთი 2019-ით.
ყოველდღიური სპორტული გაზეთი "ლელო"
