სოკ-ი სტიპენდიას 15 სპორტსმენზე გამოჰყოფს, თუმცა მათთან შეთანხმებით ჩვენები ამ თანხას სხვებსაც უნაწილებდნენ, მათ, ვისაც ოლიმპიადაზე მოხვედრის პერსპექტივას ჰქონდა. ამჯერადაც ასე იქნება - სოკ-ში 15-კაციანი სია დევს, მაგრამ სტიპენდია
აქვე განვმარტავთ, რომ ამ სტიპენდიებს არავითარი კავშირი არ აქვს იმ ხელფას-პრემიებთან, რასაც ეს სპორტსმენები საქართველოში იღებენ სპორტის სამინისტროს თუ ეროვნული ოლიმპიური კომიტეტისგან. მათთვის ეს დამატებითი ანაზღაურებაა.
ძალიან გაგვიკვირდა ამ სიაში თავისუფალ ჭიდაობაში ოლიმპიური, მსოფლიოსა და ევროპის ჩემპიონის რევაზ მინდორაშვილის გამოჩენა - მას პეკინის ოლიმპიადაზე გამარჯვების შემდეგ არ უჭიდავია, თან არც ჯანმრთელობა უწყობდა ხელს, მაგრამ, როგორც გვითხრეს, დიდ სპორტს უბრუნდება და ლონდონის ოლიმპიადაზე მოსახვედრად იწყებს ბრძოლას.
ისიც უნდა ითქვას, რომ მსგავსი სიების შერჩევა არც ისე იოლი საქმეა, როგორც ერთი შეხედვით ჩანს. წესისამებრ, ამ ჩამონათვალში ისინი შეჰყავთ, ვისაც ოლიმპიადაზე მოხვედრის შანსი გააჩნია, მაგრამ სიაში შეყვანილთაგან თუ ვინმე ვერ მოიპოვებს ლიცენზიას, ეს აუცილებლად აისახება მომავალი ოლიმპიური ციკლის სტიპენდიებზე - შემცირდება. აღსანიშნავია, რომ წინა ოლიმპიურ ციკლში ჩვენგან ამდენს არ ჰქონდა სტიპენდია, ახლანდელი მატება კი იმან გამოიწვია, რომ მაშინდელებიდან არათუ ყველამ მოიპოვა საგზური, ჩვენი გუნდი პეკინშიც წარმატებით გამოვიდა. ისიც საყურადღებოა, რომ უკვე დამტკიცებული სტიპენდიანტის შეცვლა არ შეიძლება - ეს უკიდურეს შემთხვევაში თუ მოხდება. მაგალითად, რომელიმეს ტრავმის შემთხვევაში. ამ პასუხისმგებლობიდან გამომდინარე, საქართველოს ეროვნული ოლიმპიური კომიტეტის პრეზიდენტმა გია ნაცვლიშვილმა გუშინ გამართულ პრესკონფერენციაზე სთხოვა სტიპენდიანტებს, პასუხისმგებლობით მოეკიდნონ თავიანთ საქმეს, რათა მომავალში სხვებიც არ დააზარალონ.
ბუნებრივია, გაჩნდება კითხვა, რატომ 30 სპორტსმენი და არა მეტი. ეს სეოკ-ის გათვლას ემყარება - ისინი 30 ლიცენზიას ყველა ვარიანტში ელოდებიან, თუმცა არ გამორიცხავენ, ლონდონში ჩვენი ოლიმპიური დელეგაცია 35-40 ათლეტითაც იყოს წარმოდგენილი.
გუშინდელ პრესკონფერენციას სტიპენდიანტებიც ესწრებოდნენ, თუმცა ცირეკიძეს შეაგვიანდა. ნაცვლიშვილმა ივარაუდა, დილიდანვე საბინაო პრობლემების მოგვარებითაა დაკავებული და, ალბათ, ამიტომ იგვიანებსო. ირაკლის ლონდონის თამაშებისთვის უკეთ მოსამზადებლად ოლიმპიურმა კომიტეტმა ბინა დაუქირავა თბილისში - საამისო თანხა უკვე გამოიძებნა. ამაზე ლაპარაკი ადრეც იყო, სეოკ-მა თითქოს სეზონის დასაწყისშიც დაუქირავა ბინა, მაგრამ ცირეკიძის თბილისში გადმოყვანა დღემდე არ მოხერხდა, ახლა კი ეს პრობლემა, ვიმედოვნებთ, საბოლოოდ გადაიჭრა.
ცირეკიძის თემა პრესკონფერენციაზე ერთ-ერთ ძირითად საკითხად იქცა. ნაცვლიშვილმა, რომელიც არასოდეს აკრიტიკებს მედიას, მეტიც - მუდამ ჟურნალისტების დამცველად გვევლინება, ამჯერად გააკრიტიკა ზოგიერთ მედიასაშუალებაში გამოთქმული მოსაზრებები იმის შესახებ, თითქოს ცირეკიძემ ტოკიოში, მსოფლიოს პირველობაზე კუბელ ორეიდის დესპაინესთან შეგნებულად დააგვიანა საჭიდაოდ გასვლა და ამაში ფული აიღო. მისი თქმით, სპორტსმენს იქ ჭიდაობა ევალებოდა, რასაც აკეთებდა კიდეც და იგებდა, საჭიდაოდ მისი გაყვანა კი სხვებს ეხებოდათ. ნაცვლიშვილმა გადატანილი სტრესის გამო მხარდაჭერა გამოუცხადა სპორტსმენს და განაცხადა, მისგან კვლავაც ველოდებით დიდ შედეგებსო. მან ჭორები უწოდა იმ ხმებსაც, თითქოს ცირეკიძე თავს ანებებს ჭიდაობას.
პრესკონფერენციის მესამე თემა თბილისში სერბეთის ეოკ-ის პრეზიდენტ ვლადე დივაცის ჩამოსვლა იყო.
ყოველდღიური სპორტული გაზეთი
"ლელო"
