ოქტომბერი"რედ ბულის" პილოტმა სებასტიან ფეტელმა ოთხი ეტაპით ადრე გაიფორმა ფორმულა 1-ში მსოფლიოს ჩემპიონის მეორე ტიტული. ამისთვის საკმარისი აღმოჩნდა იაპონიის გრანპრიზე მესამე ადგილის დაკავება.
გერმანელი პილოტი 24 წლისა და 99 დღის ასაკში ფორმულა 1-ის ისტორიაში ყველაზე ახალგაზრდა ორგზის მსოფლიოს ჩემპიონი გახდა. სეზონის ბოლოს მან რეკორდი დაამყარა სეზონში მოპოვებული პოულების რაოდენობით - 15-ჯერ დაიწყო რბოლა პირველი პოზიციიდან.
* * *
ტრაგედიით დასრულდა სეპანგის ავტოდრომზე მალაიზიის ეტაპი მოტოგრანპრიში. მეორე წრეზე იტალიელი მარკო სიმონჩელი თანამემამულე ვალენტინო როსისა და ამერიკელ კოლინ ედვარდსს შეეჯახა და
24 წლის სიმონჩელის დაღუპვა პირველია მოტოგრანპრიში 2003 წლის შემდეგ, როცა იაპონიის გრანპრიზე დაიღუპა ადგილობრივი მოტომრბოლი დაიხირო კატო.
* * *
მონაკოში წლის საუკეთესო ველომრბოლად ბელგიელი ფილიპ ჟილბერი დაასახელეს, რომელმაც სეზონის განმავლობაში რამდენიმე კლასიკური ერთდღიანი რბოლა მოიგო და ჯამში 18 გამარჯვებას მიაღწია.
გამოკითხვაში მეორე და მესამე ადგილები დაიკავეს ტურ დე ფრანსის ჩემპიონმა კეიდელ ევანსმა და მსოფლიოს ჩემპიონმა მარკ კევენდიშმა.
* * *
კიევში საზეიმოდ გაიხსნა ოლიმპიური სტადიონი, რომელზეც 2012 წელს ევროპის საფეხბურთო ჩემპიონატის ფინალი გაიმართება. არენის ტევადობა 60 ათასი მაყურებელია და მისი მშენებლობა 470 მილიონი დოლარი დაჯდა.
ფინალის გარდა ამ სტადიონზე გაიმართება ჯგუფური ეტაპის სამი მატჩი და ერთი მეოთხედფინალი.
* * *
ბერლინის მარათონზე მამაკაცებს შორის მსოფლიოს ახალი რეკორდი დამყარდა. კენიელმა პატრიკ მაკაუმ 42-კილომეტრიანი დისტანცია 2 საათში, 3 წუთსა და 38 წამში დაფარა, რითაც გააუმჯობესა ლეგენდარული ეთიოპიელის ჰაილე გებრესელასიეს ძველი მიღწევა.
ერთი თვის შემდეგ, ფრანქფურტის მარათონზე ასევე კენიელმა უილსონ კიპსანგმა ისტორიაში მეორე დრო აჩვენა - მას მხოლოდ ოთხი წამი დააკლდა ახალი რეკორდის დასამყარებლად.
* * *
ეროვნულ საკალათბურთო ასოციაციაში ლოკაუტი გამოცხადდა. კლუბების მფლობელებმა და კალათბურთელებმა ვერ გაიყვეს ლიგის საერთო შემოსავალი და მსოფლიოს საუკეთესო ლიგაში საფრთხის წინაშე დადგა რეგულარული ჩემპიონატი. NBA-ის კომისარმა დევიდ სტერნმა გააუქმა სეზონის საწყისი მატჩები.
საბოლოოდ, მხარეებმა შეთანხმებას მიაღწიეს და სეზონი თითქმის ორთვიანი დაგვიანებით დაიწყო. კალენდრის მიხედვით, რეგულარულში თითოეული გუნდს 66 მატჩის ჩატარება მოუწევს.
* * *
ბეისბოლის მსოფლიოს სერია "სენტ ლუის კარდინალსის" ტრიუმფით დასრულდა. ფინალში მან 6:2 დაამარცხა "ტექსას რეინჯერსი" და ბოლო ექვს წელიწადში მეორედ და ჯამში მეთერთმეტედ დაეუფლა ტიტულს.
მსოფლიო სერიის საუკეთესო მოთამაშე გახდა სენტლუისელი დევიდ ფრიზი. ის აგრეთვე ეროვნული ლიგის სერიაშიც საუკეთესოდ დასახელდა.
ნოემბერი
პროფესიული კრივის სამყარომ უდიდესი დანაკლისი განიცადა. კიბოს ავადმყოფობით 67 წლის ასაკში გარდაიცვალა ლეგენდარული ამერიკელი მძიმეწონოსანი ჯო ფრეზერი.
"მწეველმა ჯომ", პირველ რიგში სახელი გაითქვა იმით, რომ პირველმა დაამარცხა მოჰამედ ალი და მსოფლიოს ჩემპიონის ტიტული დაისაკუთრა. ეს 1971 წელს, ნიუ იორკის "მედისონ სკვერ გარდენში" მოხდა. იმ დაპირისპირებას "საუკუნის ბრძოლა" უწოდეს.
ფრეზერის დაკრძალვას თავად მოჰამედ ალი ესწრებოდა. აქვე იყვნენ მაიკ ტაისონი, ლარი ჰოლმსი და მსოფლიოს კრივის სხვა ლეგენდარული პიროვნებები.
* * *
მორიგი გამარჯვება მოიპოვა მსოფლიოს საუკეთესო მოკრივემ, ფილიპინელმა მენი პაკიაომ. ლას ვეგასში ის მესამედ შეხვდა მექსიკელ ხუან მანუელ მარკესს და ქულებით შეძლო მისი დამარცხება, თუმცა ბევრს ეჭვი შეეპარა მსაჯების საბოლოო გადაწყვეტილების სისწორეში.
* * *
მადრიდის "რეალის" ვარსკვლავმა კრისტიანო რონალდომ კარიერაში მეორედ მოიგო ევროპის საუკეთესო ბომბარდირისთვის განკუთვნილი "ოქროს ბუცი". პორტუგალიელს პრიზი ლეგენდარულმა ეუსებიომ და ალფრედო დი სტეფანომ გადასცეს.
პორტუგალიელმა ფორვარდმა გასულ სეზონში 40 გოლის გატანა მოახერხა.
* * *
ამერიკის შეერთებულ შტატებში საფეხბურთო სეზონი დევიდ ბექჰემის "ლოს ანჯელეს გელაქსის" ტრიუმფით დასრულდა. კალიფორნიულმა კლუბმა ფინალში ლენდონ დონოვანის გოლით აჯობა ჰიუსტონის "დინამოს" და მეორედ გახდა MLS-ის თასის მფლობელი, თავად ბექჰემმა კი პირველი ტიტული მოიპოვა ამერიკის შეერთებულ შტატებში.
ვეტერანი ინგლისელი აქტიურად ავითარებს თავის საფეხბურთო კარიერას. მან შესაძლოა, "პარი სენ-ჟერმენში" გააგრძელოს გამოსვლა, გარდა ამისა, ლონდონის ოლიმპიადაზე თამაში აქვს გადაწყვეტილი.
* * *
რაგბიში მსოფლიოს თასზე განცდილი ფიასკოს შემდეგ ინგლისის ნაკრების მთავარი მწვრთნელის პოსტი დატოვა მარტინ ჯონსონმა. ტურნირის ერთ-ერთ მთავარ ფავორიტად აღიარებულმა გუნდმა მეოთხედფინალი წააგო საფრანგეთის ნაკრებთან, რომელმაც, თავის მხრივ, ფინალამდე მიაღწია და იქ დაძაბულ ბრძოლაში წააგო მასპინძელ ახალი ზელანდიის ნაკრებთან.
* * *
ტურ დე ფრანსის სამგზის ჩემპიონის, ესპანელი ალბერტო კონტადორის საქმე სპორტულ საარბიტრაჟო სასამართლოში გაგრძელდა. მართალია, ველომრბოლი ესპანეთის ველოსპორტის ფედერაციამ გაამართლა, მაგრამ კონტადორს მსოფლიოს ანტისადოპინგო სააგენტომ უჩივლა და ესპანელის მკაცრად დასჯა მოითხოვა. განაჩენი იანვარში გახდება ცნობილი და შესაძლოა, კონტადორს 2010 წელს მოპოვებული ტურ დე ფრანსის ჩემპიონობა ჩამოართვან.
* * *
ზედიზედ მერვედ მოიგო რალიში მსოფლიოს ჩემპიონატი ფრანგმა სებასტიან ლოებმა. ჩემპიონის ვინაობა ბოლო ეტაპამდე გაურკვეველი იყო. ლოებს ტიტულს ფინელი მიკო ჰირვონენი ეცილებოდა, მაგრამ ბოლო ეტაპზე - ბრიტანეთის რალიზე ლოებმა კიდევ ერთხელ დაამტკიცა თავისი მაღალი კლასი და მორიგი ჩემპიონობა იზეიმა.
დეკემბერი
დეკემბერში გაირკვა კლასურას ჩემპიონი არგენტინაში. "ბოკა ხუნიორსმა" მთელი ტურნირი დაუმარცხებლად განვლო და 2008 წლის შემდეგ პირველად გახდა ქვეყნის საუკეთესო გუნდი.
* * *
სენსაციურად დასრულდა ჩემპიონთა ლიგის ჯგუფური ეტაპი. ტურნირს გამოეთიშა ერთ-ერთი მთავარი ფავორიტი - "მანჩესტერ იუნაიტედი". სერ ალექს ფერგიუსონის გუნდმა ჯგუფში წინ გაუშვა შვეიცარიის "ბაზელი", რომელთანაც ბოლო ტურში სტუმრად 1:2 დამარცხდა, არადა, ფრეც ჰყოფნიდა მერვედფინალში გასასვლელად.
ასევე პლეი ოფის მიღმა დარჩა მეორე მანჩესტერული გრანდი - "სიტი". მასზე წინ ჯგუფურ ეტაპზე "ბაიერნი" და "ნაპოლი" აღმოჩდნენ.
ახლა, ორივე მანჩესტერული გუნდი ევროპის ლიგაზე გააგრძელებს გამოსვლას.
* * *
იაპონიაში გამოვლინდა მსოფლიოს საუკეთესო საფეხბურთო კლუბი. როგორც მოსალოდნელი იყო, კლუბებს შორის მსოფლიოს ჩემპიონატის ფინალში ერთმანეთს შეხვდნენ ჩემპიონთა ლიგის გამარჯვებული "ბარსელონა" და ლიბერტადორესის თასის მფლობელი "სანტოსი".
დიდ ინტერესს იწვევდა ორი ახალგაზრდა ვარსკვლავის - ლეო მესისა და ნეიმარის დაპირისპირება, რომელიც არგენტინელისა და მისი "ბარსელონას" ტრიუმფით დასრულდა. "ბარსელონამ" ფინალი 4:0 მოიგო და 2011 წელს მეექვსე ტიტული დაისაკუთრა.
* * *
ორწლიანი პაუზის შემდეგ ლეგენდარულმა ტაიგერ ვუდსმა გოლფის პროფესიულ ტურში ტურნირის მოგება მოახერხა. ამ დროის განმავლობაში ამერიკელმა ზედიზედ 26 ტურნირი წააგო და ნავსი დეკემბერში, კალიფორნიის შტატის ქალაქ თაუსენდ ოუკსში გატეხა, სადაც "შევრონ უორლდ ჩელენჯის" ტურნირზე იმარჯვა. მას ათზე ნაკლები დარტყმის განხორციელება დასჭირდა 18 ორმოს გასავლელად და ერთი დარტყმით აჯობა მეორე ადგილზე გასულ ზაკ ჯონსონს.
* * *
წლის ბოლოს რამდენიმე საინტერესო საკრივო ორთაბრძოლა გაიმართა. პუერტორიკოელმა მიგელ კოტომ 2008 წელს დამარცხებისთვის რევანში აუღო მექსიკელ ანტონიო მარგარიტოს და შეინარჩუნა მსოფლიოს ჩემპიონის ტიტული ნახევრადსაშუალო წონაში. ნიუ იორკში გამართული ბრძოლა მეცხრე რაუნდში შეწყდა და კოტოს ტექნიკური ნოკაუტით მოგება ჩაეთვალა.
სენსაციურად დასრულდა ბრძოლა ვაშინგტონში, სადაც ბრიტანელი ვარსკვლავი ამირ ხანი ქულებით დამარცხდა ამერიკელ ლამონტ პიტერსონთან და ჩემპიონის ტიტული დაკარგა. ხანმა მიიჩნია, რომ მსაჯებმა მას გამარჯვება მოპარეს, ამიტომაც ბრძოლის შედეგი დაასაჩივრა და ახლა, აპელაციის შედეგებს ელოდება.
* * *
ეროვნულ საკალათბურთო ასოციაციაში ახალი ჩემპიონატის დაწყებამდე ერთი ხმაურიანი ტრანსფერი შედგა - ტრეიდის შედეგად ლიგის ერთ-ერთი საუკეთესო გამთამაშებელი კრის პოლი "ნიუ ორლეანიდან" "ლოს ანჯელეს კლიპერსში" გადავიდა.
* * *
ლეგენდარულმა ინგლისელმა მორაგბემ ჯონი უილკინსონმა სანაკრებო კარიერის დასრულების შესახებ გამოაცხადა. ის ეროვნულ გუნდს 13 წელი ემსახურა და მას 2003 წელს მსოფლიოს თასი მოაგებინა. 32 წლის უილკინსონს ტესტ-მატჩებში 1246 ქულა დაუგროვდა, რაც მეორე შედეგია ისტორიაში - მასზე წინ მხოლოდ ზელანდიელი დენ კარტერი იმყოფება.
ყოველდღიური სპორტული გაზეთი "ლელო"
