ქართველებმა, შეიკის შემდეგ, ლიონელ მესის "ფეისბუქი" "დაბომბეს"

ჯერაც არ ჩაუვლია ვნებათაღელვას, რაც ირინა შეიკის "ფეისბუქის" გვერდზე ქართველი მომხმარებლების აღშფოთებასა და კომენტარებს მოჰყვა. რუსი მოდელი, რომელიც კრიშტიანო რონალდოს გელფრენდია, იძულებული გახდა, კომენტარიც გაეკეთებინა და განაცხადა, რომ მომხრეა ქართველი დევნილების საკუთარ სახლებში დაბრუნების.

შეგახსენებთ, რომ შეიკის გვერდზე დაახლოებით 10 ათასმა ქართველმა დაწერა: "აფხაზეთი და სამხრეთ ოსეთი საქართველოა" (სამ ენაზე).

ახლა კი ახალი ჭორი აგორდა, რომელიც უკვე ლიონელ მესის უკავშირდება. ერთ-ერთ ქართულ ბლოგზე გამოქვეყნდა ცრუ-ინტერვიუ მესისთან, რომელიც არგენტინელმა ვარსკვლავმა თითქოსდა "იზვესტიას" მისცა.

ინტერვიუში მესი "ამბობს", რომ ყოველ პატარა ერს აქვს უფლება, დამოუკიდებელი იყოს და კატალონიელებმა აფხაზების მაგალითით უნდა იხელმძღვანელონო". მიუხედავად იმისა, რომ ფაბრიკაცია აშკარა იყო, "ფეისბუქის" ქართველ მომხმარებელთა დიდმა ნაწილმა ის სიმართლედ მიიღო.

ყოველი შემთხვევისთვის, ჩვენ გადავამოწმეთ და, როგორც ველოდით, არანაირი მსგავსი სახის ინტერვიუ მესის "იზვესტიასთვის" არ მიუცია.

მიუხედავად ამისა, ამ წუთებშიც ქართველი მომხმარებლები ლეო მესის "ფეისბუქის" გვერდზე "პროტესტს" გამოთქვამენ და როგორც ირინა შეიკის გვერდზე, აქაც ტოვებენ კომენტარს: "აფხაზეთი და სამაჩაბლო საქართველოა!!! Abkhazia and Samachablo (South Ossetia) are
GEORGIA!!! Абхазия и Южная Осетия это Грузия!"

ასევე იხილეთ:
ირინა შეიკმა ქართველ "ფეისბუქელებს" უპასუხა
ქართველმა მომხმარებლებმა ირინა შეიკის "ფეისბუქი" "დაბომბეს"