არადა, მასპინძლობაზე ერთერთი კონკურენტი ინგლისი იყო. ახლა კი, რა გამოვიდა? წარმოიდგინეთ, 1966 წლის შემოდგომაზე დაბადებული ჯიგარი, ლუდის სმისგან გასიებული ღიპიანი ინგლისელი, რომელსაც "კიდერმინსტერი"-"დარლინგტონის" თამაშიც კი არ გაუცდენია, შეიძლება საკმაოდ ხანშიშესულ ასაკში ისე მოკვდეს, რომ თავის ქვეყანაში მსოფლიო ჩემპიონატი ვერ ნახოს... სამაგიეროდ, რამდენი
- საერთოდ, ამ ორი ქვეყნის საფეხბურთო ამბები რომ ერთმანეთს შევადაროთ, ორ ანეკდოტს შემოგთავაზებთ - ერთ რუსულს (სულ ცინცხალს) და ერთს ინგლისურს. რუსულით დავიწყოთ:
”2014 წლის სოჭის ოლიმპიადა, ფორმულა 1-ის ეტაპი, 2018 წლის საფეხბურთო მსოფლიო ჩემპიონატი... აი, ასეთი ეშმაკური გზებით ცდილობს დასავლეთი რუსეთის გაკოტრებას” - ჯერ დამოკიდებულება ნახეთ და მერე იუმორი. სპეციალურად არ ამირჩევია ეს ანეკდოტი, ძირითადად ასეთი დამოკიდებულება იყო საიტებზე გუშინ.
ახლა ინგლისური:
- აბონემენტის მფლობელი ერთი ინგლისელი კაცი ზის ტრიბუნაზე და უყურებს ”მანჩესტერ იუნაიტედისა" და ”ლივერპულის" თამაშს. ”ოლდ ტრეფორდი" გადატენილია და მხოლოდ ერთი ადგილია თავისუფალი სწორედ ამ კაცის გვერდით. იქვე მჯდომი სხვა კაცი ეკითხება:
- ეს ადგილი ვის ეკუთვნის?
- აქ ჩემი ცოლი იჯდა ხოლმე.
- და დღეს რატომ არაა?
- გარდაცვლილია.
- და ვინმე მეგობარს ვერ მიეცით ბილეთი, რომ წამოსულიყო?
ვერავინ წამოვიდა, ყველანი ჩემი ცოლის დაკრძალვაზე არიან.
* * *
კარგი, რა უნდა ვქნათ, შევეგუოთ იმ აზრს, რომ მსოფლიო ჩემპიონატი რუსეთში გაიმართება და იმედი დავიტოვოთ, რომ საქართველოს ნაკრებს ჯგუფური ეტაპის მატჩების გამართვა სოჭში მოუწევს ხოლმე, ქართველები მაინც ცხოვრობენ ბევრნი. ინფრასტრუქტურას კი მიხედავენ რუსები კარგად, მარტო აქედან იმდენი უნიტაზი გაზიდეს...
ამ ამბებამდე კი ფეხბურთის მოყვარულს თუ არამოყვარულს მხოლოდ ერთი რამე ეკერა პირზე - ”ბარსელონა"-”რეალი". მართლაც სასწაული მოლოდინი იყო ამ მატჩისა და სწორედ მათ დაპირისპირებაში გაირკვა, რომ ესპანეთის საუკეთესო კლუბი ამ ეტაპზე არის... ”ჰერკულესი". აბა, ”ბარსას" სხვა ვერავინ უგებს და...
ისე, მე რომ ესპანეთის ფეხბურთის ფედერაციის ადგილზე ვიყო, რაღაც-რაღაცებს გადავხედავდი. მაგალითად, წესებში აუცილებლად შესატანია ცვლილებები. მგონია, რომ ადამიანის სულიერი ტრავმა უფრო მტკივნეული და დამღუპველია, ვიდრე ფიზიკური. ამიტომ, იმისათვის, რასაც კატალონიური კლუბი აგერ უკვე რამდენიმე თამაშია აკეთებს, აუცილებლად დასასჯელია. ჯერ იყო და ის საწყალი ”ალმერია" რა დღეში ჩააგდეს და ახლა კიდევ ეს შენი განსაკუთრებული მოურინიო და მისი რაზმი. რამდენიმე თამაშიანი დისკვალიფიკაცია აუცილებელია ”ბარსელონას" მთელი გუნდისთვის. ყველა ფეხბურთელი რომ გამოტოვებს თამაშს, იქნებ მერე მაინც მოუგოს ვინმემ.
საქართველოში ყველას გექნებათ მოსმენილი ფრაზა, სიფხიზლეში რა კარგი ბიჭია და სიმთვრალეში გიჟდებაო. ეს სერხიო რამოსი რა უცნაური ვინმე ყოფილა?! ჩვეულებრივ არა უშავს და ნასვამზე რეები აკეთა? ხან ერთ ესპანელს მოსდო ყბაში, ხან მეორეს. არ მითხრათ ახლა ნასვამი არ იყოო. ვერ დავიჯერებ მაინც, მისი საქციელიდან გამომდინარე. ისე ესპანეთის ნაკრებში აღარ უნდა ნეტავ თამაში, რომ მიადგა ამ პუიოლს და ხავის და უბაყუნა? მე შენ გეტყვი, იქ ვინმე დაეხმარება თუ რა? კატალონიელები უფრო მეტნი არიან და თან ჯანსაც არ უჩივიან. მოკლედ, ეგ ნაკრებში ვეღარ მივა და ალბათ საბოლოოდ გადაწყვეტს სამსახიობო კარიერა გაიკეთოს. რამდენად შემოსავლიანია იქნება ეს მისთვის, არ ვიცი, ”აიაქსთან" სამსახიობო დებიუტი კი ფინანსურად წამგებიანი აღმოჩნდა.
არანაკლებ გადარეულია გერმანული ”შალკეს" მწვრთნელი ფელიქს მაგათი. თავისი გუნდის თამაშით ისე გამწარდა, საშინელ ყინვაში ავარჯიშებს ფეხბურთელებს და თან ხელთათამანების და გრძელი შარვლების ჩაცმას უკრძალავს. ეგ კიდევ რა?! მალე ჩემპიონატში შესვენება გამოცხადდება და მაგათსაც ორი შეკრება აქვს დაგეგმილი. ერთი იაკუტიაში, ჩრდილოეთით და მეორე ალასკაზე.
ამერიკის შეერთებულ შტატებს კი სპორტში მძიმე პერიოდი უდგას. 2022 წლის მსოფლიო ჩემპიონატის მასპინძლობაზე მათაც ჰქონდათ პრეტენზია და ყატართან წააგეს, რაგბიში ჩვენმა ბიჭებმა შტატებთან შეხვედრისას რაც მოახდინეს ბოლო წამებზე, კი ვნახეთ, იქ კიდევ ვიღაცამ ქვეყნის პრეზიდენტ ბარაკ ობამას კალათბურთის თამაშის დროს ტუჩი გაუხეთქა და ბატონ ბარაკს 12 ნაკერი დაადეს. ა, ბატონო, მარტო ამაზეც ეტყობა ამერიკას, რომ დემოკრატიული ქვეყანაა, თორემ რუსეთის პრეზიდენტი პუტინი (უი, რომ დავწერე, მერე გამახსენდა, რომ პუტინი პრემიერ-მინისტრია და პრეზიდენტი სხვა ბიჭია, მაგრამ არა უშავს, იყოს) ძიუდოისტია და ხან ვის ეჭიდავება ხოლმე და ხან ვის, რატომ ერთხელ არ ამოუგდეს ბეჭი ან რამე არ ატკინეს?
მოკლედ, აშკარად მაგარი დაბოღმილი ვარ ახლა - ნაწერს რომ გადავხედე და თავს აღარ შეგაწყენთ. მაინც იმედი მაქვს, რომ რამე შეიცვლება და მსოფლიო ჩემპიონატი სხვაგან გაიმართება, თუნდაც ისევ სამხრეთ აფრიკაში. მე, პირადად, ვუვუზელას ჭყვიტინი მირჩევნია მაგათი ”შაიბუ, შაიბუს" მოსმენას.
ყოველდღიური სპორტული გაზეთი
"ლელო"
