შვიდდღეული: იცინის ის...

საქართველოს მორაგბეთა ნაკრები დინჯად მიიწევს წინ, სეზონის მეორე მატჩში უშუალო კონკურენტი დაამარცხა.... თბილისში დაიწყო საჭადრაკო გრანპრი დიდი ფულადი პრემიით... ზამთრის ძილის შემდეგ თვალი გაახილა ჩემპიონთა ლიგამ, თუმცა ჯერ კარგად არ გაუღვიძია... გაზეთმა "ლელომ" სიახლე შემოგვთავაზა - ყოველთვიურად საქართველოს საუკეთესო სპორტსმენს გამოავლენს...

კვირის მატჩი უთუოდ სარაგბო დაპირისპირება იყო საქართველოსა და პორტუგალიას შორის. ტრიბუნაზე ციოდა, თუმცა გულშემატკივარმა კიდევ ერთხელ დაგვანახა, რომ რაგბი ქართული თამაშია - მატჩზე უამრავი ქომაგი მივიდა.

არც ინანა - საქართველომ მეტოქე 20:15 დაამარცხა, თუმცა გარკვეული ნაკლოვანების გრძნობით ნამდვილად დატოვებდა სტადიონს, რადგან ჩვენი გუნდი ერთთავად შეტევაში იყო და მეტოქე მხოლოდ 5 ქულის სხვაობით დაამარცხა. ქომაგს ერთი ლელოც ეცოტავებოდა.

ამას ორი ძირითადი მიზეზი ჰქონდა: პორტუგალიელთა სიმწყობრე დაცვაში და... მეორე მიზეზს ქვემოთ მოგახსენებთ.

- პირველი თამაში პორტუგალიას რუმინეთთან ჰქონდა. ეტყობა, რუმინელ მსაჯს უნდოდა ეჩვენებინა, რომ მის მშობლიურ გუნდს საქართველოზე უკეთესი შერკინება ჰყავს. სხვანაირად ვერ ავხსნი მის ქმედებებს.

რომ ვეკითხებოდი, რატომ იღებდა ასეთ გადაწყვეტილებებს, იცინოდა და არაფერს მპასუხობდა.

არ მიყვარს არბიტრებზე ლაპარაკი, მაგრამ აშკარა იყო, რომ რუმინელი მსაჯი პორტუგალიელებს ეხმარებოდა, - აღნიშნა ნამატჩევს საქართველოს ნაკრების კაპიტანმა შალვა სუთიაშვილმა.

იცინოდა და იცინოს. შეხვდება საქართველო რუმინეთს და ვნახავთ, ბოლოს ვინ გაიცინებს.

"ლელომ" 2015 წლიდან სიახლეს ჩაუყარა საფუძველი. ყოველთვიურად საუკეთესო ქართველ სპორტსმენს დაასახელებს. იანვარში ნაჩვენები თამაშის გათვალისწინებით საუკეთესო ზაზა ფაჩულია გახდა.

იანვარში მან 5 ორმაგი დუბლი გაიფორმა. ზაზა საშუალოდ თითქმის "დაბლ დაბლს" ასრულებდა: 25.7 წუთში 9.6 ქულა და 9.0 მოხსნა. ეს NBA-ში კარგი მაჩვენებელია. რაც მთავარია, "მილუოკიმ" იანვარში 14-დან 8 მატჩი მოიგო.

თებერვალში დავბრუნდეთ. NBA-ში "ოლ სტარი" ჩატარდა, რომელშიც სამქულიანების წვიმა ვიხილეთ. გაიმარჯვა დასავლეთმა - 163:158. მატჩის ყველაზე სასარგებლო მოთამაშე ოკლაჰომელი რასელ უესტბრუკი გახდა (41 ქულა).

NBA-ს ვარსკვლავთა მატჩის გარდა, გაიმართა სამქულიანების კონკურსი, რომელიც "გოლდენ სტეიტის" უკანახაზელმა სტივენ კარმა მოიგო.

ჩატენვების კონკურსში ზაზა ფაჩულიას მილუოკელი თანაგუნდელი იანის ანტეტეკუნმპო მონაწილეობდა, თუმცა მას "მინესოტას" კალათბურთელმა ზაკ ლავინმა აჯობა. სწორედ ის "ახტა ყველაზე მაღლა" ამ კონკურსში.

ლიონელ მესიმ დაამრგვალა - ესპანეთის ჩემპიონატში მე-300 მატჩი ჩაატარა. ასეთი ღირსსახსოვარი მოვლენა მოგებითა და ჰეთ თრიკით გაალამაზა. მისმა "ბარსელონამ" "ლევანტეს" 5:0 სძლია.

განვლილ შვიდდღეულში ყველაზე მადიანად მიუნხენის "ბაიერნმა" მოიგო. მან "ჰამბურგს" 8 უპასუხო გოლი გაუტანა. გაზეთ "ლელოშიც" შესატყვისი სათაური გაჩნდა: "ჰამბურგერი ბაიერნისთვის".

ჩემპიონთა ლიგა სამშაბათს მერვედფინალით განახლდა. შესავალში დავწერეთ, ჯერ კარგად ვერ გამოფხიზლებულაო. საქმე ის არის, რომ პირველივე დღეს ორი ფრე და სულ ორი გოლი ვიხილეთ.

სადღეისოდ 4 მატჩია ჩატარებული, მერვედფინალური სერიის დასრულებამდე კიდევ 12 შეხვედრა დარჩა (შინ და გარეთ თამაშობენ), ამიტომ სჯობს, დასკვნები შემდეგისთვის გადავდოთ.

იტალიის დედაქალაქ რომში ძიუდოისტთა "ევროპის ღია პირველობა" გაიმართა. 6 მედალი მოვიგეთ, აქედან ერთი ოქროსი იყო. 73 კგ წონითი კატეგორიის ფინალში ერთმანეთის პირისპირ წარდგნენ ლაშა შავდათუაშვილი და ნუგზარ ტატალაშვილი. გაიმარჯვა ლაშამ.

ჩვენი ქვეყნის დედაქალაქში თავი ტოპ-მოჭადრაკეებმა მოიყარეს. მათ შორისაა ბაადურ ჯობავა. ვაჟთა რეიტინგის საუკეთესო 12 სპორტსმენი ერთმანეთს თბილისის გრანპრის ეცილება. საპრიზო ფონდი სერიოზულია - 120 ათასი ევრო.

ყოველკვირეული ჟურნალი "ლელო week"