ამას წინათ დუბაიში გამართულ მე-12 ახალგაზრდულ საჭადრაკო ფესტივალზე 14 წლის გორელი სპორტსმენი ლუკა ლიჩელი საუკეთესო აღმოჩნდა. გორისთვის ჭადრაკში მოპოვებული მიღწევა რომელ ასაკშიც უნდა იყოს, აღსანიშნავი თემაა და ამიტომაც ამ ჭაბუკს უკეთ გასაცნობად გორის ცენტრალური სასპორტო სკოლის ჭადრაკის სექციაში ვეწვიეთ. იქვე მის ერთ-ერთ მწვრთნელ ოთარ დოლიძესაც ვესაუბრეთ.
ლიჩელი საქართველოში გამართული არაერთი შეჯიბრების გამარჯვებულია. მან წლეულსაც ფოთის (ნანა ალექსანდრიას სახელობის) და ბათუმის ტურნირები მოიგო.
ცოტა ხნის შემდეგ კი დუბაის ტურნირის ორგანიზატორთა მიერ გამოგზავნილი მიწვევაც მიიღო. იქ საასპარეზოდ 145 სპორტსმენი იყო შეკრებილი. საქართველოდან,
"ძლიერი შემადგენლობა შეიკრიბა და, სიმართლე გითხრათ, მაინცდამაინც პირველი ადგილის დაკავებაზე ფიქრი მიჭირდა. შეჯიბრების ფავორიტი 12-წლამდელთა შორის ევროპის და მსოფლიოს ჩემპიონი აზერბაიჯანელი აბდულა გადიმბაილი იყო, მე კი მეთერთმეტედ ვიყავი განთესილი.
პირველი ტურიდანვე დიდი მონდომებით ჩავერთე პაექრობაში, ბოლომდე ლიდერობა არ დამიკარგავს და 8 ქულით ჩემპიონიც გავხდი. ამ შედეგით მომდევნო პოზიციებზე მყოფ ოთხ მოჭადრაკეს ნახევარი ქულით ვაჯობე" - გვითხრა ლუკა ლიჩელმა.
ლუკას თავიდანვე გორის სპორტსკოლის ჭადრაკის სექციის მწვრთნელი ოთარ დოლიძე ავარჯიშებს. ამჟამად კი მასთან ერთად დავით მაღალაშვილი წვრთნის.
"დუბაიში ლიჩელის წარმატებამ ძალიან გაგვახარა. ბუნებრივია, ეს დიდი სტიმულია სხვა სპორტსმენებისათვის, რათა გულმოდგინე ვარჯიშით მათაც იფიქრონ გამარჯვებებზე. მე ამჟამად გორსა და ქარელში ვამეცადინებ ბავშვებს.
უმცროსი ასაკის წარმატებული მოჭადრაკე ქარელშიც გვყავს, რომელიც ჩვენი ქვეყნის ჩემპიონია 14-წლამდელთა შორის.
პირად აღსაზრდელთა წარმატებებით დღესდღეობით საქართველოში საუკეთესო მწვრთნელთა შორის ვარ. გორის მუნიციპალიტეტისგანაც ვგრძნობთ მხარდაჭერას - ასპარეზობაში მონაწილეობის მისაღებად ხელს გვიწყობენ, ლუკასთვის დუბაის ხარჯებიც მათ გაიღეს. ადრე მწირი დაფინანსება გვქონდა.
სასიხარულოა, რომ ჭადრაკის სექციაში ბავშვების რაოდენობა წლიდან წლამდე იზრდება გორშიც და ქარელშიც. ეს კი ადგილობრივი ხელისუფლების თანადგომით და ჩვენი შრომით კარგ შედეგებს აუცილებლად მოიტანს" - ამბობს ოთარ დოლიძე.
ყოველდღიური სპორტული გაზეთი "ლელო"
