ამირან პაპინაშვილმა (60) ბაქოს "დიდი პრიზის" ტურნირი მოიგო. ფინალში ჩვენებურმა მონღოლი ბოლბაატარ ჩიმედ-იონდოლი დაძაბულ ბრძოლაში დაამარცხა, თუმცა არანაკლებ რთული ორთაბრძოლა მესამე წრეში გადახადა მასპინძელ ილგარ მუშკიევთან. მუშკიევი თბილისის მსოფლიოს თასის წლევანდელი გამარჯვებულია, სახლში კი მსაჯებით შეგულიანებული კიდევ უფრო საშიში მეტოქე ჩანდა. საბედნიეროდ, პაპინაშვილი მოწოდები სიმაღლეზე აღმოჩნდა და ვაზარ-იუკო აართვა.
ჩვენებურმა სხვა შეხვედრებიც ძლიერად ჩაატარა - ყაზახი აშხატ ტელმანოვი ვაზარის შემდეგ დააიპონა, ნახევარფინალში კი ფინელ ვალტერ იოკინენს ორი ვაზარით მოუგო წმინდად.
უკვე თამამად შეიძლება ითქვას, რომ პაპინაშვილი წონაში ანგარიშგასაწევ მოჭიდავედ ჩამოყალიბდა.
დღეს ბაქოში კიდევ ერთმა ქართველმა იჭიდავა - შალვა ქარდავამ (66), მაგრამ ის პირველივე შეხვედრაში მონღოლ კიშიგბაიარ ბუუვაიბაატართან დამარცხდა და გავარდა. ხვალ ჩვენებურთაგან ნუგზარ ტატალაშვილი, თენგიზ პაპოშვილი (73), ავთანდილ ჭრიკიშვილი, ლევან წიკლაური (81) იჭიდავებენ, ვალერი ლიპარტელიანი (90), ალექსანდრე მსხალაძე, კონსტატინე მუკვანი (100) და ნოდარ მეტრეველი (+100) კი ზეგ იასპარეზებენ.
