ევროპის თასი: კიევისთვის ნაკრები ანთალიამ დაასახელა

ამ უქმეებზე კიევში ჭაბუკ ძიუდოისტთა შორის ევროპის თასი ტარდება, რომელშიც საქართველოს ნაკრები ასეთი შემადგენლობით მიიღებს მონაწილეობას: ირაკლი კუპატაძე (50), გიორგი კაციაშვილი, ბექა ნათათრალიშვილი, ერეკლე არხოზაშვილი, ირაკლი ლიპარტელიანი (55), კობა მჭედლიშვილი, ბექა სეხნიაშვილი, დიმიტრი ცაბაძე, ბექა უდესიანი (60), ზაზა მეგრელიშვილი (66), თამაზ კირაკოზაშვილი, ვანო ჩურჩხელაშვილი (73), გიორგი ქურდიანი, ნიკა მოველიძე (81), დავით რამაზაშვილი, გიორგი გველესიანი (90), გიორგი ძებისაშვილი, ზაზა გოჯიაშვილი (+90). ორი წარმომადგენელი გვეყოლება გოგოების ტურნირშიც - მარიამ ჯანაშვილი და გურანდა შოთაძე, რომლებიც 57-ში ჭიდაობენ.

ნაკრების მწვრთნელები - გიორგი თენაძე და გიორგი რევაზიშვილი ევროპის ჩემპიონატისთვის არჩევენ შეგირდებს და, ძირითადად, ანთალიის ევროპის თასზე ნაჩვენებ შედეგებს დაეყრდნენ. იმ ტურნირმა მთელ რიგ წონებში კიდევ უფრო დაძაბა კონკურენცია. მწვრთნელებსაც კიევში ყველა კონკურენტი მიჰყავთ.

შეგახსენებთ, რომ თურქეთში ნათათრალიშვილი და მეგრელიშვილი ჩემპიონები, არხოზაშვილი, მჭედლიშვილი, ბაჩანა ბოლქვაძე (66), რამაზაშვილი და გოჯიაშვილი მეორეპრიზიორები გახდნენ; კუპატაძე, კაციაშვილი, მოველიძე, გველესიანი, ძებისაშვილი ჯანაშვილი და შოთაძე კი მესამე ადგილზე გავიდნენ.

ამათგან კიევში მხოლოდ ბოლქვაძე ვერ მიდის, რომელმაც ანთალიაში ფინალში მეგრელიშვილთან შეხვედრაში ხელი იტკინა. ამათგან საქართველოს ჩემპიონი ბოლქვაძეა, თუმცა თურქულ ფინალში მეგრელიშვილი იმ ტრავმამდეც დიდი უპირატესობით უგებდა.

სიახლეა ჭაბუკებში ევროპის შარშანდელ ვიცე-ჩემპიონ კირაკოზაშვილის 73-ში გამოჩენაც, რომელიც ადრე 60-ში ჭიდაობდა, ახლა კი ერთი წონის გამოტოვება გადაწყვიტა. ვნახოთ, რამდენად გამოიჩენს თავს ასეთი რადიკალური ნახტომის შემდეგ.

ანთალიური შეჯიბრების მედალოსნებს მწვრთნელებმა რამდენიმე ფალავანიც დაამატეს, რომელთა შორისაა დამოუკიდებელი საქართველოს პირველი ოლიმპიური მედლის მფლობელის, ოლიმპიურ-პრიზიორი სოსო ლიპარტელიანის ვაჟი ირაკლი ლიპარტელიანი. ის აქამდე რამდენიმე ტურნირში ავადმყოფობის გამო ვერ გამოვიდა.

სავარაუდოდ, კიევის ტურნირი უკვე გამოავლენს 22-24 ივნისს ჩერნოგორიის ქალაქ ბარში გასამართ ევროპის ჩემპიონატზე წამსვლელ შემადგენლობას, თუმცა არც ისაა გამორიცხული, ზოგიერთ წონაში კონკურენცია კვლავაც ვერ გადაიჭრას.

მაგალითად, 55-ში 2 ადგილისთვის სამი, დაახლოებით თანაბრად ძლიერი კანდიდატი იბრძვის. თუ ვაკანტური ადგილები კიევის შემდეგაც დარჩება, მაშინ კონკურენცია მაისში გერმანიის ტურნირზე გადაიჭრება, სადაც ასევე წავლენ ის ფალავნები, რომლებსაც უკვე განაღდებული ექნებათ ევროპაზე ჭიდაობა. წინა კატეგორიისთვის თუ ის შეჯიბრება შესარჩევი იქნება, ამათთვის სასტარტო ფუნქციას შეასრულებს.

ყოველდღიური სპორტული გაზეთი "ლელო"