ამ უქმეებზე ბერძნულ მუდანიაში ტარდება ევროპის თასი ახალგაზრდა ძიუდოისტთა შორის სახელწოდებით "ილიადისის თასი", რომელშიც საქართველოს ნაკრებიც მიიღებს მონაწილეობას. ჩვენებისთვის ეს სეზონის პირველი გასვლაა უცხოეთში და გუნდის თავკაც გია გუგავას გაფართოებული შემადგენლობა მიჰყავს - 33 სპორტსმენი.
ლერი ჭელიძე, გიორგი საჩალელი, გიორგი ნათათრალიშვილი, მინდია ღოლიჯაშვილი (ყველა - 55), ვაჟა მარგველაშვილი, გელა კელიხაშვილი, გიორგი გუგულაშვილი, ლუხუმ ჩხვიმიანი (60), ბექა ვიბლიანი, ბექა ტუღუში, ირაკლი ლომიძე, ანდრო ბერუაშვილი (66), ფრიდონ გიგანი, მიხეილ მეზურნიშვილი, აპოლონ ზურაბიანი, ლევან გუგავა (73), ბექა ღვინიაშვილი, ბექა დონღვანი, დავით გაზდელიანი, ალექსანდრე
ახალგაზრდულ ნაკრებში წლეულს თაობათა ცვლის პროცესია, რადგან შარშანდელი შემადგენლობიდან ასაკის გამო ბევრს მოუწია წასვლა.
მაგალითად, უფროსებში გადავიდნენ ახალგაზრდებში მსოფლიოს პრიზიორი გიორგი მესაბლიშვილი (55); ამავე ასაკში ევროპის ჩემპიონი და მსოფლიოს მესამე პრიზიორი ლაშა შავდათუაშვილი სულაც ეროვნული ნაკრების ლიდერი გახდა 66-ში და ევროპის ჩემპიონატზე ლონდონის ოლიმპიადის საგზურის მოპოვების კარგ შანსსაც ინარჩუნებს.
უფროსებში გადავიდნენ ახალგაზრდებში ევროპის პრიზიორი მიხეილ ჩოხელი (73), გიორგი მერმანიშვილი (90), უშანგი კოკაური (+100) და კიდევ რამდენიმე მოჭიდავე.
შარშანდელებიდან ისევ რჩებიან ევროპის ვიცე-ჩემპიონები ჭელიძე და მატიაშვილი; აგრეთვე - მარგველაშვილი, გიგანი. თუმცა ამ გუნდმა ახალგაზრდულიდან ისეთი შევსება მიიღო, არა გვგონია, მთლიანობაში დასუსტდეს - ჭაბუკებში ევროპის, მსოფლიოსა და ევროპის ახალგაზრდული ოლიმპიური ფესტივალის გამარჯვებული ბექა ღვინიაშვილი, ჭაბუკებში მსოფლიოს ჩემპიონი თუშიშვილი, ევროპისა და მსოფლიოს ვიცე-ჩემპიონი ჩოჩელი... ოღონდ ამათგან ღვინიაშვილს ახალგაზრდულის ახალი სახე არც ეთქმის, რადგან მათთან შარშანაც იასპარეზა და მსოფლიოს მესამე პრიზიორიც გახდა... ეს ძალიან ძლიერი შევსებაა, ოღონდ მათ უფროსებში ჯერ მცირე ადაპტაცია დასჭირდებათ.
ჩვენი გუნდი გუშინ ავტობუსით გაემგზავრა მუდანიაში.
დასასრულს ჭაბუკებზეც - მომავალ შაბათ-კვირას პორტუგალიის ქალაქ კოიმბრაში ევროპის თასი იმართება ამ ასაკში, სადაც თბილისიდან არავინ მიდის, თუმცა პირინეის ნახევარკუნძულზე მცხოვრები ქართველები კი გამოვლენ. იქ საჭიდაოდ ესპანეთიდან ნიკოლოზ შერაზადიშვილი (81) და სანდრო ოთარაშვილი (+90) გადავლენ, რომლებსაც პორტუგალიაში მცხოვრები ანრი ეგუტიძე დაემატება. ეს ბიჭი გარკვეული სავიზო პრობლემების გამო პორტუგალიის სახელით ვერ გამოდის და იქაურ ფედერაციას ჩვენებისთვის უთხოვია, საქართველოს დროშით გამოსვლის უფლება დაერთო.
წინააღმდეგნი არც ჩვენები წასულან, ოღონდ რომელ წონაში ჭიდაობს, ამგვარ დეტალებზე პორტუგალიურ მხარეს არაფერი უცნობებია.
შეგახსენებთ, რომ შერაზადიშვილმა ორი კვირის წინ ესპანეთში გამართული ევროპის თასი მოიგო და საერთაშორისო რეიტინგში მესამე ადგილზეა.
ყოველდღიური სპორტული გაზეთი "ლელო"
