18 დეკემბერს სპორტკომპლექს "არენაში" საშველი დაადგება არაერთხელ გადადებული ქვეყნის პირველობის გამართვას ძიუდოში როგორც ვაჟთა, ასევე - ქალთა შორის.შეჯიბრება "არენაში" დილის 11 საათზე დაიწყება და დღეს ტატამზე საჭიდაოდ მხოლოდ ვაჟები გავლენ. ისიც მარტო სამი უმჩატესი წონის - 60, 66 და 73-ის ფალავნები; დანარჩენები კი 19 დეკემბერს იასპარეზებენ.
19 დეკემბერს იჭიდავებენ ქალებიც. როგორც ვაჟთა ნაკრების მთავარმა მწვრთნელმა ირაკლი ცირეკიძემ გვითხრა, ჩემპიონატში წამყვან სპორტსმენთა უმეტესობა გამოვა, თუმცა დანაკლისიც დიდია.
უპირველესად - ოლიმპიური ჩემპიონი ლაშა შავდათუაშვილი (66), რომელიც საზარდულის ოპერაციის შემდეგ ვარჯიშს კი
სხვათა შორის, მას ზუსტად დღეს ოპერაციიდან სამი თვე უსრულდება, რაც იმას ნიშნავს, რომ ექიმებთან გეგმიურ შემოწმებას გაივლის და ისინი იტყვიან, როდის ვიხილავთ საქმეში ოლიმპიურ ჩემპიონს.
ბარემ აქვე გეტყვით, რომ ოპერაციით გამოწვეული ტაიმ-აუტის მიუხედავად, შავდათუაშვილი მსოფლიოს რეიტინგში 66 კილოგრამის ლიდერი გახდა. ეს ქულათა განახევრება-განულებამ გამოიწვია, ახლებული კალკულაციის შედეგად კი ყველაზე მეტი ქულა კარალეთელ ფალავანს აღმოაჩნდა.
აქ ადრე ლიდერობისთვის რუსები - ალიმ გადანოვი და მუსა მოგუშკოვი იბრძოდნენ, ქულათა ჩამოკლების შემდეგ კი ორივე გავარდა სამეულიდან. 1032-ქულიან შავდათუაშვილს კვალში იაპონელი მსოფლიოს ექსჩემპიონი ჯუნპეი მორიშიტა უდგას 1006-ით, მესამეზე კი მონღოლი მსოფლიოს ჩემპიონი, ოლიმპიური პრიზიორი ცაგანბაატარ ხაშბაატარია 956 ქულით.
შავდათუაშვილის გარდა, "არენაში" არ იქნებიან ევროპის ვიცე-ჩემპიონი ბეთქილ შუკვანი (60), ამბაკო ავალიანი (73), ევროპის ორგზის ვერცხლისმედალოსანი ლომერ ჟორჟოლიანი (100) და ევროპის მძიმეწონოსანი მედალოსანი ზვიად ხანჯალიაშვილი. არ იქნება არც დისკვალიფიცირებული თენგიზ პაპოშვილი (73).
ამათ გარდა, იჭიდავებს ახალგაზრდული თუ ეროვნული ნაკრების ყველა ლიდერი - ევროპის მესამე პრიზიორი ამირან პაპინაშვილი (60), შალვა ქარდავა (66), ნუგზარ ტატალაშვილი (73), ავთანდილ ჭრიკიშვილი (81), ევროპის ჩემპიონი ვალერი ლიპარტელიანი და ბექა ღვინიაშვილი (ორივე - 90), ადამ ოქრუაშვილი (+100)...
როგორც ვხედავთ, სიახლეა ღვინიაშვილის ირგვლივ - ახალგაზრდა ტალანტი წონით კატეგორიას იცვლის და 90-ში გადადის.
ეს მოსალოდნელიც იყო - ის მოზარდია, თანაც იმდენად ძვალმსხვილი, ასაკის მატებასთან ერთად წონაც აუცილებლად გაექცეოდა. ჰოდა, ახალ წონაში გადაბარგებაც დროის საკითხი იყო, 90 კილოგრამი კი ის ფეხბედნიერი წონაა, რომელსაც საინტერესო კონკურენცია არ აკლდება - ჯერ ზურაბ ზვიადაური-ცირეკიძე, მერე - ზვიადაური-ლიპარტელიანი, ახლა კი ლიპარტელიანი-ღვინიაშვილი. მით უფრო, რომ ახალი წესები თითქოს ცოტა უფრო მისაღები ღვინიაშვილისთვისაა.
ირაკლი ცირეკიძის თქმით, ქვეყნის ეს პირველობა ძალიან მნიშვნელოვანია სპორტსმენებისთვის, რადგან მისი შედეგები განსაზღვრავს ეროვნული ნაკრების საგაისო შემადგენლობას - გუნდში მედალოსნები შევლენ და საერთაშორისო ტურნირებშიც ისინი იჭიდავებენ.
გამონაკლისი მხოლოდ შავდათუაშვილისთვის დაიშვება. ცირეკიძის თქმით, ვინც ქვეყნის ამ პირველობას გამოტოვებს, მას არც 25-27 აპრილს ბუდაპეშტში გასამართ ევროპის ჩემპიონატზე გამოსვლის შანსი ექნება. გაისადვე - 26-31 აგვისტოს რიო დე ჟანეიროში მსოფლიოს პირველობაც გაიმართება.
ცირეკიძემ ისიც გვითხრა, რომ ფედერაციასთან უკვე ჰქონდა მოლაპარაკება და განზრახულია, მანამდე - დაახლოებით ივნისის დასაწყისში კიდევ ერთხელ ჩატარდეს ისეთი მასშტაბური ტურნირი, როგორიც ქვეყნის ახლანდელი ჩემპიონატია და იქ უკვე ახალი გუნდის კონტურები გამოიკვეთოს, რომელიც მსოფლიოსთვის მოემზადება.
იქნებ ახლანდელი პირველობის შემდეგაც გამოჩნდეს ვინმე, ხომ უნდა მოვიძიოთო, გვითხრა ცირეკიძემ.
ყოველდღიური სპორტული გაზეთი "ლელო"
