2 მარტს ვარშავაში ვაჟ ძიუდოისტთა "ევროპის ღია თასი" იწყება, რომლის პირველ დღესაც 60, 66 და 73 წონითი კატეგორიების ფალავნები იასპარეზებენ, დანარჩენები კი კვირას იჭიდავებენ. 60 კილოგრამში საქართველოს ღირსებას ვაჟა მარგველაშვილი და პაატა მერებაშვილი დაიცავენ, რომლებიც პირველივე წრიდან ჩაებმებიან ტურნირში. მარგველაშვილი ებრაელ იოავ შემეშის ხვდება, მასთან წარმატების შემთხვევაში კი მეორე წრეში წინა კვირას გამართული დიუსელდორფის "დიდი პრიზის" ბრაზილიელი ვიცე-ჩემპიონი დიეგო სანტოსი ელოდება. საქართველოს ახალგაზრდა ჩემპიონი საკმაოდ რთულ ჯგუფში მოხვდა, თუმცა ბრაზილიელს თუ გასცდა, მერე მეოთხედფინალამდე მასზე ძლიერი აღარ ელოდება. მერებაშვილი თავდაპირველად
66-ში ჩვენი ერთადერთი მონაწილე შალვა ქარდავა პირველ წრეში ისვენებს და ავსტრიელ ალექსანდერ ვაიხინგერისა და ლატვიელ დმიტრის ჰარატანსს შორის მოგებულის გამოვლენას დაელოდება.
ქარდავას დღეში არიან ჩვენი ფალავნები 73 კილოგრამში - პირველ წრეში ზებედა რეხვიაშვილიც ისვენებს და ნუგზარ ტატალაშვილიც. რეხვიაშვილის მომავალი მეტოქე კი ფინელი ეეტუ ლაამანენისა და ბრიტანელი სტეფან ფრიდრიხის პაექრობაში გაირკვევა, ტატალაშვილი კი ჩეხ მიშალ ვანიცეკსა და ირლანდიელ ლოიდ მანინგს შორის მოგებულს შეხვდება.
81-ში ყველაზე მეტი - სამი მონაწილე გვყავს, რომელთაგანაც პირველ წრეში მხოლოდ დიუსელდორფის ტურნირის ვიცე-ჩემპიონი ლევან წიკლაური ისვენებს. მეორე წრეში მას მონღოლ ალტანბაგანა განტულგასა და სერბ ალექსეი ნეფედოვს შორის გამარჯვებულთან მოუწევს ჭიდაობა. პაატა ღვინიაშვილი სერბ მიროლიუბ ივეზიჩს ხვდება, მათ შორის უძლიერესს კი მეორე წრეში უკვე ელოდება მასპინძელი იაკუბ კობენეცი. ხვიჩა ხუციშვილი ვარშავაში გამოსვლას უნგრელ მილან კოლერთან პაექრობით დაიწყებს, მოგებული კი შემდეგ შეხვედრას ბრაზილიელ მაურო მოურასთან გამართავს.
90-ში მთლიანად ახალგაზრდების იმედად ვართ. ლაშა ტაველური მეორე წრეშია დაშვებული, მის მეტოქეს კი ლიტველიი ზილვინას ლეკავიჩიუსისა და მონღოლი ცოგტგერელ ხუტაგის ორთაბრძოლა გამოავლენს. ტაველურთან ახლოსაა ახალგაზრდებში უკრაინელთა მსოფლიოს ჩემპიონი ქუედჯაუ ნჰაბალიც. ბექა ღვინიაშვილი პირველივე წრეში იჭიდავებს უკრაინელ ანდრეი სპირიდონოვთან, ხოლო მას თუ გასცდება, მეორე წრეში გამოცდილი უნგრელი კრისტიან ტოტი ელოდება.
მოგეხსენებათ, ამ ტურნირზე ძიუდოს ლომერ ჟორჟოლიანი (100) უბრუნდება. ის პირდაპირ მეორე წრეშია დაშვებული, სადაც ლიტველ კაროლის ბაუზას შეხვდება. ამ წონაში ტურნირში ასევე მეორე წრიდან ჩაებმება დავით ლორიაშვილი, სადაც უკრაინელი დმიტრო ბერეჟნი ელოდება. რაც შეეხება მძიმე წონას, იქ მონაწილე არ გვყავს.
ყოველდღიური სპორტული გაზეთი "ლელო"
ასევე იხილეთ:
ლომერ ჟორჟოლიანი ძიუდოში ბრუნდება
