ძიუდოისტთა მსოფლიოს ჩემპიონატამდე სამიოდე დღე დარჩა - 26 აგვისტოს იწყება ბრაზილიურ რიო დე ჟანეიროში და გაირკვა კიდევ ერთი სერიოზული კონკურენტის - რუსეთის ვაჟთა ნაკრების შემადგენლობა. ცოტა მოულოდნელია, რომ ისინი ბრაზილიაში არასრული გუნდით ჩადიან - მონაწილე არ ეყოლებათ 100 კილოგრამში.
ასევე თვალშისაცემია, რომ ლონდონის ოლიმპიადის ჩემპიონთა ტრიოდან არც ერთი არ ჭიდაობს - არსენ გალსტიანი (60) ივლისში ყაზანში უნივერსიადაზე კი გამოვიდა და ვერცხლიც მოიპოვა, მაგრამ ამ ტურნირისთვის არაა მზად; მანსურ ისაევმა (73) ზამთარში მოტეხილი ხელი კი მოირჩინა, მაგრამ ტურნირში ჯერაც არსად გამოსულა;
რუსები ბრაზილიაში ამ შემადგენლობით იჭიდავებენ: ბესლან მუდრანოვი (60), ალიმ გადანოვი (66), მურატ კოძოკოვი (73), ივან ნიფონტოვი, ივან ვორობიოვი (ორივე - 81), კირილ დენისოვი, გრიგორი სულემინი (90), ალექსანდრ მიხაილინი (+100).
გუნდურ ტურნირში, რომელიც ჩემპიონატის დასკვნით დღეს - 1 სექტემბერს გაიმართება, მიხაილ პულიაევი (66), სირაზუდინ მაგომედოვი (81), დენის იარცევი (73), რენატ საიდოვი და იური პანასენკოვი (ორივე +90) გამოვლენ.
ცოტა გასაკვირია, რომ შემადგენლობაში ვერ მოხვდა ევროპის წლევანდელი ვიცე-ჩემპიონი კამალ ხან-მაგომედოვი (66) - ვერც პირადში და ვერც გუნდურში.
ჩვენი ჩრდილოელი მეზობლები რიო დე ჟანეიროში მთლად საზეიმო განწყობით ვერ მიდიან - ჯერ იყო და ქალთა ნაკრების ერთ-ერთი ლიდერი, ევროპის ოთხგზის ჩემპიონი, მსოფლიოს პრიზიორი ელენა ივაშენკო დაიღუპა (ოფიციალური ვერსიით, ის ტიუმენში მრავალსართულიანი კორპუსიდან მთვრალ მდგომარეობაში მყოფი გადმოვარდა, თუმცა ოჯახის წევრები ეჭვობენ, რომ გადმოაგდეს), ახლახან კი რუსული ძიუდოს პატრიარქი, პრეზიდენტ ვლადიმერ პუტინის მწვრთნელი ანატოლი რახლინი გარდაიცვალა.
დასასრულ, ცნობა საფრანგეთიდან: მუხლი იტკინა მსოფლიოსა და ოლიმპიურმა ბრინჯაოსმედალოსანმა უგო ლეგრანმა (73), თუმცა ფრანგული წყაროების ცნობით, ბრაზილიაში მის ჭიდაობას საფრთხე არ ემუქრება.
ყოველდღიური სპორტული გაზეთი "ლელო"
