14 დეკემბერს დიღომში მდებარე ძიუდოს აკადემიაში მორიგ ნოვატორულ ტურნირს ჩაეყრება საფუძველი - საქართველოს საკლუბო ჩემპიონატს ჭაბუკთა შორის. ანალოგიური შეჯიბრებები უფროსებში ადრე პერიოდულად კი ტარდებოდა, მაგრამ მოზარდებში პირველად ეწყობა. ამჯერად მის ჩატარებას ბიძგი 2015 წელს თბილისში გასამართმა ევროპის ახალგაზრდულმა ოლიმპიურმა ფესტივალმა მისცა - შეჯიბრებაში იმ ასაკის მოზარდები, ანუ 1998-99 წლებში დაბადებულები მონაწილეობენ. საქართველოს ძიუდოს ფედერაცია ცდილობს, ამ ასაკის ბავშვებს რაც შეიძლება, მეტი ტურნირები მისცეს - საგანგებოდ მათთვის ტარდება საქართველოს ჩემპიონატი პირად პირველობაში, დაჰყავთ უცხოეთში შეჯიბრებებზე, ახლა კი საკლუბო ტურნირიც იღებს სათავეს.
ეს ტურნირიც უფროსთა ანალოგიური შეჯიბრებების მსგავსი ფორმატით ტარდება - ხუთ წონით კატეგორიაში. თითოეულ გუნდში 5 ძირითადი და 2 სათადარიგო მონაწილეა.
გუნდები კენჭისყრით დაწყვილდებიან, წაგებული ეთიშება ტურნირს და მხოლოდ ერთი ბრინჯაო გაიცემა.
შეჯიბრება ძიუდოს აკადემიაში 11 საათზე დაიწყება და იმავე დღეს დამთავრდება.
ყოველდღიური სპორტული გაზეთი "ლელო"
