ბაქოში "სერხედჯის" ოლიმპიურ ცენტრში დღეს ძიუდოისტთა სეზონის პირველი შეჯიბრება - მასტერსის ტურნირი იწყება, რომელშიც ექვსი ქართველი ჭიდაობს: დავით ასუმბანი, ამირან პაპინაშვილი (ორივე - 60), ლევან წიკლაური (81), ვალერი ლიპარტელიანი (90), ლომერ ჟორჟოლიანი (100) და ზვიად ხანჯალიაშვილი (+100). გუშინ წილისწყრამ მათი მეტოქეები გამოავლინა.დღეს ჩვენებურთაგან მხოლოდ 60-ის ფალავნები იჭიდავებენ. როტერდამის "დიდი პრიზის" ჩემპიონი პაპინაშვილი პირველ წრეში იტალიელ მსოფლიოსა და ევროპის ბრინჯაოს პრიზიორ ელიო ვერდეს ხვდება, ასუმბანი კი ტურნირს რუს ევროპის ჩემპიონ არსენ გალსტიანთან შეხვედრით დაიწყებს. ასუმბანს გალსტიანთან აქამდე არასოდეს უჭიდავია, პაპინაშვილი
რაც შეეხება ასუმბანს, გალსტიანს თუ გასცდა, ბრაზილიელ ფელიპე კიტადაის და კიდევ ერთ მონღოლს, ბოლბაატარ ჩიმედ-იონდონს შორის გამარჯვებულს შეხვდება.
ხვალ ლევან წიკლაური პირველივე წრეში კანოს მემორიალის შარშანდელ გამარჯვებულთან, იაპონელ ტაკაჰირო ნაკაისთან იჭიდავებს. სხვათა შორის, იმ ტურნირზე ნაკაიმ ავთანდილ ჭრიკიშვილს მოუგო, წიკლაურს კი პირველად ხვდება. ამათში გამარჯვებულს საკმაოდ სუსტი მეტოქე ეყოლება - სლოვენიელი ევროპის პრიზიორი ალიაზ სედეჯი ან ხორვატი ტომისლავ მარიჯანოვიჩი.
პირველ წრეში შედარებით გაუმართლა ვალერი ლიპარტელიანს - უზბეკ ხურშიდ ნაბიევს ხვდება, ვისაც დღემდე ერთხელ შეხვდა და ისიც მოუგო. სამაგიეროდ, ჯგუფში სხვები ჰყავს საშიშები - მასპინძელთა ევროპის ვიცე-ჩემპიონი და მსოფლიოს პრიზიორი ელხან მამადოვი და მსოფლიოს იაპონელი ვიცე-ჩემპიონი დაიკი ნიშიამა. აღსანიშნავია, რომ მსოფლიოს მედლები ორივემ ბოლო პირველობაზე მოიპოვა, ამხელა შეჯიბრების ორი მედალოსანი მეტოქე ერთად კი ხუმრობა საქმე არაა.
წილისყრამ ნამდვილად არ გაუმართლა ჟორჟოლიანს - მასტერსს მასპინძელთან, ახალგაზრდებში ევროპის ჩემპიონ ელმარ გასიმოვთან შეხვედრით იწყებს, მას თუ გასცდება, მომდევნო მეტოქედ იაპონელ მსოფლიოს ჩემპიონ ტაკამასა ანაისა და მონგოლ ტემუულენ ბატულგას შორის გამარჯვებული ელოდება.
თუმცა წილისყრამ ყველაზე მეტად მაინც ხანჯალიაშვილი გაწირა - იაპონელთა ოლიმპიურ და მსოფლიოს ორგზის ჩემპიონ კეიჯი სუძუკის ხვდება. მართალია, კეიჯი ძველებურად ვეღარ ბრწყინავს, მაგრამ ბებერი ხარის ხომ რქანიც ხნავენ. ამათში მოგებულის მეტოქე ბელარუს ოლიმპიურ ჩემპიონ იჰარ მაკარაუს და პოლონელ ევროპის ორგზის ვიცე-ჩემპიონ იანუშ ვოინაროვიჩს შორის გამარჯვებული იქნება.
.
