უფროსებისა და ახალგაზრდების მსგავსად, საქართველოს ჭაბუკ ძიუდოისტთა ნაკრებიც ევროპის ჩემპიონია - ჩვენმა ბიჭებმა სოფიაში კონტინენტის გუნდური პირველობა მოიგეს. ირაკლი ცირეკიძისა და მინდია ბოდაველის გაწვრთნილმა გუნდმა ქვეჯგუფში ტურნირზე მეორე ნომრად განთესილ იტალიას და გერმანიას მოუგო, ნახევარფინალში კი უკრაინას აჯობა. საინტერესოა, რომ სამივე პაექრობაში ქართველებმა 4:1 გაიმარჯვეს.
ასეთივე ანგარიშით დაასრულეს ფინალური შეხვედრაც ჰოლანდიასთან, სადაც ჩემპიონობა ვადამდე გაინაღდეს - რობინზონ ბეგლარაშვილმა (60), ბაგრატ ნინიაშვილმა (66) და ლაშა დუდაშვილმა (73) თავიანთი წილი პაექრობები სწრაფად მოიგეს და ანგარიში 3:0 გახადეს.
განსაკუთრებით უნდა აღვნიშნოთ დუდაშვილი, რომელმაც
დარჩენილ ორ არაფრის მომცემ ორთაბრძოლაში გოგა ქევხიშვილი (81) დამარცხდა - იუკო კი მოიპოვა, მაგრამ მანამ ვაზარი დაკარგა, რისი გაქვითვაც ვერ შეძლო. წაგებას სასწაულებრივად გადაურჩა გელა ზაალიშვილიც (+81), რომელიც მტკივნეულზე უიმედო ვითარებიდან დაუძვრა ჰოლანდიელს, მერე კი იუკო აართვა და საერთო ანგარიში 4:1 გახდა ჩვენების სასარგებლოდ.
გუნდურ ტურნირში ჩვენი გოგოების ნაკრებიც მონაწილეობდა, მაგრამ ისინი ჯერ ქვეჯგუფში დამარცხდნენ ხორვატიასთან -1:4, მერე კი იმავე ანგარიშით სანუგეშოშიც წააგეს ფრანგებთან.
შეგახსენებთ, რომ პირად პირველობაში ბიჭებმა 8 მედალი მოიპოვეს - 1 ოქრო, 3 ვერცხლი და 4 - ბრინჯაო, გოგოებმა კი თითო ოქრო და ბრინჯაო. ჩემპიონები დუდაშვილი და მზია ბებოშვილი (52) გახდნენ, ვერცხლის მედლებს გიორგი ნიაზაშვილი (50), ქევხიშვილი და ზაურ კენჭაძე (90) დაეუფლნენ, ბრინჯაოსას - მარიამ ჭანტურია (57), ბეგლარაშვილი, ნინიაშვილი, ონისე სანებლიძე (90) და ზაალიშვილი.
