ძიუდოისტთა სალიცენზიო რეიტინგი: არაბეთში ცოტა ვიხეირეთ

აბუ დაბის "დიდ მუზარადზე" გამოსვლის შემდეგ სალიცენზიო რეიტინგში ჩვენების მდგომარეობა შედარებით გამოსწორდა, იმის მიუხედავად, რომ საემიროებში მთლიანად ნაკრები არც ისე დიდი წარმატებით გამოვიდა - მხოლოდ ორი მედალი, ოქრო და ბრინჯაო.

თუმცა რეიტინგში წინსვლაც, ძირითადად, იმ წონებშია, სადაც ეს მედლები ავიღეთ - 60-სა და 73-ში. თუმცა რეიტინგის ლიდერობა ჯერაც ვერ დავიბრუნეთ ვერც ერთ წონაში.

თამამად შეიძლება ითქვას, რომ რიო დე ჟანეიროს ოლიმპიადის საგზურები ხუთ წონაში - 60-ში, 73-ში, 81-ში, 90-სა და +100-ში განაღდებული გვაქვს, თუმცა რეიტინგი მაინც მნიშვნელოვანია, რადგან რაც უფრო დაწინაურებული ხარ, ტურნირზე მით უფრო იოლი ბადე გელოდება. ყოველ შემთხვევაში, მთავარ ფავორიტებს საწყის ეტაპზე არ შეხვდები.

ლიდერები მეტ-ნაკლებად თანაბრად არიან გადანაწილებულნი ბადეში და სხვა ოლიმპიური საჭიდაო სახეობებისგან განსხვავებით, ყველას ერთ ჯგუფში მოხვედრა გამორიცხულია.

ევროპისა და ოლიმპიური ჩემპიონი ლაშა შავდათუაშვილი (73) არაბეთში მოპოვებული ბრინჯაოს შემდეგ მე-13 ადგილზეა 1070 ქულით, თუმცა ამ წონაში ჩვენი ლიდერი ნუგზარ ტატალაშვილია - მე-4 ადგილი და 1602 ქულა.

მძიმე წონაში ასევე მეოთხეა ადამ ოქრუაშვილი (1666), იმის მიუხედავად, რომ კარგა ხანია, არ უჭიდავია. კიდევ ერთი მძიმეწონოსანი ლევან მატიაშვილი მე-9-ეა 1440-ით.

81-სა და 90-ში კვლავაც მეორეზე ვართ და ჯერ ისევ ველოდებით ამ წონებში დაკარგული ლიდერობის დაბრუნებას. ორივე ჩვენებური ამჟამად მეორეზეა და თითო-ოროლა ქულით ჩამორჩება ლიდერებს.

ევროპის სამგზის და მსოფლიოს ჩემპიონ ავთანდილ ჭრიკიშვილის (81) ანგარიშზე 1540 ქულაა და მხოლოდ ორით ჩამორჩება იაპონელ მსოფლიოს ჩემპიონ ტაკენორი ნაგასეს. ამ წონაში მე-11 ადგილზეა უშანგი მარგიანი (1086).

90 კილოგრამში ევროპის ორგზის გამარჯვებულსა და მსოფლიოს ვიცე-ჩემპიონ ვალერი ლიპარტელიანს (2440) მხოლოდ ერთი ქულით უსწრებს კორეელთა მსოფლიოს ჩემპიონი დონ ჰან გვაკი.

განთესვის ზონაშია ბექა ღვინიაშვილიც - V ადგილი და 1930 ქულა.

ორ წონაში კვლავაც გრძელდება დაუძლეველი კრიზისი - 66-სა და 100-ში. ეს ის წონებია, სადაც ახალი კადრების მოძიება ჯერაც გრძელდება, თუმცა სასურველი შედეგი მაინც არაა და მწვრთნელები ისევ ძველებს ეყრდნობიან. სამწუხაროდ, ესეც ამაოა.

66-ში ვაჟა მარგველაშვილი ისევ მე-40 ადგილზეა 412 ქულით, თუმცა ადგილმონაცვლეობის პრინციპით, ისიც შედის სალიცენზიო ზონაში, სადაც 34-ეა, მაგრამ ადგილმონაცვლეობის პრინციპით, შედის სალიცენზიო 22-კაციან სიაში.

100-ში 39-ეა ალექსანდრე მსხალაძე - 419 ქულა. ის ვერც კონტინენტურ კვოტაში ხვდება და ვერც სალიცენზიოში შედის.

ამ წონაში სალიცენზიო დავაში გურამ თუშიშვილიც ჩაერთვება, რომელიც წონას იკლებს და კვლავ 100-ს უბრუნდება. საერთაშორისო რეიტინგში ის ჯერჯერობით 106-ეა 62 ქულით. მასზე უკეთესი რეიტინგი აქვს ალექსანდრე ზაალიშვილს - 67-ე ადგილი 142-ით.

ამიერიდან ქალთა შორის ორი გვეყოლება საქომაგო - თვის ბოლოს ჩინურ ქინგდაოში ესტერ სტამთან (70) ერთად მარიამ ჯანაშვილიც (52) იჭიდავებს. გასაგებია, რომ ჯანაშვილს ყველაფრის თავიდან დაწყება უწევს - პირველად ჭიდაობს ამ რანგის ტურნირზე.

სტამი საერთაშორისო რეიტინგში 25-ეა 718 ქულით, თუმცა სალიცენზიოში მე-13 ადგილზეა და სადღეისო მდგომარეობით, პირდაპირ იღებს საგზურს. შეგახსენებთ, რომ აქამდე ის რეგიონულ კვოტაში ხვდებოდა, ახლა კი დაწინაურდა. თავის მხრივ, ეს 100-ში გვიხსნის გზას რეგიონული კვოტისკენ, თუმცა ამ შანსს გამოყენება უნდა.

ვაჟთა რეიტინგები
60 კგ
1. ვონ ჯინ კიმი (კორეა) - 2210 ქულა
2. ბოლდბაატარ განბატი (მონღოლეთი) - 1868
3. იელდოშ სმეტოვი (ყაზახეთი) - 1864
4. ნაოჰისა ტაკატო (იაპოინია) - 1816
5. ამირან პაპინაშვილი (საქართველო) - 1788
7. ლუხუმ ჩხვიმიანი (საქართველო) - 647

66 კგ
1. გიორგი ზანთარაია (უკრაინა) - 2280
2. ტუმურკულეგ დავაადორჯი (მონღოლეთი) - 2185
3. მიხაილ პულიაევი (რუსეთი) - 2141
4. ბაულ ანი (კორეა) - 2040
5. ტომოფუმი ტაკაჯო (იაპონია) - 1700
40. ვაჟა მარგველაშვილი (საქართველო) - 412
81. თორნიკე თათარაშვილი (საქართველო) - 173
96. შალვა ქარდავა (საქართველო) - 140
100. ტრისტან ფეიქრიშვილი (საქართველო) - 131

73 კგ
1. რუსტამ ორუჯოვი (აზერბაიჯანი) - 2226
2. ჩანგრიმ ანი (კორეა) - 1898
3. საგი მუკი (ისრაელი) - 1884
4. ნუგზარ ტატალაშვილი (საქართველო) - 1602
13. ლაშა შავდათუაშვილი (საქართველო) - 1070

81 კგ
1. ტაკანორი ნაგასე (იაპონია) - 2542
2. ავთანდილ ჭრიკიშვილი (საქართველო) - 2540
3. ანტოინ ვალოის-ფორტიე (კანადა) - 2140
4. ლოიკ პიეტრი (საფრანგეთი) - 1720
5. სერგიუ ტომა (არაბეთის გაერთიანებული საემიროები) - 1614
11. უშანგი მარგიანი (საქართველო) - 1086
77. ზებედა რეხვიაშვილი (საქართველო) - 186
91. გიორგი პაპუნაშვილი (საქართველო) - 130

90 კგ
1. დონ ჰან გვაკი (კორეა) - 2541
2. ვალერი ლიპარტელიანი (საქართველო) - 2540
3. ნოელ ვან ტ ენდი (ჰოლანდია) - 2152
4. მაშუ ბაკერი (იაპონია) - 2046
5. ბექა ღვინიაშვილი (საქართველო) - 1930
53. ზვიად გოგოჭური (საქართველო) - 331

100 კგ
1. ლუკაშ კრპალეკი (ჩეხეთი) - 2534
2. ელმარ გასიმოვი (აზერბაიჯანი) - 2378
3. სირილ მარე (საფრანგეთი) - 2014
4. კარლ-რიხარდ ფრეი (გერმანია) - 1944
5. დიმიტრი პეტერსი (გერმანია) - 1820
39. ალექსანდრე მსხალაძე (საქართველო) - 419
67. ალექსანდრე ზაალიშვილი (საქართველო) - 142

+100 კგ
1. ტედი რინერი (საფრანგეთი) - 2550
2. ფაიცელ ჯაბალა (ტუნისი) - 1894
3. რიუ სიჩინოე (იაპონია) - 1790
4. ადამ ოქრუაშვილი (საქართველო) - 1666
5. ბარნა ბორი (უნგრეთი) - 1655
9. ლევან მატიაშვილი (საქართველო) - 1440
62. ონისე ბუღაძე (საქართველო) - 168

(იბეჭდება მცირე ცვლილებით)
ყოველდღიური სპორტული გაზეთი "ლელო"