წაგებულთა მოგებულები - ძიუდოს აკადემიაში დამთავრდა მეორე დონის ჩემპიონატი

ძიუდოს აკადემიაში დამთავრდა მეორე დონის ჩემპიონატი, ეგრეთ წოდებული წაგებულთა ტურნირი, რომელსაც უნდა გამოევლინა ის სამ-სამი მონაწილე ყველა წონაში, რომლებიც საქართველოს ჩემპიონატის ოთხ-ოთხ მედალოსანს გამოავლენს და საკლუბო პირველობის მონაწილე კლუბებს დააკომპლექტებს.

ამიტომ მასში საქართველოს წლევანდელი მედალოსნები არ გამოდიოდნენ, მხოლოდ წაგებულები.

თუმცა აქაც კი რამდენიმე ისეთი ფალავანი დარჩა სამეულს მიღმა, არც ისე დიდი ხნის წინ ეროვნულ ნაკრებში რომ შედიოდნენ ან ბევრიც არ აკლდათ იქამდე - ტრისტან ფეიქრიშვილი, ლაშა გიუნაშვილი (ორივე - 66), ბაჩანა ბოლქვაძე (73), მიხეილ მეზურნიშვილი (81) და სხვები.

შეჯიბრება ცოტა განსხვავებული პრინციპით ჩატარდა - რაკი მხოლოდ სამი საუკეთესო უნდა გამოევლინათ და არა ჩვეულებისამებრ, მედალოსანი ოთხეული, ამიტომ დამამშვიდებელი წრე არ გამართულა და ნახევარფინალში წაგებულები ერთმანეთში აჭიდავეს საუკეთესო მესამეადგილოსნის გამოსავლენად. თუმცა ჯერჯერობით მაინც ღიად რჩება უფროსთა საკლუბო პირველობაში მონაწილე კლუბები - ეს საკითხი მარტის შუა რიცხვებში ჭაბუკთა საკლუბო ჩემპიონატის შემდეგ გაირკვევა.

ამასობაში ძიუდოში დღეს მორიგი ტურნირი იწყება - ჭაბუკთა უმცროსი ასაკის სალიცენზიო ზონალური შეჯიბრებები, რომლებსაც თბილისი და ბათუმი უმასპინძლებენ.

60 კგ
1. გიორგი ბროლაშვილი, 2. ილია შუბითიძე, 3. ირაკლი კუპატაძე

66 კგ
1. გიორგი გუგულაშვილი, 2. შმაგი ლაგაზაური, 3. ლევან კირკიტაშვილი

73 კგ
1. თენგიზ პაპოშვილი, 2. ომარ ნიაზაშვილი, 3. გიორგი ხმელიძე

81 კგ
1. ლაშა ზურაბიანი, 2. გიორგი ქურდიანი, 3. ანზორ ბიბილაშვილი

90 კგ
1. ნოდარ ბერიანი, 2. ზაურ მამარდაშვილი, 3. ვახტანგ სარაჯიშვილი

100 კგ
1. რევაზ წულუკიძე, 2. იასონ ნემსაძე, 3. ნიკა აბულაძე

+100 კგ
1. გუგა კიბორძალიძე, 2. სლავა რეზესიძე, 3. გურამ ქოსმენაშვილი

ყოველდღიური სპორტული გაზეთი "ლელო"