გუშინ გაცნობეთ, რომ მადრიდში მიმდინარე ტურნირზე ჩვენი ბერძენ-რომაელები წარუმატებლად გამოვიდნენ და მედალი ვერ მოიპოვეს. ინფორმაცია ბაქოში მყოფმა საქართველოს ჭიდაობის ფედერაციის გენერალურმა მდივანმა მალხაზ ჯორბენაძემ მოგვაწოდა, რომელსაც იქაურ შეჯიბრებასთან დაკავშირებით დავუკავშირდით (მოგეხსენებათ, ამავე უქმეებზე ბაქოში "ოქროს დიდი პრიზის" ფინალური შეჯიბრება ჩატარდა). ეტყობა, მადრიდიდან ზუსტი ინფორმაცია არც ფედერაციის ხელმძღვანელობას ჰქონდა, რადგან ესპანეთის ჭიდაობის ფედერაციის საიტის მიხედვით ირკვევა, რომ ევროპის წლევანდელი ჩემპიონი რევაზ ლაშხი (60) მესამე ადგილზე გასულა.
სამწუხაროა, თავდაპირველად ზუსტი ინფორმაცია რომ ვერ მოვიძიეთ, მაგრამ მთავარი მაინც ლაშხის წარმატებაა. სიმართლე გითხრათ, გულმა
მწვრთნელებმა სწორედ ამიტომ არ აჭიდავეს ლაშხი ბაქოში - კონკურენტებს მოარიდეს. მსოფლიოზე მისი ერთ-ერთი მთავარი მეტოქე აზერბაიჯანელი ჰასან ალიევი იქნება, რომელიც ძალიან ძლიერი მოჭიდავეა - წლევანდლამდე ბოლო სამი წლის განმავლობაში არც ერთი პირველხარისხოვანი შეჯიბრება არ წაეგო, ვიდრე ლაშხმა არ მოუგო ევროპაზე. 2008 წელს ის ახალგაზრდებში ევროპის ჩემპიონი გახდა, მსოფლიოზე კი არ უჭიდავია. 2009-ში ისევ ახალგაზრდებში უკვე დუბლი შეასრულა - მსოფლიოც მოიგო და ევროპაც, შარშან კი ეროვნულ ნაკრებში გადმოინაცვლა და ახლა აქ შეასრულა დუბლი! მას სავსებით სამართლიანად ასახელებდნენ იმ ტურნირების საუკეთესო მოჭიდავედ. წლეულს დორტმუნდში ლაშხმა მას ევროპის პირველობის ნახევარფინალში მოუგო და მერე ჩემპიონიც გახდა, ალიევი კი ბრინჯაოს დასჯერდა.
ზემოთქმულიდან გამომდინარე, გასაგებია, რატომაც არ სურდათ მწვრთნელებს ლაშხის ბაქოში გაშვება. ჯერ ერთი, მას იქ დააკვირდებოდა უკლებლივ ყველა ნაკრების მწვრთნელი, მეორეც - ბედი კვლავ თუ შეახვედრებდა ალიევს, განწირული იყო, მეტოქეს მსაჯები ყველანაირად მიემხრობოდნენ და მოაგებინებდნენ, რაც ჩვენებურზე ფსიქოლოგიურად ცუდად იმოქმედებდა. ამიტომ ადგნენ და ბაქოს ნაცვლად მადრიდში გაგზავნეს, სადაც ამავე უქმეებზე "ესპანეთის XI დიდი პრიზი" თამაშდებოდა. ლაშხთან ერთად იქ საქართველოს ჩემპიონი ვლადიმერ გეგეშიძეც გაუშვეს, რომელსაც ტრავმების გამო ქვეყნის პირველობის შემდეგ დღემდე არსად უჭიდავია.
მადრიდულ ტურნირში სამივე დისციპლინაში - ქალებში, ბერძენ-რომაულ და თავისუფალი სტილით მოჭიდავე ვაჟებში სულ 40-მდე ნაკრები გამოდიოდა, თუმცა შეჯიბრება ვარსკვლავთა სიმრავლით ვერ დაიკვეხნიდა - მათი უმეტესობა ხომ ბაქოში ჭიდაობდა. ამის მიუხედავად, მაინც იყვნენ წონების ლიდერები - იგივე ლაშხი, თავისუფალ ჭიდაობაში ევროპის ორგზის ჩემპიონი, მოლდოვადან მონაკოში გადაბარგებული გენადი ტულბეა (55), ასევე "თავისუფალში" რუსთა ევროპისა და მსოფლიოს ორ-ორგზის გამარჯვებული აფხაზი დენის ცარგუში (74), ამავე წონაში უნგრელი ევროპისა და მსოფლიოს ბრინჯაოს პრიზიორი გაბორ ჰატოში და კიდევ რამდენიმე ცნობილი ფალავანი.
უშუალოდ ბერძენ-რომაელთა შორის 25 ნაკრები გამოდიოდა, 116 ფალავანი. ლაშხი პირველივე წრეში ორ პერიოდში დამარცხდა მომავალ ჩემპიონთან, სომხური წარმოშობის პოლონელ ევროპის ვიცე-ჩემპიონ ედუარდ ბარსეგიანთან - 0:4; 0:3. ბარსეგიანის წარმატებამ ჩვენებურს სანუგეშო წრეში გადასვლის საშუალება მისცა და მანაც ეს შანსი მაქსიმალურად გამოიყენა - ჯერ კიდევ ერთი სომხური წარმოშობის მეტოქე, ოღონდ ამჯერად ესპანელი ალბერტ ბაგუმიანი დაჯაბნა ძირითად დროში ერთნაირი ანგარიშით 3:0, ბრინჯაოსთვის შეხვედრაში კი აურელიან ლეციუ დასცა ასევე ორ პერიოდში - 5:2; 3:0.
გეგეშიძე პირველ წრეში ისვენებდა, მეორეში კი ვენესუელელი იორგენ კოვა ორ პერიოდში იდენტური ანგარიშით - 5:0 დაჯაბნა. სამწუხაროდ, მეტი ვეღარ შეძლო - შვედ ფისნილე ზაჰიტთან 1:3;1:3 წააგო და გავარდა.
ახლა მსოფლიომდე ძალების შესამოწმებლად და სასტარტოდ ერთი ტურნირი დარჩა - აგვისტოში პოლონეთში გასამართი პეტლიასინსკის მემორიალი. იქ წამსვლელთაგან გადაჭრით მხოლოდ ერთი კანდიდატია ცნობილი - ევროპის, მსოფლიოსა და ოლიმპიური ჩემპიონი მანუჩარ კვირკველია (74), რომელიც ბაქოში ასევე ტაქტიკური მოსაზრებებით არ აჭიდავეს, სხვათა ვინაობას კი მწვრთნელები მოგვიანებით დაასახელებენ. პოლონეთში თავისუფალი სტილით მოჭიდავეებიც იასპარეზებენ, თუმცა ჯერ არც მათი საბოლოო შემადგენლობაა ცნობილი.
ყოველდღიური სპორტული გაზეთი "ლელო"
