კვირკველიამ ტრავმა წინა შეკრების დასრულებისას მიიღო. როგორც
კახაბრიშვილისვე თქმით, ბოლო დღეებში ევროპისა და მსოფლიოს ჩემპიონი, ოლიმპიური პრიზიორი გიორგი გოგშელიძეც (96) თავს იტკიებს. მიზეზი ვარჯიშისას მომხდარი შეჯახებაა, თუმცა, ექიმის თქმით, საშიში არც აქაა რამე და ეს ტრავმა გოგშელიძეს მზადებაში ხელს არ შეუშლის. საბედნიეროდ, რაიმე სერიოზული პრობლემები არც სხვებს აწუხებთ და სრული დატვირთვით ემზადებიან ჩემპიონატისთვის.
აქვე კიდევ ერთხელ შეგახსენებთ ჩვენი ნაკრებების შემადგენლობებს. ბეგი დარჩიამ ბერძენ-რომაელთა ღირსების დაცვა ლაშა გოგიტაძეს (55), რევაზ ლაშხს (60), მანუჩარ ცხადაიას (66), ვლადიმერ გეგეშიძეს (84), სოსო ჯაბიძეს (96) და გურამ ფერსელიძეს (120) ანდო, მისმა კოლეგა ზაზა თურმანიძემ კი `თავისუფალთა~ ნაკრებში ბესარიონ გოჩაშვილს (55), მალხაზ ქურდიანს (60), ოთარ თუშიშვილს (66), გელა საღირაშვილს (74), დავით მარსაგიშვილს (84), გიორგი გოგშელიძეს (96) და ლევან ბერიანიძეს (120) უხმო.
მსოფლიოს პირველობა 4-12 სექტემბერს გაიმართება მოსკოვში, თუმცა 4-5 სექტემბერი საერთაშორისო ფედერაციის კონგრესსა და სხვა ოფიციალურ ღონისძიებებს დაეთმობა, პირველი საჭიდაო დღე კი 6 სექტემბერია. ჩემპიონატში თავდაპირველად ბერძენ-რომაელები ჩაებმებიან - პირველ დღეს 55, 66 და 96 კილოგრამი წონითი კატეგორიების წარმომადგენლები იასპარეზებენ. ამ დღეს ტურნირი მოსკოვის დროით 13 საათზე დაიწყება და საკვალიფიკაციო შეხვედრები 19-საათამდე გაგრძელდება, რასაც გახსნის ნახევარსაათიანი ცერემონიალი მოჰყვება, 19.30-დან 21.30-მდე კი ფინალური შეხვედრები გაიმართება. 7-ში კვლავაც მხოლოდ ბერძენ-რომაელები იჭიდავებენ და ისევ სამ წონით კატეგორიაში - 60, 84 და 120-ში, 8-ში კი მათთან ერთად ჩემპიონატში ქალებიც ჩაებმებიან - ბერძენ-რომაელთაგან დარჩენილი ბოლო წონის, 74-ის ფალავნები, ქალთაგან - 48-51-ის. 9 სექტემბერი მთლიანად ქალებს დაეთმობათ - ხალიჩაზე 55, 59 და 63-ის წარმომადგენლები გავლენ, 10 სექტემბერი კი პირველობაზე ისევ შერეული დღეა, ოღონდ ქალებთან ერთად უკვე `თავისუფლები~ იასპარეზებენ. ქალთაგან ამ დღეს 67 და 72-კილოგრამიანები იჭიდავებენ, `თავისუფალთაგან~ - 55-იანები. ამის შემდეგ ჩემპიონატის მომდევნო ორი დასკვნითი დღე მთლიანად `თავისუფლებს~ დაეთმობათ - 11-ში ლეიბზე 60, 84 და 96-ის ფალავნები გავლენ, მეორე დღეს - 66, 74 და 120-ისა და ამით ჩემპიონატიც დასრულდება. იმავე დღეს 20 საათიდან დახურვის ნახევარსაათიანი საზეიმო ცერემონიალიც დაიწყება. შესარჩევი შეხვედრები ყველა დღეს 13-19 საათის შუალედში ჩატარდება. ასევე უცვლელია ფინალური ეტაპის დროც - 19.30-21.30.
ამჟამად ჩვენი ორივე ნაკრები დუშეთში, ოლიმპიურ ბაზაზეა დასკვნით შეკრებაზე, მოსკოვში კი პირველები ბერძენ-რომაელები გაფრინდებიან - 3 სექტემბერს.
მსოფლიოს ჩემპიონატის მოახლოებასთან ერთად ეს თემა უფრო აქტუალური ხდება. სხვადასხვა ქვეყნის წამყვანი საინფორმაციო საშუალებები ხშირად აქვეყნებენ ამა თუ იმ საინტერესო ცნობებს. ამჯერად მათი ყურადღების ცენტრში რუსული ალლსპორტინფო.რუ-ს მიერ გავრცელებული რუს `თავისუფალთა~ ნაკრების თავკაც ჯამბულათ თედეევის ინტერვიუ აღმოჩნდა, რომელშიც მან მთავარ კონკურენტებად აზერბაიჯანისა და ირანის ნაკრებები დაასახელა, მათ ყველა წონაში თანაბარი ძალის ფალავნები ჰყავთო. თუმცა ამას ხელი არ შეუშლია თამამი პროგნოზის გაკეთებაში და დასძინა, რომ ამ ტურნირზე შეგირდებისგან ოქროს ოთხ მედალს ელოდება, ანუ ზუსტად იმდენივეს, რამდენიც შარშან დანიურ ჰერნინგში გამართულ მსოფლიოს პირველობაზე მოიპოვეს. აქვე გეტყვით, რომ მსოფლიოს ოთხივე შარშანდელი ჩემპიონი ახლაც გუნდშია - ბესიკ კუდუხოვი (60), დენის ცარგუში (74), ჰაჯიმურატ გაცალოვი (96) და ბილიალ მახოვი (120). `ცხადია, შინ ჭიდაობა დამატებითი ფსიქოლოგიური დატვირთვაა - ამ დროს პასუხისმგებლობა იზრდება, მაგრამ ბიჭები ამას ითვალისწინებენ. ამიტომ აქ მუდამ კარგად ჭიდაობენ. ჩვენი ნაკრები ჭიდაობის ამ სახეობაში ლიდერია მსოფლიოს მასშტაბით, მაგრამ არც იმის დავიწყება შეიძლება, რომ მეტოქეებიც მუდამ მზად იქნებიან კუთვნილი ადგილის დასაკავებლად. ამიტომ ყველა კონკურენტის შესაძლებლობებს ბოლომდე ვსწავლობთ~ - თქვა მწვრთნელმა. მისი აზრით, ყველაზე საინტერესო ბრძოლები 96 კილოში გაიმართება, სადაც მათი ლიდერის, ევროპის სამგზის, მსოფლიოს ოთხგზისა და ათენის ოლიმპიადის ჩემპიონ ჰაჯიმურატ გაცალოვის მთავარი კონკურენტები აზერბაიჯანელი ოლიმპიური პრიზიორი, ევროპის ორგზის ჩემპიონი და მსოფლიოს ვერცხლის მედალოსანი ხეტაგ გოზიუმოვი, გოგშელიძე, ყაზახი ოლიმპიადის ვიცე-ჩემპიონი თეიმურაზ თიგიევი, უზბეკი მსოფლიოს პრიზიორი ყურბან ყურბანოვი და ირანელი მსოფლიოს ვიცე-ჩემპიონი საედ აბრაჰიმი იქნებიან. შეგახსენებთ, რომ გაცალოვი და გოზიუმოვი შარშან მსოფლიოს ფინალში შეხვდნენ ერთმანეთს და ძალიან ლამაზ, დაძაბულ ბრძოლაში გაცალოვმა ჩინებული ილეთებით მოიგო. განსაკუთრებით მეორე პერიოდში ფეხში შესვლას და აყვანას გამოვარჩევთ - მაშინ გაცალოვმა შესაშური რეაქცია გამოვლინა, შორიდან შეუვარდა ფეხში. აღსანიშნავია, რომ ორივე ოსია და ვლადიკავკაზში ერთ დარბაზში ვარჯიშობენ. ბარემ აქვე ისიც ვთქვათ, რომ ასევე ოსია თიგიევიც, თუმცა ბოლო დღეებში ვრცელდებოდა ინფორმაცია, რომ ყაზახები მსოფლიოზე არა მას, არამედ დაულეტ შაბანბაის აყენებდნენ, მაგრამ თედეევს უკეთ ეცოდინება და რაკიღა თიგიევი ახსენა, ესე იგი, ის იჭიდავებს. არადა, ყაზახებმა წლეულს აზიის თამაშებზე სულ სხვა - ნურზან კატაევი აჭიდავეს, რომელიც მეორეზე გავიდა.
96-ის გარდა, თედეევი მძიმე წონაშიც დიდი ინტერესით ელის მოვლენათა განვითარებას, განსაკუთრებით კი თავისი შეგირდის, ორგზის მსოფლიოს ჩემპიონ მახოვის შესაძლო შეხვედრა აინტერესებს უზბეკ ორგზის ოლიმპიურ ჩემპიონ არტურაზ ტაიმაზოვთან (კიდევ ერთი უცხოეთში ემიგრირებული ოსი). მსოფლიოს ჩემპიონატებზე და პირველხარისხოვან ტურნირებზე ისინი ერთმანეთს არ გადაჰყრიან. არადა, ამის შანსი 2007 წელს ბაქოში გამართულ სალიცენზიო შეჯიბრებაში იყო, მაგრამ მაშინ ერთმანეთს არ შეხვედრიან - ტაიმაზოვი კუბელ ალექსის როდრიგესთან დამარცხდა და საბოლოოდ მესამეზე გავიდა, მახოვმა კი ფინალში სწორედ როდრიგესს აჯობა და ჩემპიონი გახდა.
ერთი სიტყვით, მოსკოვში მართლაც საინტერესო ბრძოლებია მოსალოდნელი, ჩვენ კი დავძენთ, რომ ჩემპიონატს პირდაპირ ეთერში ტელეარხი `როსია -2~ აჩვენებს.
ყოველდღიური სპორტული გაზეთი "ლელო"
