ბერძენ-რომაელებმა მოსკოვური მსოფლიოს ჩემპიონატი ცივი შხაპით დაასრულეს - ჩვენი გუნდის ლიდერი, ევროპის, ოლიმპიური და მსოფლიოს ჩემპიონი მანუჩარ კვირკველია (74) მესამე წრეში ხორვატ ნევენ ზუგაისთან დამარცხდა და უმედლოდ დარჩა. ვინაიდან კვირკველია ჩვენი ნაკრების ბოლო მონაწილე იყო, ეს ავტომატურად ნიშნავდა გუნდის კრახსაც. ასე და ამგვარად, საქართველოს ნაკრებმა უმედლოდ დაასრულა გამოსვლა მსოფლიოს ჩემპიონატზე, რაც 2005 წლის შემდეგ პირველად მოხდა. მომხდარი ალბათ, ლოგიკური დასასრულია იმ პროცესებისა, რაც ბოლო წლებში საქართველოში ზოგადად საჭიდაო სახეობებში ხდება. სავარაუდოდ, ამ წაგებას მწვრთნელის შეცვლა მოჰყვება, მაგრამ ეს არაა გამოსავალი.
სიმართლე გითხრათ, კვირკველია ჩემპიონობის ერთ-ერთი კანდიდატი მეგონა. მით უფრო, ამ ჩემპიონატისთვის ჩვეულად ემზადებოდა. ბოლოსწინა შეკრებაზე ტრავმა კი მიიღო და ვერ გეტყვით, ამან რამდენად იქონია გავლენა მის მზადყოფნაზე, მაგრამ ფაქტია, რომ კრიტიკულ მომენტებში ხორვატი ორჯერ ვერ დაატრიალა. არადა, პირველი პერიოდი მოიგო და რაკიღა მეორეში მეტოქეს ერგო ჩოქბჯენში ჩასვლა, საქმის მოთავება მაშინვე შეეძლო. ვითარების გამოსწორება დამატებით დროშიც შეიძლებოდა, რაკიღა ბედი ისევ მის მხარეს იყო, მაგრამ ვერც ამჯერად დაატრიალა და წააგო. სამწუხაროდ, ჩვენებურს კუბელ რაულ კონსუეგრასთან მოგება ვერაფერში წაადგა. ნევენ ზუგაი თავისი ძმის - ნენად ზუგაისგან განსხვავებით (რომელიც 84-ში ბრინჯაოს პრიზიორი გახდა) რომ ვერაფერი მოჭიდავეა, მალევე დამტკიცდა - ჯერ მომავალ ჩემპიონთან, თურქ სელჩუკ ჩებთან დამარცხდა, რაც მოსალოდნელიც იყო, მერე კი სანუგეშოშიც პირველივე ბრძოლა დათმო არცთუ ძლიერ აზერბაიჯანელ რაფიკ ჰუსეინოვთან. სამწუხაროა ასეთ ფალავანთან მარცხი.
ჩები ზედიზედ მეორედ გახდა მსოფლიოს ჩემპიონი, რაც უდავოდ დიდი მიღწევაა. თან დამაჯერებლად მოიგო ტურნირი. აღსანიშნავია სომეხი ევროპის ჩემპიონის არსენ ჯულფალაკიანის წარმატებაც, თავად ტურნირს კი რაც შეეხება, გუნდურ ჩათვლაში რუსებმა გაიმარჯვეს, ჩემპიონატის საუკეთესო მოჭიდავედ კი ამბაკო ვაჩაძე (66) დაასახელეს. რუსებს და მათ ქართველ მწვრთნელ გოგი კოღუაშვილს ერთადერთი ოქრო ქართველმა ვაჩაძემ მოუტანა.
დღეს ჩემპიონატში მხოლოდ ქალების ჯერია, ხვალიდან კი ჩემპიონატში თავისუფალი სტილით მოჭიდავეებიც ჩაებმებიან - პირველად 55 კილოგრამის ფალავნები იასპარეზებენ, ანუ ჩვენებურთაგან ბესარიონ გოჩაშვილი გამოვა.
74. სელჩუკ ჩები (თურქეთი), 2. არსენ ჯულფალაკიანი (სომხეთი), 3. იმილ შარაფეტდინოვი (რუსეთი), დანიარ კობონოვი (ყირგიზეთი).
ლელო
