20-22 აპრილს სოფიაში გასამართ ევროპის სალიცენზიო ტურნირში რუს ბერძენ-რომაელთაგან ამბაკო ვაჩაძე (66) და ხასან ბაროევი (120) იჭიდავებენ. ამის შესახებ იქაურთა ნაკრების ქართველმა მთავარმა მწვრთნელმა გოგი კოღუაშვილმა რუს ჟურნალისტებთან სატელეფონო საუბარში განაცხადა.
სექტემბერში სტამბულში გამართულ მსოფლიოს ჩემპიონატზე რუსთა ნაკრები ულიცენზიოდ მხოლოდ ამ ორ წონაში დარჩა.
ამათგან 66-ში მოვლენათა ასეთი განვითარება ბევრისთვის მოულოდნელი იყო - ვაჩაძე თურქეთში ევროპის ორგზის და მსოფლიოს ჩემპიონის რანგში ჩავიდა, თუმცა პირველივე შეხვედრაში ხორვატ დანიელ იანჩიჩთან დამარცხდა.
ცოტა სხვა ვითარებაა მძიმე წონაში, სადაც მსოფლიოზე არ უჭიდავია მსოფლიოსა და
მან გამოტოვა მსოფლიოსთვის შესარჩევი შეჯიბრება - რუსეთის პირველობა. ამიტომ სტამბულში ალექსანდრ ანუჩინმა იჭიდავა, მაგრამ წარუმატებლად. ახლა კი მის ნაცვლად მდგომარეობის გამოსწორებას ისევ ბაროევი ცდილობს. მან წლეულს ევროპის პირველობაზეც იასპარეზა და ფინალშიც გავიდა, მაგრამ იქ მასპინძელ რიზა კაიაალპთან წააგო და ვერცხლს დასჯერდა.
კოღუაშვილს მძიმე წონაში სოფიაში წასაყვანი კანდიდატის არჩევაზე დიდი ფიქრი არ დასჭირდებოდა, რადგან ბაროევზე უკეთესი არც ჰყავს ვინმე. 66-ში კი გადაწყვეტილების მიღება არც ისე იოლი იქნებოდა, რადგან იქ ვაჩაძეს კონკურენციას ევროპის, მსოფლიოსა და ოლიმპიური ჩემპიონი ისლამ-ბეკ ალბიევი უწევს.
ეროვნებით ჩეჩენი, თუმცა კი ინგუშეთში მცხოვრები ალბიევი საჭიდაო მწვერვალებზე 60 კილოგრამში ავიდა, თუმცა ბოლო წლებში წონას ვერ გაუმკლავდა და 66-ში სცადა გადმოსვლა.
რამდენიმე მცდელობა უშედეგოდ დასრულდა. ვაჩაძე წარმატებით იცავდა ლიდერის სკამს და ასეთი მკვეთრი საკადრო ცვლილების დიდი ენთუზიაზმი არც კოღუაშვილს ეტყობოდა - ის ალბიევს ყოველთვის წონის დაკლებას და 60-ში დარჩენას ურჩევდა.
შეგირდი ერთხანს კი უსმენდა, მაგრამ საბოლოოდ მაინც არ დაიშალა და მიზანსაც მიაღწია - წლეულს ივან პოდუბნის მემორიალზე ნახევარფინალში ვაჩაძე დაამარცხა და ევროპაზეც იასპარეზა, სადაც მესამეზე გავიდა.
თითქოს ამით მისი ლიდერობა საეჭვო არ უნდა ყოფილიყო, მაგრამ კოღუაშვილი პირველ სალიცენზიო ტურნირზე თანამემამულეს ენდო, ჩეჩენი კი მეორესთვის შემოინახა. საერთოდ, კოღუაშვილს ყოველთვის ეტყობოდა ერთგვარი ნდობა ვაჩაძისადმი.
"ვაჩაძე მთელი დატვირთვით ემზადება სალიცენზიო შეჯიბრებებისთვის, ალბიევი კი ევროპის ჩემპიონატზე მთლად დამაჯერებლად ვერ გამოვიდა. ამიტომ მივიჩნიე, რომ ის ზედიზედ ორ სტარტზე წარმატებით ვერ გამოვიდოდა. ეს გადაწყვეტილება მწვრთნელთა საბჭოსთანაც შეთანხმებულია და რუსეთის ჭიდაობის ფედერაციის პრეზიდენტ მიხეილ მამიაშვილთანაც" - თქვა კოღუაშვილმა.
ამდენად, აღდგომიდან ზუსტად ერთი კვირის თავზე ბულგარეთში ჩვენებურთაგან, შესაძლოა, ბაროევს სერგო გოგისვანიძე დაეჭიდოს, რადგან ნაკრების მთავარმა მწვრთნელმა ბეგი დარჩიამ მას ანდო ლიცენზიისთვის ბრძოლის უფლება. აი, ვაჩაძესთან სოფიაში ქართველის შეხვედრა კი გამორიცხულია, რადგან 66-ია ის ერთადერთი წონა, სადაც მსოფლიოზე ლიცენზია მოვიპოვეთ - ეს მსოფლიოს ვიცე-ჩემპიონმა მანუჩარ ცხადაიამ გააკეთა.
ბარემ აქვე შეგახსენებთ, რომ ბერძენ-რომაელთა ტურნირში ჩვენგან გოდერძი დავითაძე (55), ფირუზ წულუკიძე (60), ზურაბ დათუნაშვილი (74), რევაზ ნადარეიშვილი (84) იჭიდავებენ, ხოლო 96-ში მონაწილე ფალავანი მწვრთნელებს ჯერ არ დაუსახელებიათ. სოფიაში "თავისუფალთა" შორის სამი ქართველი იასპარეზებს - ვლადიმერ ხინჩეგაშვილი (55), ზურაბ იაკობაშვილი (66) და გიორგი გოგშელიძე (96).
ყოველდღიური სპორტული გაზეთი "ლელო"
