საქართველოს ბერძენ-რომაელთა ნაკრებმა არცთუ ცუდად იჭიდავა საოლიმპიადო მზადების ფარგლებში ბოლო სასტარტო ტურნირზე - ამ უქმეებზე დორტმუნდში ჩატარებულ "გერმანიის დიდ პრიზზე". ჩვენი ოლიმპიური გუნდი იქ სრული შემადგენლობით გაემგზავრა - ექვსივე ლიცენზირებულმა ფალავანმა იასპარეზა, რომელთაგანაც ოთხმა მედალი მოიპოვა - თითო ოქრო-ვერცხლი და ორი ბრინჯაო.
ჩემპიონი რევაზ ლაშხი (60) გახდა, ზედა წონაში - 74-ში მოასპარეზე მანუჩარ ცხადაია მეორეზე გავიდა, ვლადიმერ გეგეშიძე (84) და სოსო ჯაბიძე (96) - მესამეზე. ჩვენი გუნდის სხვა წევრებიდან ზურაბ დათუნაშვილი (74) მეცხრე ადგილზე დარჩა, გურამ ფერსელიძე (120) - მეშვიდეზე.
თან, ჩვენებმა რამდენჯერმე საშუალო დონის ფალავნებთან წააგეს, თუმცა ვერც ამისთვის დავძრახავთ - ეს სასტარტო შეჯიბრება იყო, სადაც შედეგზე ბევრად მნიშვნელოვანი სატურნირო პრაქტიკის მიღება იყო. არც ისაა გამორიცხული, ჩვენებმა შესაძლებლობები ბოლომდე არ გამოავლინეს, ანუ ზედ ოლიმპიადის წინ არ გაიშიფრნენ.
ერთი სიტყვით, ამ შეჯიბრების ერთადერთი დანიშნულება სტარტი იყო, რაც სრულად შეასრულა, ხოლო ჩვენებურთა ასეთი სტაბილური გამოსვლა სწორი გზის მანიშნებელია.
ალბათ, ნაკრების მწვრთნელ ბეგი დარჩიას გული დათუნაშვილისა და ფერსელიძის ადრე გამოვარდნაზე დაწყდება - ისინი ვერც სანუგეშოში გადავიდნენ, ანუ ბევრი შეხვედრა ვერ ჩაატარეს.
აი, ამ თვალსაზრისით, ლაშხმა სხვებზე მეტად იყოჩაღა - ხუთი ორთაბრძოლა გამართა. მან პირველ წრეში ხორვატი ივან ლიზატოვიჩი დაამარცხა, მერე კი მისთვის საინტერესო სკოლის - სამხრეთ კორეის წარმომადგენელს შეხვდა.
ოლიმპიადაზე ქართველის ერთ-ერთი ყველაზე სახიფათო მეტოქე იქაურია - ათენის ოლიმპიადის ჩემპიონი, მსოფლიოს ორგზის ბრინჯაოსმედალოსანი ჯი-ჰიუნ იუნგი, რომელმაც ლაშხს 2010-2011 წლების მსოფლიოს პირველობებზე მოუგო.
ოღონდ დორტმუნდში არა მან, არამედ ეუნ ბიმ კიმიმ იჭიდავა. ვერ გეტყვით, რომელს დააყენებენ კორეელები ოლიმპიადაზე, მაგრამ კიმთან ლაშხმა იმარჯვა, მერე გერმანელი კრისფოტ ბასტი და ფინელი ევროპის ჩემპიონი იარკო ალა-ჰუიკუც დაამარცხა, ფინალში კი აზერბაიჯანელ მსოფლიოს მოქმედ ჩემპიონს, ევროპის ორგზის გამარჯვებულსა და პეკინის ოლიმპიადის ვერცხლისმედალოსან როვშან ბაირამოვს აჯობა.
თუმცა ბაირამოვი 55-ის მოჭიდავეა, ამ წონაში კი ლაშხის კიდევ ერთი უსერიოზულესი კონკურენტი აზერბაიჯანიდან ევროპისა და მსოფლიოს ჩემპიონი ჰასან ალიევია, რომელიც ამჯერად 66-ში გამოვიდა და ფინალი წააგო.
სხვათა შორის, ლაშხმა მას დორტმუნდში შარშან მოუგო, როცა ევროპის ჩემპიონი გახდა - ნახევარფინალში დაჯაბნა და მისი ლამის სამწლიანი წაუგებელი სვლა შეაჩერა.
ერთი სიტყვით, დორტმუნდი ლაშხისთვის ბედნიერი ქალაქია. იმის მიუხედავად, რომ მთავარ კონკურენტებს ამჯერად არ შეხვედრია, მაინც ფრიად დატვირთული ბადე გაიარა და ძლიერ მეტოქეებს აჯობა. ცხადია, ეს ოლიმპიადაზე წარმატების გარანტია არაა, მაგრამ მაინც მნიშვნელოვანი ფაქტია.
ცხადაიას მწვრთნელებმა წონა არ დააკლებინეს, რადგან ერთ თვეში ეს ისედაც მოუწევს საოლიმპიადოდ და ამჯერად 74-ში აჭიდავეს. ფინალამდე მან არცთუ ძლიერ ფალავნებს მოუგო - ბელარუს იაუჰენ ბაჩკოს, კორეელ ნეულ პუ სან ჯეონს და ჩეხ ტომაშ სობეცკის, ფინალი კი ხორვატ ბოზო სტარჩევიჩთან დათმო.
დათუნაშვილმა ერთი შეხვედრა მოიგო - გერმანელ დამიან ჰარტმანთან, მერე კი ფინელ ვალტერი მოისიოსთან წააგო და რაკი მომდევნო წრეში ისიც დამარცხდა ზემოხსენებულ ხორვატ სტარჩევთან, ჩვენებური სანუგეშო წრეში ვერ გადავიდა.
გეგეშიძემ, მედლის გარდა, ერთი ხმაურიანი მოგებაც მიითვალა - პირველივე შეხვედრაში ბელარუსი მსოფლიოს მოქმედი ჩემპიონი ალიმ სელიმაუ დაამარცხა. ამის შემდეგ ცოტა მოულოდნელი იყო წაგება შვედ კრისტოფერ იოჰანსონთან - ის მოგვიანებით ჩემპიონი კი გახდა, მაგრამ არაა ძლიერი ფალავანი. გეგეშიძემ სანუგეშოში ორი შეხვედრა მოიგო - ესტონელ ერიკ აპსთან, რომელმაც წლევანდელ ევროპირველობაზე ბრინჯაოსთვის იჭიდავა და პოლონელ თადეუშ მიჰალიკთან.
მედლამდე სანუგეშო წრის გავლით მივიდა ჯაბიძეც - პირველ წრეში ისვენებდა, მეორეში კი ესეც მომავალ ჩემპიონთან და კვლავაც არცთუ ძლიერ შვედთან დამარცხდა - ფრედრიკ შოენთან. ამ შვედმა ფინალში ერთ დროს ლეგენდარული, ახლა კი წარსულის აჩრდილად დარჩენილი ეგვიპტელი ოლიმპიური ჩემპიონი კარამ მოჰამედ გაბერ იბრაგიმი დაამარცხა.
"ეგვიპტელმა მუმიამ" ლონდონის ოლიმპიადის საგზური კი მოიპოვა, ოღონდ - 84-ში, რადგან აქაური ადგილი დაკავებული დახვდა მსოფლიოს ჩემპიონ აბდელ ფათაჰისგან, თუმცა ამჯერად წონა არც მან დაიკლო. რაც შეეხება ჯაბიძეს, მას სანუგეშოში მხოლოდ ერთი მეტოქე ჰყავდა - პოლონელი რადოსლავ გრზიბიცკი, რომელსაც იოლად აჯობა.
მძიმე წონაში ფერსელიძე პირველივე შეხვედრაში დამარცხდა გამოცდილ გერმანელ ნიკო შმიდტთან და გამოვარდა, რადგან ფინალში ვერც გერმანელი გავიდა.
დორტმუნდიდან ჩვენი ოლიმპიური ექვსეული დღესვე გაემგზავრება მინსკში, სადაც ერთობლივ წვრთნებს გაივლის. არაა გამორიცხული, მათ საოლიმპიადოდ დასკვნითი შეკრებაც იქ მოაწყონ.
ბოლო სარეპეტიციო სტარტი (იბეჭდება მცირე ცვლილებით)
ყოველდღიური სპორტული გაზეთი "ლელო"
