საქართველოს ბერძნულ-რომაული სტილით მოჭიდავეთა ნაკრები 6 თებერვალს მინსკში გაფრინდა, სადაც ევროპის ჩემპიონატისთვის მოსამზადებელ მორიგ შეკრებას გაივლის, ოღონდ ამჯერად - ერთობლივს. გუნდის მთავარმა მწვრთნელმა ბეგი დარჩიამ იქ ახალგაზრდული ნაკრების ის წევრებიც წაიყვანა, რომლებიც უფროსებში გახდნენ საქართველოს ჩემპიონები - ედნარ შავაძე (55) და რობერტ ქობლიაშვილი (84).
ისინი 20-წლიანთა ნაკრებთან ერთადაც ემზადებიან და ჯერ კიდევ არაა გადაწყვეტილი, საბოლოოდ რომელ გუნდში დარჩებიან, თუმცა დარჩია თავს იზღვევს და ეროვნულთან ერთად მაინც ამზადებს - ვაიდა, უცაბედად დასჭირდეს; თუ არადა, ახალგაზრდულისთვის ხომ იქნებიან მზად.
ამ დუეტის გარდა,
ეს ფალავნები მწვრთნელის გეგმაში ისედაც შედიოდნენ, ბოლო დღეებში კი სპონსორთა დახმარებით მათ კიდევ ორი დაემატა - მიხეილ ქაჯაია (96) მშობლიურმა წყალტუბოს რაიონმა დააფინანსა, რევაზ ნადარეიშვილი (84) - სახელოვანმა ვეტერანმა, მსოფლიოს ოთხგზის და ოლიმპიურმა ჩემპიონმა რომან რურუამ.
შეგახსენებთ, რომ ბოლო უქმეებზე სტამბულში ჩატარებულ "ვები ემრეს მემორიალზე" ნადარეიშვილი მეორეზე გავიდა, ქაჯაია - მესამეზე.
ჩვენები მინსკში 21 თებერვლამდე ივარჯიშებენ, მერე კი უნგრეთში გადაინაცვლებენ და 23-24 თებერვალს სომბათჰეიში "ოქროს დიდი პრიზის" რიგით მეორე ტურნირზე გამოვლენ. ის შეჯიბრება დასკვნითი იქნება თბილისში 19-24 მარტს გასამართი ევროპის პირველობისთვის. ჯერჯერობით დაზუსტებით ვერ გეტყვით, ვინ იჭიდავებს უნგრეთში.
შეიძლება, დარჩიამ იქ მინსკიდან ყველა წაიყვანოს, ხოლო თუ ვინმეს გამოაკლებს, ალბათ, ბოლო დღეებში დამატებულ ფალავნებს, რადგან შავაძის გარდა, სხვები საქართველოს ჩემპიონები არ არიან.
მართალია, ქვეყნის პირველობაში ლონდონის ოლიმპიადის მეხუთეადგილოსნები - გეგეშიძე და ფერსელიძე ტრავმების გამო საერთოდ არ გამოსულან, მაგრამ მათ საპატიო მიზეზი ჰქონდათ და ვფიქრობ, მწვრთნელი შანსს მაინც მისცემს.
ევროპის ჩემპიონატისთვის მზადებას ჩვენი თავისუფალი სტილით მოჭიდავეთა ნაკრებიც აგრძელებს, რომლის ძირითადი ნაწილი, ანუ ლიდერები 8 თებერვალს, გამთენიისას ანკარაში გაემგზავრებიან, სადაც 9-10 თებერვალს იაშარ დოგუს სახელობის მემორიალი ტარდება.
მთავარ მწვრთნელ რევაზ მინდორაშვილს იქ გიორგი ედიშერაშვილი (55), ვლადიმერ ხინჩეგაშვილი (60), კონსტანტინე ხაბალაშვილი (66), დავით მარსაგიშვილი (84), ელიზბარ ოდიკაძე (96) და გენო პეტრიაშვილი (120) მიჰყავს.
მწვრთნელს დავით ხუციშვილის გამოცდაც სურდა, მაგრამ ტრავმა მიიღო - მხრის კუნთი გაეჭიმა. მან ვარჯიში უკვე განაახლა, თუმცა ტურნირზე საჭიდაოდ ჯერ მზად არაა. მინდორაშვილმა მის ნაცვლად სიაში ზურაბ ერბოწონაშვილი შეიყვანა, ოღონდ ბედის ირონიით, ისიც დაშავდა - ამ დღეებში ერთ-ერთ ვარჯიშზე მუხლი დაიზიანა...
რაც შეეხება ამ ნაკრების სათადარიგოებს, მათი ნაწილი "დოგუს მემორიალიდან" ერთ კვირაში - 16-17 თებერვალს კიევის საერთაშორისო ტურნირში იჭიდავებს. იქ სულ ხუთი ფალავნის გაგზავნა იგეგმება: ბექა ლომთაძის (60), ზურაბ იაკობაშვილის (66), მამუკა კორძაიას (96), დავით მოძმანაშვილისა და გიორგი საკანდელიძის (ორივე - 120).
ყოველდღიური სპორტული გაზეთი "ლელო"
